METHIU 24 - ITHAR CHONGHAK

Jesu ing Rumniieen Maangvachii Ajeer

¹ Jesu ing rumniieen tanii hungsuwhka asirae, asebok ae ing Jesu ningna een aechu mansii nungka enchiitah nache abuumting vaksae.

² Changvakonchu Jesu ing eningna ariir, “Nenuw ing hava vakhae i nemusa, mumahchuw khang? Ki ing neningna atatak ing kariirnah, rung yngkheh taklina rung yngkheh ynthuw rudeh ing aangkheng jungchim naka kiichir vaata.”

Ijachaam Basenvachii

³ Jesu ing Oleep Bungna aongraenche sebok aeng ynruwhjaeh ing vak aeka chong asii ae, “Keningna riirla, nang ing juwngvanachii vokhehkho laaruw paam chivachiichu utaraen vachiiva ichii buwtinniichu ynsaangkhe tavachiiva.”

⁴ Amana Jesu ing abasang ae, “Nenuw achuw ingkho aasiirting ynruwniimah ing ynriimruw.

⁵ Karuming nache Khrista ping ta ae naka thengvaatae amanche mee aanem aasiirting kivaatae.

⁶ Nenuw ing laar vokhehkho laarsa yntuk chong siivanenta changvakonchu nenbarungriir manjamahruw. Hava vakhae i suwhvaata changvakonchu achiniirem chuve thengmahrinii.

⁷ Akhaechuve jaati yngkheh ing jaati yngkheh taklina, iruwng lipah yngkheh ing iruwng lipah yngkheh taklina har ynjong vaatae. Amanache apham tanglahlah venchaam chiilaar omvaata vokhehkho linglaang thengvaata.

⁸ Changvakonchu havana suwhvachii vakhae ichuve ijachaam abasennii vaata.

⁹ “Changlaenche nenuwchu ija-chaam ipivaatae, ithehkho itheh vaatae amanche jaat vakhae inche karuming nache ibatir vaatae.

¹⁰ Changlaenche nenuw aanem thacha tanii ynrichir vanenta; yngkheh re yngkheh ynrensava nenta amanche yngkheh re yngkheh yngharva nenta.

¹¹ Amanache jaephar pung achii ichummah aajaeh hungsuwh ae naka mee aanem aasiirting kivaatae.

¹² Ichamah ahung-bariim tahnache ningsiih aanem jungtak vaata.

¹³ Changvakonchu apha achimahri raentaang abadaarcheh meechu ikarpeeh phavaata.

¹⁴ Iruwng lipah khaena isa chongchu ajaati siirnache saarkhii ipeehnii khaenache laaruw paam aangkhengna yntongchir pehvaang naka aanuwnache laaruw paam chipeh vaata.”

Ipirpak Ijachaam

¹⁵ “Chukhaenache jaephar Deniel amanriir vaangkhe imaang ynvae yntirsuwh ing ynthiing apham nache ingiir nenuw ing muvanenta.” (achuw yngkheh aapa mee inche mang-huwrasii!)

¹⁶ “Changlaenche Judia na ong nenuw bung ting taenruw.

¹⁷ Een phuchung taklina ikar mee inche een sungting peehchae jungrimah rasiing.

¹⁸ Amanche ruwraena ong mee inche isingfhuw peen hungrimah rasiing.

¹⁹ Changvakonchu miknii aere naeri ae khaena chembe apha nache ningchuwh ningdiipnii vatapa!

²⁰ Chukhaenache havi pharbuw nakho changmahka Deennii inii nakho asuwhniimah khaena thamsaruw.

²¹ Akhaechuve laaruw paam abasenpeh raennii ing ataraen phana isuwhmahri vokhehkho utaenkho suwhmah vachii ichiisuwh ijachaam chuvaata.

²² Thangnang inche aaniichu mantommah nave achuw tikho ikarpeeh phamahnii; changvakonchu aateer vasah ae khaena chembe mantom vaata.

²³ “Changlaenche achuw yngkheh ing enruw, Khrista havane ongna, changmahka amanase ongna takhang ae nakho, amachu thacha madehruw.

²⁴ Akhaechuve ki Khrista ping ichii mee amanche Jaephar ping ichii ae hungsuwh vaatae; amanache aateer vasah ae rapkho aasiirting iruwnii khaena iruungpak laetho vokhehkho ingikniipak mandang vaatae.

²⁵ Rungaeruw, ki ing maen ing neningna hungsuwh vachii chaap kariir chirpa.

²⁶ “Chukhaenache enuw ing Khrista chu lamkangna ongna takhang ae nakho nenuw jiimahdeh aeruw; changmahka enruw, ama eensung nase ongna takhang ae nakho thacha mahdeh aeruw.

