METHIU 23 - ITHAR CHONGHAK

Thiimthang aere Pharisi ae Ensakniimah

¹ Changlaenche Jesu ing asebok aere meenem ae ningnache ariir,

² Pharisi aere thiimthang ae ing Mosi ongniina ongnae.

³ Chukhaenache enuw ing enriir chaapchu manjiiruw; changvakonchu enuw ing entu nong-vaang ichii ing nong tumahruw, enuwve enerpang ing riir aeka anong chuve tumah ae.

⁴ Enuw ing irik peeh ithong aeka mee amanreennah ae, changvakonchu entak chuve engkik topoh tikho manlaap nungka tamah ae.

⁵ Enuw ing entu enri chaap mee ing imurasii ichii ing atupae, amanche enrungop mansuwr deendeen ing ynthongnae.

⁶ Enuw ing kuurva nache isaseh ongnii nache ongchu engadiknah, amanche meekongnii nakho isaseh ongniichu engadiknah;

⁷ enuw ing kithiir nache mee vakhae ing salaam entu vokhehkho oja ichiichu engadiknah.

⁸ Changvakonchu nenuw ing enuwchu oja tamah aeruw, akhaechuve nenuw unaepoh vachuw amanche nenuw neng oja Khrista yngkhehpang om vatah.

⁹ Amana laaruw paamne achuwkho apa tamahruw, thangbaenna ong nenpa yngkhehpang omna.

¹⁰ Nenuwchu oja itamah ae rasiing, akhaechuve nenuw neng oja yngkhehpang omna amachuve Khrista chuva.

¹¹ Nengkaarna ki aaruungseh ping achii mee inche aasiingseh ynsuwh vachiiva.

¹² Achuw yngkheh ataksah ing ruungsa nave ama ynjuursa vaata, amanche achuw yngkheh ing ynjuursa nave, ama ruungseh vaata.

Jesu ing Isachaang entuchu Arumah

¹³ “Nengkhaena ijaniisapa, isa-chaang itu thiimthang aere Pharisi ae! Nenuw ing iruwng lipahchu mee ae maekungna nengkampa, amanche nentakkho ruwhmah sachuw, ruwhsa kata achii mee ae chukho manruwhmah sachuw.”

¹⁴ “Nengkhaena ijaniisapa, thiimthang ae! Akhaechuve nenuw ing apha iseehpak ing Thangnang ting thamsa khang tanuwre, muwkhuwnuw ae een vokhehkho empeeh enchaechu nensiihnah. Chukhaenache nenuw iruungpak miraar phavanenta.”

¹⁵ “Nengkhaena ijaniisapa, isachaang itu thiimthang aere Pharisi ae! Nenuw ing achuw yngkheh barungriirchu nemanguurchehnii khaena chifhuw iraen chuwka vokhehkho paam aajaehkho nengahuurnah; changvakonchu nencheh raenche nenuw ing atakchu nenuw ikheerdeh ing longkong siti nemambunah.”

¹⁶ “Nengkhaena ijaniisapa, mikchu ing mee nencheer! Achuw yngkheh ing rumniieen manpar naka chongreep atuchuve yntanga mahva, amanche achuw yngkheh ing rumniieenna om sana manpar naka chongreep atuchuve achongreep ingkhe ynsuwrsahva tachuwka nenriirnah.

¹⁷ Ipang mikchu ae, sana amanthiingcheh een chure asanachu achuw ingkhe iruunghakva?

¹⁸ Achuw yngkheh ing thiimkung manpar naka chongreep atuchuve yntanga mahva, changvakonchu achuw yngkheh ing Thangnang peeh manpar naka chongreep atuchuve achongreep ingkhe atak ynsuwrsahva tachuwka nenriirnah.

¹⁹ Mikchu ae! kikthuur re thiimkung chu ukho ingkhe iruungpae?

²⁰ Achuw yngkheh ing thiimkung chu manpar naka chongreep tunave, thiimkung vokhehkho asungna ynthin vakhaechu manparka chongreep atuva;

²¹ amanche achuw yngkheh ing rumniieen manparka chongreep atuchu asungna ynthin Thangnang chukho manparka chongreep atuva;

²² amanche achuw yngkheh ing thangbaen manpar naka chongreep tunave, asungna om iruwng lipah re Thangnang chukho manparka chongreep atuva.”

