METHIU 26 - ITHAR CHONGHAK

Jesu Thehnii Ensir

¹ Jesu ing hava vakhae i ariirchir inuwna asebok ae ningna ariir,

² “Nenuw ing nemanghuwsa amachuve inii ninii aanuwna manlaennii kuurva inii vaata, amana Mee Sapa chu meekik charnaka khros na jamvaatae.”

³ Changlaenche aanchung jaethiim aere lipah ipuh vakhae Aanchung Jaethiim Kaiphas eennache yngkong-sae,

⁴ amana Jesu chu suwr ae naka thehva enchii khaena ynruwhjaeh inche ensirpa.

⁵ Changvakonchu manlaennii kuurva sungna phusiir phuraang asuwhniimah khaena kuurva sungna tumahmanuw enchiipa.

Jesu chu Bethani na Richiithou Yntaehpeeh

⁶ Bethani khuwna ong ynchor mee Simon een sungna Jesu ing aonglae,

⁷ rupanuw yngkheh ing amen iruwpak richiithou buwr yngkheh vechika Jesu rusae nache achirpa.

⁸ Amachu sebok ae ing emutah nache embarung sikka enriir, “Ynchii khaena amen iruwpak havi amampaamva?

⁹ Akhaechuve havana richiithou havi amen inem-pakna juwr manuwka sara ae ningna ipeehsah aruva.”

¹⁰ Jesu ing enriir chongchu amang-huwtah nache sebok ae ningnache ariir, “Ynchii khaena rupanuw havi nemanjava? Ama ing kaningna isapak nong yngkheh yntupeehsa.

¹¹ Nenuw chuve apha vakhaena sara aethoh onghakva nenta, changvakonchu ki chuve apha vakhaena nenuw thoh onghakjaeh mahmanuw.

¹² Ama ing kataklina richiithou achir i yndimva kachiichu thoraang yntupeehva.

¹³ Ki ing neningna atatak ing kariirnah, laaruw paam apham siirna havana isa chong i aantong raenche, rupanuw havi inge atu arichu yndennii khaena ynriir vaata.”

Judas ing Jesu Arensah

¹⁴ Changlaenche sebok suum ariinii kaarna ynvae Judas Iskariot ing aanchung jaethiim ae ningting vakka asiipae,

¹⁵ “Ki ing neningna Jesu chu pining chuwcha, nenuw ing kaningna ynchii ipiva nenchiiva?” Amana enuw ing khampher somthum apeehpae.

¹⁶ Chutahnache amanache basenka ama ing irensahnii khaena apha chavachii amanjongpa.

Jesu ing Sebok aethoh Manlaennii Thaemin Asahhak

¹⁷ Chor ynvaemah tar isahnii kuurva abasennii iniina sebok ae ing Jesu ningna theng aeka asiiae, “Manlaennii thaemin isahniichu nakhaena kenuw ing unakhe sir ae naka ynchiivachii?”

¹⁸ Jesu ing eningna ariir, “khuw-ruung tingse vaknuwna achuw yngkheh mee ningnache taruw, Oja ing ariirva, kaaniichu ynneengsa; na-een sungna kasebok aethoh manlaennii kuurva iniichu tusakata achiinah taruw.”

¹⁹ Jesu ing ariir inuwzii inche asebok ae ing manlaennii thaemin isahniichu ensirpa.

²⁰ Khuri hungvika imaarnii khaena Jesu re sebok aechu ongsae.

²¹ Enuw ing thaemin ensah raenche Jesu ing ariir, “Atatak ing neningna kariirnah, nengkaarna yngkheh ing ki irensava nenta.”

²² Amana sebok aechu inempak embarungriir jaasa vokhehkho yngkheh yngkheh ing Aafhuw kipingmo ta aeka iriir embasenpa.

²³ Amana Jesu ing abasang ae, “Isahnii bukamna kik kengafhuwrhak mee inche ki irensavaata.

²⁴ Mee Sapa ing thikvachii khaena ynthiing thiimziihna ariir inuwzii ing atuva. Changvakonchu Mee Sapa arensah mee khaena chembe ijaniisapa! Ama meechu ynlaarmah vanave, akhaena sakseh vachiiva.”

²⁵ Jesu chu arensah Judas ing ariir, Oja, ki ynchiinii vachiimo taka asiitah nache, nataksah ing nariirsahpa taka abasang.

Aafhuw Ningsiih Thaemin

²⁶ Amana enuw ing thaemin ensah raenche, Jesu ing tarchu verika, bor pika vokhehkho abakhiipa, amanche asebok ae ningnache jepika aiir, “Verinuwna saruw, havi ki kashava.”

²⁷ Aanuwnache ama ing kamchu verika vokhehkho manpahsaka, aman-che eningnache jepika ariir, “Nenuw nengkheng inruw;

²⁸ akhaechuve havi itharpeh chongiir mee aanem isii kuhnii khaena ynta kasii va.

