METHIU 3 - ITHAR CHONGHAK

Baptis Johon ing Isa Chong atong

¹ Apha ichiinache Baptis Johon ing Judia paam nache thengka isa chong atong,

² “Nenbarungriir huungruw, thangbaen iruwng paamchu ynneengsa,” taka ariir.

³ Hava mee khaene Jaephar Isaia ing jinge ichii ing ariir vasahva, “Paamfhuw nache iruur yngkheh ing uungna, Aafhuw lamchu seemruw, asiniichu manchiimruw.”

⁴ Johon ing ut vin peendiir ing ynthongka amanche adiirriim nache shavin ing ynchiim vokhehkho athaemin inche khaeruwng re lampa khiniingva.

⁵ Jerusalem tanii vokhehkho Judia paam aangkheng tanii amanche Jordan idaam akuurpaang tanii mee aangkheng aningting theng aeka

⁶ isii entuchaap enriirpa; amana Jordan iva nache enuwchu Johon ing baptais amantu ae.

⁷ Pharisi vokhehkho Saduki ae mee aanem aenche baptais itunii khaena enthengtah nache Johon ing eningna ariir, “Baruwr siti ae, barung-siknii thengvachii tanii taenruw ichii achuw ing neningna ariirva?

⁸ Atii nenbarungriir mantehruw;

⁹ Kempa Abraham omna tanuwna nenbarungriir mangamjaeh mahruw; neningna kariirnah, Thangnang ing hava rung vakhae itanii Abraham siti ae abasuwchehsa,

¹⁰ amanche ataraen rapkho thingbur vakhae arajungna rii ynringka omna; aanla isa omah chaapchu ynfuwr naka mi sungting ynthuchir vaata.

¹¹ ‘Nen-barungriir nenghuung khaena ki ing chiina baptais kamantu vachuw, changvakonchu kaanuwna thengvachii chuve kachungna ruungsehna; Ama ing ynthiing laetha vokhehkho mi thohche baptais imantuvaata. Ki chuve ama akhingop rapkho ichi matik chamah ing.

¹² Akikna amanthiingnii sisa achisa, sachiichu iheer naka iseeng gehuchu itomting thinvaata, changvakonchu arasiii chaap chuve ichen naemah ing ichuwh mi sungting bathuvaata.’ ”

Jesu ing Baptais atu

¹³ Changlaenche Jesu ing Johon ningna baptais itunii khaena Galili tanii Jordan nache ivatheng.

¹⁴ Chang-vakonchu Johon ing Jesu chu khaamka ariir, “Ki i nangla ing baptais imantuva nachii vara, amachu nang ing kaningna ivatheng vachii!”

¹⁵ Jesu ing abasang, “Ataraennii khaena chembe rura, akhaechuve jinge ichii ing inuw ing ichum ynthiing nong aangkheng itu matik ichavamuw.” Chutahnache Johon ing arupa.

¹⁶ Jesu ing baptais tuka chiisung tanii hungsuwhsa; amana enruw, thangbaen ymmongka Thangnang laetha inche khunu vaang juwngka ataklina ijungchuwchu amupa.

¹⁷ Amana thangbaen tanii iruur yngkheh ing ajeriir, “Havi kaning kamansiihpak kasapa chuva, ataklina inempak kabarungriir pensakna.”