²⁷ Akhaechuve inii-suwhtah tanii tenlungpa ynlehchu taetah tingkho ireng vaangkhe ichii ing Mee Sapa ajuwnglaenche amathohche aanghakjaeh vaata.

²⁸ “Ithii sha aomnii nache laangta vaati ongpoh vaatae.”

Mee Sapa Jungthengvachii

²⁹ “Ijachaam iniichu achina, inii ing manthim vaata, tha ingkho aen mahnii, aesii ingkho thangbaen tanii jungbuk vaata, amanche thangbaenna om ruwreng chaap chukho ynnuhchir vaata.

³⁰ Changlaenche Mee Sapa buwtinniichu thangbaenna yndang vaata, amanche laaruw mee jaat vakhae ing bakhik vaatae, amanche Mee Sapa inche ruwreng vokhehkho alaar isa iruungpak thohche thangbaen ruwrduh taklina ijuwngchu muva-nenta.

³¹ Amana avaarmee aechu tumpeeh ynring rusathoh ynruw ing laaruw paam arakiing manrii tingche jenchiir vaata, amanche enuw inche laaruw paam adongnii yngkheh na ing adongnii yngkheh ipha sungna aateer vasah mee vakhaechu mangkong vaatae.

Thachang Burna Ynghuwnii

³² “Nenuw ing thachang thingbur na manghuwniiva nenchii yngkheh omna. Adeen hangthop naka ana hangduung nave saartha ahenphapa ichii nemang-huwnah.

³³ Amavaang ichii ing atae aphane isuwh vakhae nemu inge Mee Sapa ing eenkhaar aaneengpa ichiichu manghuwruw.

³⁴ Ki ing neningna atatak ing kariirnah, hava vakhae i asuwhchir mahri raentaang havana suwnthar i maangmahnii.

³⁵ Thangbaen vokhehkho laaruw paam chuve maang-vaata, changvakonchu kachongsae chuve maangmahdehnii.

Achuw ingkho Aanii vokhehkho Apha Manghuwmah

³⁶ “Changvakonchu aanii vokhehkho aphachu ampa ingmah naka thangbaen vaarmee aengkho, asapa ingkho manghuwmahnii.

³⁷ Mee Sapa juwngvachii iniichu Noah aaniina isuwh vaangkhe tavaata.

³⁸ Akhaechuve chii riimvachii inii aphamah rirae Noah ing ruwkuwng sungting aruwhmahri raentaang enuw ing sa aeka in aeka, rakhiinii aeka, vokhehkho rakhiikho manii aeka ong ae;

³⁹ amana chiichu riimka enuw vakhaechu ataenmahri raentaangche emanghuwmah vaangkhe, Mee Sapa juwngvachiichu amachu vaangche tavaata.

⁴⁰ Changlaenche ruwraena mee ynniimeh ongvaata, yngkheh chuve ruwvaata amanche yngkheh chuve mavaata.

⁴¹ Rupanuw ynniimeh aeng haachang sukvaatae; yngkhehchu ruwvaata amanche yngkhehchu mavaata.

⁴² “Chukhaenache hahjaehruw, Aafhuw juwngvachii aphachu nenuw manghuwmahchuw.

⁴³ Changvakonchu havi manghuwruw, amachuve een aafhuw inche ynchii aphanache lamruwchu thengva chiiva ichii manghuw nave, ama ing hahjaeh naka amanache a-eensung nache lamruw thengchehmah vachiiva.

⁴⁴ Chu-khaenache nenuw singsii ing ongruw, nemandenmah aphanache Mee Sapa ing juwngvaata.

Thachafhuw Meenae re Isamah Meenae

⁴⁵ “Achuwva thachafhuw vokhehkho ising meenaechu? Ama mee chuve aafhuw ing a-eengkuw aechu apha inae chakchak ing thaemin ipeehnii khaena amansir chuva.

⁴⁶ Aafhuw ing ahunganrirae changche ichii ing isapak ing nong ahentu meenaechu bor aphava!

⁴⁷ Ki ing neningna atatak ing kariirnah, ama ing adeen vakhae taklina aningnache mansir vaata.

⁴⁸ Changvakonchu ki kaafhuw thengsii mahnii tanaka isamah meenae inche abarungriirna kharnaka,

⁴⁹ amanche aarang meenae aechu bin naka, juw ynruw ae thohche sahak inhak nave,

⁵⁰ meenae inche amangaemah inii vokhehkho amanghuwmah apha nache Aafhuw inche juwngvaata.

⁵¹ Amana atakchu mongnii isuwh ing tenvaata, vokhehkho isachaang atu mee ae thohche sarup manphahak vaata. Amanache ichap ichuw vokhehkho aha iriirvaata.