²⁹ Ki ing neningna kariirnah, atae basen naka kapa iruwng lipah nache ki ing nenuwthoh itharpeh vomrip chii inva kachii aaniichu aphamahri raentaang vomrip chii havi inmahning.”

³⁰ Amana enuw ing la tu aeka aanuwnache Oleep Bung tingche sisae.

Pitar ing Jesu Rumahvachii Maen ing Ajeer

³¹ Apha ichiinache Jesu ing eningna ariir, “Atanii jaen nenuw nengkheng taenchir tanuwka imavanenta, akhaechuve ynziihka omna, ‘Ki ing jao aacheerchu manvarva kata, amanche jao aruwr aechu kiichir vaatae.’

³² Changvakonchu ki athar hangring ningka Galili ting maen henginsa vakata.”

³³ Changlaenche Pitar ing basangka aningna ariir, “Mee areh ing imakhang nakho, ki chuve utaraenkho bathenmah ningchii!”

³⁴ Jesu ing Pitar ningna ariir, “Ki ing atatak ing naningna kariirnah, amachuve atanii jaen aarkhuung ing akhuwngmah rirae nang ing ki vathumchak irumah tanii.”

³⁵ Amana Pitar ing abasang, “Ki nangthoh ithiihak phavakachii vakhang nakho, ki ing nangchu irumah tumahdeh ningchii.” Sebok vakhae aengkho changche enriirpa.

Getsamani na Athamsah

³⁶ Changlaenche Jesu ing asebok aethoh Getsamani enchii mintingche vaksae. Amana Jesu ing sebok ae ningna ariir, “Nenuw havane heongruw, ki chungtingse hangningka thamsa kata.”

³⁷ Changlaenche ama ing Pitar re Zebedi sapa ynniimeh aechu aruwpae. Amana Jesu inempak ija ing rungneh ynthehsa.

³⁸ Amatah nache ama ing eningna ariir, “Kalaetha i adongniichak ithii aru phanii ing jaana, nenuw hane ongnuwna kithoh ynruw ing hahjaehruw.”

³⁹ Jesu ing topoh yndahhak ing kar vekhiingka amana aruw barupka athamsah, “O Apa! Runave, havana kam i kaningtanii imanlaenpeehsar, changvakonchu ki ing kamanden ynsuwhmahsana, nang ing naman-denchu ynsuwhrasiing.”

⁴⁰ Aanuwnache sebok ae ningting ajuwngtah nache enuw ihejaar atinpa, amana Pitar ningnache ama ing ariir, “Ynchii khaena nenuw kithoh ynruw ing apha yngkheh pangkho nenghah chehmahva?

⁴¹ Nenuw batheem ting nenbukniimah ing hahruw vokhehkho thamsaruw. Laetha inchembe aman-denna changvakonchu hakchaang inchembe suurna.”

⁴² Avomanii athar vaanrika atham-sah, “Apa, havana kam i kaningtanii ynlaen rumah naka, inmah arumah vanave, nang ing namandenchu ynsuwhrasiing.”

⁴³ Athar vokheh ajuwnglaen chenkho asebok ae hejaar aechu atinpa; akhaechuve enuw emik inempak khuksa.

⁴⁴ Chukhaenache ama ing enuwchu maka avomanthumnii ithamnii khaena athar sisa, amana achingnii thohkhe aanghakjaeh ing athamsahpa.

⁴⁵ Amana asebok ae ningting juwngka ariir, “Nenuw ataraen phanii ing jaarchuwka nenja nenbasumva? Enruw! Mee Sapa chu isii icher ae kikting charvachii aphachu thengsa.

⁴⁶ Hangsuwruw, inuw sitaruw; enruw, ki ynrensah mee thohche ynneeng samuw.”

Jesu Getsamani na Ensuwr

⁴⁷ Jesu ing achong raenche, aanchung jaethiim aere lipah aapuh upa vakhae ing isii, chemthar, vokhehkho rumor chiaeka laarchang mee inempak aechu suum ariinii kaarna ynvae Judas ing veruw aeka vaksae.

⁴⁸ Amana Jesu arensah mee inche eningna buwtinnii inche ariir, “Ki ing aabeeng katum mee chuva, ama meechu suwrruw.”

⁴⁹ Ama ing anikung nache Jesu buumting vakka ariir, “Kabariimsah nahchii Oja taka aabeeng atum.”

⁵⁰ Changlaenche Jesu ing aningna ariir, “Kaarang, ynchii khaena hane nang ivatheng vachii?” Changlae enuw ing akik nache bachuw aeka ensuwrpa.

⁵¹ Chutahnache Jesu ing aanruwfhuw kaartanii mee yngkheh ing achem isuwka aanchung jaethiim ameenaechu atuktah nache aana asaehjohpa.

⁵² Amana Jesu ing aningna ariir. “Nachemkha akhumting thinla. Chem aachi vakhae ing chemna maangvaatae.

