METHIU 20 - ITHAR CHONGHAK

Vomrip birna ichang ae taklina Ynghuwnii

¹ Thangbaen lipahchu vomrip birna changvachii ineehnii khaena aafhuw ing ziing imaenphikna baverka mee ajongthoh aanghakna.

² Nikheh ruthamen dinari yngkhehna ynru aeka aruwrae tingche amansipae.

³ Apha ynthum taangna ahungsuwh tahnache ama ing entufhuw omahka kithiirna ingiir aechu amupa;

⁴ chu-tahnache ama ing eningna ariir, “Nenuwkho sinuwna kavomrip birna vachangruw, nenuw ing phava nenchichu piva kachuw.”

⁵ Chu-khaenache enuw ing sisae. Athar apha kuruk re apha eekuw taangna achingnii vaangkhe aruwrae ting achiirpae.

⁶ Apha suum arii yngkheh ruvaena ahungsuwh tahnache mee reentaang ae hengiir atinpa. Amana eningna ariir, “Nenuw ynchii khaena havane yntanga turuchuw ing siimseeh apha mamaang chuwka ingiir vachuw?”

⁷ Enuw ing embasang, “Kenuw achuw ingkho ineehmah.” Chunuw vaniive nenuwkho sinuwna kavomrip birna vachangruw.

⁸ Khuri ajungvitah nache, vomrip bir aafhuw inche rukuum itu ningna ariir, “Vomrip birna ichang vakhae aekha va een ae nana ningkuur ing isiae nakhe basen nana amaensa ing isiae ipha ingkhe ruthamen piaera.”

⁹ Apha suum arii yngkhehna ningkuurdeh ing isiae ningna dinari yngkhehter apeehpae.

¹⁰ Maensa ing isi vakhae aenche ruthamen inemhak ing phava kenta ichii ing emanden; changvakonchu ynchimter ing ruthamen dinarichu emphapa.

¹¹ Amachu emphatah nache vomrip bir aafhuw taklina engaechu chiimahka chongsae.

¹² Ningkuur ing isiae khachuve apha yngkhehpang ichang paetah, kenuw chuve inii ynsa sungna siimseeh ija khaang ungka ichangpung changvakonchu ningkuur ing isiae thoh ruthamen namanchimpa ta aeka enriir!

¹³ Chutahnache ama ing iva ae kaarna mee yngkheh ningnache abasang, “Kaarang, ki ing neningna ynraar tumah ing. Nenruthamen dinari yngkhehna ynrumuwka ichangmah vachuw khang.

¹⁴ Nang ing phava nachii naruthamen chinana yngkae. Nang kapeehchii vaange aningkuurna kaneeh aekho ruthamen ynchimchak ing ipeehchu kakusiva.

¹⁵ Ki kaseersah nache tuning kachii ituchu kakusimah vakhang? Ki kabarungriir asaktahna nemik abuw inaava?

¹⁶ Chutahnache havi vaange ningkuur ing maensa vaata, amanche maensa inche ning-kuur vaata. Akhaechuve mee inem a-eennah, changvakonchu ituum aateernah.”

Jesu ing Thikvachii khaena Avomanthumnii Ariir

¹⁷ Jesu ing Jerusalem ting sika, ama ing asebok suum ariinii aechu asiksii ing ruwka lam nache eningna ariir,

¹⁸ “Enruw, inuw Jerusalem ipha ing hungsimanuw, amanache Mee Sapa chu aanchung jaethiim aere thiimthang ae ningna rensavaatae; amanche enuw ing ithehnii khaena atakchu manraar vaatae,

¹⁹ vokhehkho ynniisahnii khaena, ithipak ing ibinnii khaena amanche khros na ijamnii khaena reentaang mee ae ningting pivaatae. Changvakonchu inii nithum ahenpharae ama hangring vaata.”

Jems re Johon Aanring Emnuw ing Athamsah

²⁰ Changlaenche Jebedi sapa aechu amnuw ing Jesu ningna veruw aeka, amaensokna vakhupsaka ynchii yngkheh aningna aniihsahpa.

²¹ Jesu ing aningna asii, “Nang ing ynchii nadikva?” Ama ing abasang, “Naaruwng lipah nache ki kasiti ae i natachang ting yngkheh amanche natari ting yngkheh imangongpeehsa aera.”

²² “Jesu ing abasang, nenuw ing ynniihchuw i nentak ing manghuw mahchuw.” “Ki ing ijachaam ka innii kam nache nenuw inchehva nente?” “Inchehva kenta,” ta aeka abasangpae.

²³ Jesu ing eningna ariir, “Nenuw ing kakam ne inchuve inchehva nenta changvakonchu katachang re katarina ong arumah aru chuve ki ing picheh vakachuw mahva. Havana ongnii ive kapa ing enuw enrutum taka atupeeh mee aechu ongvachiipae.”

²⁴ Ama chongchu sebok suum aeng ensiitah nache, unae ynniimeh ae taklinache embarung siksa.

²⁵ Chukhaenache Jesu ing enuw engkheng eenka ariir, “Reentaang mee ae lipah aapuh aengkho entaklina aafhuw ynsuwhnae, amanche aaruungpung enchii aengkho entaklina aatuaricheh nong entusa ichii nemanghuwsa.

²⁶ Nenuw nengkaarna chembe havi suwhmahnii. Achuw yngkheh ing nengkaarna iruungseh idiknave, ama mee inche nemeenae ynsuwhva chiiva;

²⁷ amanche achuw yngkheh ing nengkaarna aanchungseh ynsuwh ningka tanave, ama mee inche nemeenae ynsuwhva chiiva;

²⁸ Mee Sapa inche atakchu rukuum itupeehnii khaena ijuwng mahva, changvakonchu rukuum tupeehnii khaena vokhehkho mee inempak ikarnii khaenache aringkum ipeeh ijuwngva.”

Jesu ing Mikchu meeniimeh Amansak

²⁹ Jesu ing asebok aethoh Jeriko tanii enghuungrae mee inempak ing atakchu ajiipae.

³⁰ Enghungsinii lamfhuw kuurnache mikchu ynniimeh heong aenche Jesu hungsina ichii chong ensiitahna vauung aeka enriir, “Devit sapa Aafhuw naning iman-chuwhsara.”

³¹ Mee aenche enuwchu enghuw tamna ta aeka enrakuhpa. Changva-konchu enuw inche ipir ing uung sehseh aeka enriir, “Devit sapa naning imanchuwhsara.”

³² Amana Jesu ing ngiirka enuwchu a-eenpae. “Nenuw nengkhaena ki ing ynchii itu nengadikva?”

³³ Enuw ing embasang, “Aafhuw, kemik musakenta!”

³⁴ Jesu ing aning manchuwh aeka emikchu aparpa; aphachak nache imu emphapa vokhehkho enuw ing lam nache Jesu aanuwchu enjiipa.