²³ “Nengkhaena ijaniisapa, isa-chaang itu thiimthang aere Pharisi ae! Nenuw ing chimuw bajaang nenphana suumna yngkheh ipeehchu iruwpak ing mandenchuwka vajeer chonghak sungna aaruwseh ichum, ningsiih vokhehkho thacha, hava vakhae ichuve nenuw ing teentaen seemmahchuw; chutahnache hava vakhae i iruwpak ing tuva nenchiiting buksa, amanche areh ikho itumah rumahnii.

²⁴ Mikchu ing mee icheer ae! Nenuw ing nenginnii kam sungna basuw iruwh chucha thurchuwka, siirchar chuve nenbaduwr chehnah.”

²⁵ “Nengkhaena ijaniisapa, isa-chaang itu thiimthang aere Pharisi ae! Akhaechuve nenuw ing kam re bukam jaekhi chuve ataangtaniipang itaehchuwka, asung tingcha isamah tangmah, ynner paamsah ing bariim sachuw.

²⁶ Mikchu Pharisi ae! Amaensana kam re pakaan jaekhikha asungtanii manseeng japruw, amana chembe taang taniikho seengvaata.”

²⁷ “Nengkhaena ijaniisapa, isa-chaang itu thiimthang aere Pharisi ae! Akhaechuve nenuw taangna chembe sapak nachuw, thaenkung sunu ivaar ing yntaeh thohkhe aanghaknachuw changvakonchu nenbarungriir sungna chembe mee ithii vasah saruw baruw re ithuw ing vokhehkho ynthiingmah ing sipnachuw.

²⁸ Havi thoh aanghak ing nenuwkho taangting chembe ichum mee pingeng ichii ing nemandennah, changvakonchu sungting chembe isachaang iture ichuwhmah tangmah ing bariimnachuw.”

Ponti phavachii ae maen ing Ajeer

²⁹ “Nengkhaena ijaniisapa, isa-chaang itu thiimthang aere Pharisi ae! Akhaechuve nenuw ing jaephar ae thaenchu isapak ing nentunah, amanche ichum mee ae thaen rung chukho nemanrehnah;

³⁰ amanche nenriirnah, amachuve ajae afhuw ae ing empaar raenche inuwkho ynvae-manuwve, jaephar ae sii ynta khaena inuw ynvaemah vaanchiiva.

³¹ Chutah-nache nenchong inche nenuw i jaephar ae entheh siti sanaepung ichiichu nentaksah ing nemandangsahpa.

³² Chuvanuwve nenpa nenfhuw ae ing isii entuna entusuw mahkha nenuw ing tuchirruw.

³³ Baruwr ae vokhehkho baruwr baring ae! Ynsaang khenche longkong ting bukva nenchii tanii ynjuwhchehva nente?

³⁴ Chukhaenache ki ing neningna jaephar ae amanche ising iveer mee ae vokhehkho aanchuw ae kajenchiirpa; areh ae chuve nenuw ing khros na thehva nenta, amanche areh ae chuve meekongniina ipirpak ing binva nenta amana khuwruung khuwruugna thehkenta tatanuwka thurva nenta.

³⁵ Havi nenuw ing rumniieen amanche thiimkung sungna nentheh ichum mee ae Abel na ing Barakia sapa Jekaria asii ynta ipha ing laaruw paamna ichum ae sii ynta vakhae nentaklina omvaata.

³⁶ Ki ing neningna atatak ing kariirnah, amachuve hava vakhae i ataraennii suwnthar mee ae takline suwhvaata.”

Jerusalem khaena Jesu Ichap

³⁷ “O Jerusalem, O Jerusalem, naningna jaephar kajenchiirchu rung ing deeng chiika nathehpa. Aar ing atichu abatha ing aop vaangkhe ki ing nasiti aechu aajaehmeh op aening kachiisahva, changvakonchu nenuw inchembe irupeehmah sachuw!

³⁸ Enla, na-een i kabathenpa vokhehkho aruwh thangsiisa.

³⁹ ‘Thangnang rumingna ijuwng Aafhuw chu isasehva ichii nenuw ing nenriirmahri raentaang, atarae basen naka athar supmu imumah tanuw.’ ”