⁵³ Atarae ki ing kapa ningting vaarmee laarchang lejan suum ariinii athi ing jenbathenla taningka thamcheh mahnii ichii ing nemandenva?

⁵⁴ Changche ichii ing tunacha, ynsaangkhe ynthiing thiimziihchu hungchumcheh vaate?”

⁵⁵ Changlaenche Jesu ing laarchang ae ningnache ariir, “Taakuw isuwrvaang chemthar re rumor chichuwka ki isuwr ithengvachuw? Anasiir rumniieenna kamanchuw aerae nenuw ing isuwrmahchuw.

⁵⁶ Changvakonchu havana isuwh vakhae havi ynthiing thiimziihna jaephar aeng embaziihchu ahungchumnii khaenava.” Changlaenche sebok aenche Jesu bathen aeka taenchirsae.

Jesu ing Sanhedrin ae Maana Ingiir

⁵⁷ Amana Jesu aasuwr aenche thiimthang ae vokhehkho upa ae ing Aanchung Jaethiim Kaiphas eenna yngkongchak ae nache enveruwpa.

⁵⁸ Changvakonchu Pitar ing Aanchung Jaethiim vajeernii een sukmae ipha inche yndahhak ing avejiipa; amanche sungting varuwhka ynchii suwhvaate ichii achimahtaang ennii khaena aarung mee ae thohche ong.

⁵⁹ Amanache Aanchung jaethiim, upa ae, vokhehkho aanchungpuh vakhae ing Jesu ithehnii khaena amiraar ajongpae;

⁶⁰ changvakonchu ichummah saarkhii aajaeh pikhang ae nakho araarsa ichiichu tuwhcheh mahsae. Chutahnache aningkuurna ichummah saarkhii ynniimeh ahenpeeh ae,

⁶¹ “Ki ing rumniieen i mamaang ningka amana inii nithum sungna mangiirva kata achii ta aeka enriir.”

⁶² Amana Aanchung Jaethiim ing hangiirka Jesu ningna ariir, “Nakhaena ichummah ing ichong ae i yntangkho basangmah tanii?”

⁶³ Changvakonchu Jesu ing huwdaejaeh ing ongsa. Amana Aanchung Jaethiim ing aningna ariir, “Nang Thangnang sapa Khrista vataniive, keningna nasaarkhiichu iring Thangnang rumingna iriirnii khaena apha kapeehnahchii.”

⁶⁴ Jesu ing aningna abasang, “Nang ing nariir churapping. Chukhaenache ki ing naningna kariirnah, atarae basen naka Mee Sapa ing ruwreng ipirpak tachangna ongnaka thangbaen ruwrduh taklina ijuwngchu nenuw ing muvanenta!”

⁶⁵ Changlaenche Aanchung Jae-thiim ing apeen isiihka ariir, “Ama ing Thangnang taklina ithipak ing chongsa! Inuw ing havi chungna ynchii saarkhii ijongfhuw omkhang! Atae ama ing Thangnang taklina ithipak ing ichongkha nenuw ingkho nensiipa!”

⁶⁶ Nenuw ynchii nemandenva? Enuw ing embasang, ama ithii apha matik chaana.

⁶⁷ Amana enuw ing amaena bachir aeka, manvar aeka amanche areh aenche ibeeng aeka enriir,

⁶⁸ “O Khrista! Achuw ing nangchu man-varva? Keningna riirla.”

Pitar ing Jesu Arumah

⁶⁹ Atii Pitar ing vajeernii een sukmae nache aonglae meenae rupanuw yngkheh ing aningna ariir, “Nangkho Galili Jesu thohne ynruw-hakrem vachii.”

⁷⁰ Changvakonchu mee ae maensok nache ama ing rumahka ariir, “Nenuw ing nenriir chong khaene ki mang-huwmah ing.”

⁷¹ Ama ing vajeernii een sukmae ting ajungsuwhtah nache reentaang meenae rupanuw yngkheh ing amupa, amana rupanuw inche abuumna ingiir ae ningna ariir, “Hava mee ikho Nazaret Jesu thoh ynruwhakpae.”

⁷² Athar vokheh Pitar ing rumahka vokhehkho chongreep tuka ariir, “Hava mee i ki manghuwmah ing.”

⁷³ Apha topoh aanuwna abuumna ingiir aeng Pitar ningting henganeeng aeka enriir, “Nangkho enuwthoh ynruwhak kaarna yngkheh vachii ichii nachongna huwna.”

⁷⁴ Amana Pitar ing chongsii laksii iriir basenka vokhehkho chongreep tuka ariir, “Mee havi ki manghuwmah ing.” Aphachak nache aarkhuung inche khuwngsa.

⁷⁵ Amana aarkhuung ing akhuwngmah rirae nang ing ki vathumchak irumah tanii taka Jesu ing ariir chongchu Pitar ing aansiipa. Amana Pitar ing taangting jungsuwhka abarungriir asuhsahhpak ing chapsa.