METHIU 22 - ITHAR CHONGHAK

Rakhiinii Imaarna Ynghuwnii

¹ Jesu ing athar ynghuwnii thamin mee ae ningna ariir,

² “Iruwng lipah chuve jinge ichii ing tikna. Apha vokhehna iruwng yngkheh ing asapa khaena rakhiinii imaar thoraang atuthoh aanghakna.

³ Ama ing imaarnii khaena a-een vasah vakhaechu ithengnii khaena ameenae chiirka athar a-eenpae, changvakonchu enuw itheng adapae.

⁴ Athar vokheh ameenae reentaang aechu jechiirka ariir, ‘Kasachar vokhehkho kadeen khaar imarchaap theh ingka imaarnii thoraang chichirsa. Rakhiinii imaarna thengruw tanuwna va-een aeruw.

⁵ Changvakonchu theng vachii vakhae inche teentaen seemmah aeka yngkheh ing aruwrae ting sisa, areh aenche ama ama enong tingche sisae.

⁶ Athar areh aenche meenae aechu suwr aeka vokhehkho abinpae, amanche ithehkho athehpae.

⁷ Amana iruwngchu abarung amansikpae; chukhaenache ama ing laarchang jechiirka miktheh vakhaechu atheh chirpae amanche engkhuw chukho abathu chirpae.’

⁸ Amana ameenae ae ningna ariir, ‘Rakhiinii imaar thoraang chichirsa, changvakonchu imaarna yngeen vakhaekha thengva enchii meer ing reenmahsae.

⁹ Chutahnache atii nenuw lamfhuw aantuwhnii chaapna ngiirnuwna mee nemu vakhae een aeruw.’

¹⁰ Meenae aenche alam tanglahlah ong aeka mee emu vakhae isakho isamahkho aangkheng engkhuumpa. Enuw vakhae inche rakhiinii eenchu bariimsae.”

¹¹ “Changvakonchu iruwng inche itheng vakhaechu ennii khaena een sungting avaruwhtah nache mee yng-kheh ing rakhiinii peendiir niiru ing ynvaechu amupa.

¹² Amana aningna ariir, ‘Kaarang, nang ynchii taka rakhiiniina iniifhuw peendiir niiruchii ing havane ongvachii? Chutahnache ama mee inche basangcheh mahsa.’

¹³ Amana iruwng inche meenae ae ning-nache ariir, ‘Akhi akik phuwp nuwna taang ynthim ting renruw, amanche ijachaam ing chaprasii vokhehkho aha iriirsana jarasii.’ ”

¹⁴ Akhaechuve, “Mee inempak a-eenva changvakonchu topohpang aateer vatah.”

Ree ipeeh khaena chong Ensii

¹⁵ Changlaenche Pharisi aenche taang suwh aeka unakhe achongna mentaruw ta aeka ynruwhjaeh ing ensirpa.

¹⁶ Amana enuw ensebok aere Herot amee ae thohche Jesu ningna vechiir aeka enuw ing enriir, “Oja, nang ing nariir chong i chumna ichii kemanghuwsa. Thangnang lam chukho ichum ing namanchuwsa, amanche mee ing ynchii kharvaate ichiikho mandenmahchii vokhehkho miksiing mikruung enmahchii.

¹⁷ Chutahnache keningna namandenchu iriirpeehra! Kesar ningna ree ipeeh icha ichumva ichummahva?”

¹⁸ Enuw ing ichamah emandenchu Jesu ing amanghuwtah nache ariir, “Isachaang itu ae, yngkhaena nenuw ing kichu menkenta ynchii vachuw?

¹⁹ Ree pivanenchii seerchu imansiiruw.” Chukhaenache enuw ing seerchu Jesu ningting ahenchipae.

²⁰ Amana eningna ama ing asii ae, “Havane ynthin i achuw ruthaksiiva vokhehkho achuwkha ynziihne?”

²¹ “Enuw ing Kesar,” ta aeka embasang. Chutahnache Jesu ing eningna ariir, “Kesar taava ichiichu Kesar ningting piruw, amanche Thangnang taava ichiichu Thangnang ting piruw.”

²² Enuw ing ama chongchu ensiitah nache ngik aeka yngkaesae.

Ithii Hangring khaena chong Ensii

²³ Ama inii naremche ithii hangring omah enchii Saduki aenche Jesu ningna vak aeka chong ensii,

²⁴ “Oja, achuw yngkheh ing siti baringru ing thiknave arumeechu auwnaefhuw yngkheh ing sapa khaena athar biva-chiiva taka Mosi ing keningna ariir.

²⁵ Kenuw kengkaarna asapa sarii adeen mee yngkheh om. Aupa inche lunghah bika siti deenru ing thiksa, chukhaenache arumeechu anaepa ningna amahpa.

²⁶ Amachu vaangche avomaniinii, avomanthumnii amanche avosariinii ipha ing abuwhpae.

²⁷ Aanuwnache rupanuw chukho thiksa.

²⁸ Chutahnache nuwting ahangring raenche unae sarii ae nache achuw rumee ynsuwhva chiiva? Akhaechuve engkheng ing abuwhpae.”

²⁹ Jesu ing abasang ae, “Thangnang ynthiing thiimziih vokhehkho Thang-nang ruwreng nemanghuwmah i nenuw nenraarsa.

³⁰ Akhaechuve athar hangring vasah mee vakhaechu rakhii niimahnii ae amanche rakhiiniikho omahnii, changvakonchu enuw chuve thangbaen vaarmee aethoh aanghak vaatae.

³¹ Ithii hangring khaena Thangnang ing neningna ynchii ariir: Nenuw amachu nenpamahva?

³² ‘Ki Abraham Thangnang ping, Isak Thangnang ping amanche Jakop Thangnang chuping achiisa.’

³³ Ama ing amanchuw ae chongchu mee vakhae aenche ensiitahna inempak ingik ae.”

Aaruungseh Chonghak

³⁴ Saduki aechu Jesu ing manchong chehmahsae ichii chongchu Pharisi aeng ensiitah nache, enuw yngkong aeka

³⁵ amana engkaar tanii vajeer tunii ihae yngkheh ing Jesu chu menkata taka chong yngkheh asii,

³⁶ “Oja, vajeer chonghak sungna aaruungseh chonghakchu ynchiiva?”

³⁷ Jesu ing aningna abasang, “Aafhuw Thangnang chu nabarungriir aangkheng, nalaetha aangkheng amanche namanden aangkheng ing naning mansiihva nachiiva.

³⁸ Havi aren vokhehkho aaruungseh chonghak chuva.

³⁹ Avomaniinii chuve, ‘Nang ing naveenchaang aechu nataksah vaang naning mansiihva nachiiva.’

⁴⁰ Hava chonghak ynniimeh inge vajeer chonghak vokhehkho jaephar ae chong aangkhengchu ynsakchirva.”

Devit sapa khaena chong Ensii

⁴¹ Amana Pharisi aeng empurpohrae Jesu ing eningna chong yngkheh asiiae,

⁴² “Nenuw Khrista khaena ynchii nemandennah? Atak i achuw sapa va?” Enuw ing embasang, “Devit sapa va.”

⁴³ Ama ing eningna ariir, “Amachu ynsaangkhe Devit ing laetha jaarna atakchu Aafhuw achiiva?

⁴⁴ Devit ing taka, ‘Aafhuw inche Kaafhuw ningna ariir: Nang eejeehnii aechu nakhi derna kasiih mahtaang kabaen tachangne ongla.’

⁴⁵ Amachu vaniive, Devit atakrap ing Aafhuw taka ariirchu ynsaangkhe asapa vachiiva?”

⁴⁶ Amana achuw yngkhehpang ingkho achongchu basangcheh mahsae, vokhehkho ama inii nache basenka aningna achuw ingkho thona isa ing chong siicheh mahsae.