METHIU 16 - ITHAR CHONGHAK

Jesu ningna Laetho yndangnii enjong

¹ Pharisi aere thiimthang aenche Jesu ningna theng aeka menkenta enchii khaena keningna thangbaen tanii laetho mandangla enchii.

² Changvakonchu Jesu ing eningna abasang, “Khuri ajungvirae nenuw ing vaangseng takna, khuw sakvaata nenchiinah.

³ Ziing ahenpha nachembe vaangseng takna lamkho uwna; ataniive khuw suwrvaata nenchiinah. Nenuw ing minvaen ziih inuwzii ing ynchii suwhvaate ichii nemanghuwsa, changvakonchu laetho apha chuve nenuw manghuw chehmah tanuw.

⁴ Ichamah vokhehkho ichuwhmah siti aenche laetho yndangchu ajongnah ae, changvakonchu Jona laetho yndang chumah naka reentaang laetho yndangnii pimah ningchuw.”

Pharisi aere Saduki ae Chor

⁵ Sebok aeng siaeka chiilaar engkah nuwna tar ireen embahirchu engaansiipa.

⁶ Chutahnache Jesu ing eningna ariir, “Nenuw Pharisi aere Saduki ae chor khaena ynriimruw.”

⁷ Enuw enareersahna yngkheh yngkheh chongsae, “Ama ing ariir havi inuw ing tar ynreenmah khaenava.”

⁸ Amachu Jesu ing amanghuw tahnache ariir, “O topoh pangti thacha om ae, nenuw ing tar nenreenmah khaena nentaksahna ynchii khaena ichong vachuw?

⁹ Nenuw ing ataenpha nemanghuwmah riva? Tar runga ing mee lishing runga ympika amanche abarii buruk aajaehmeh nemangkong nengaansiimahva?

¹⁰ Changpang mahka athar tar sarii ing mee lising manrii ympika amanche abarii buruk aajaeh nemangkong?

¹¹ Ki ing tar khaena ichong mahping ichii ynsaangkhe nenuw ing nemanghuw mahva? Chukhaenache Pharisi aere Saduki ae chor khaena ynriimruw.”

¹² Changlaenche chor ynvae tar khaena ichong mahva, Pharisi aere Saduki ae chongzeer nakhe ynriimruw achiiniiva ichii emanghuwpa.

Pitar ing Jesu chu Khrista va taka ariir

¹³ Jesu ing Kesaria Philipi paam nache ahungsirae ama ing asebok ae ningna asii, “Mee aencha Mee Sapa i achuwva ta aeka ariirnah ae?”

¹⁴ Enuw ing enriir, “Achuw yngkheh ing Baptis Johon vachii, achuw yngkheh ing Elija vachii, areh aenche Jeremia chuva amanche Thangnang Jaephar chuva ta eka ariirnah ae.”

¹⁵ “Nenuw incha ki i achuwva ynchiinahchuw?”

¹⁶ Simon Pitar ing abasang, “Iring Thangnang sapa Khrista chuvachii.”

¹⁷ Amana Jesu ing Pitar ningna abasang, “Simon Bar-Jona, nang saknachii! Havi laaruw hakchaang re sii ing naninga imanriir vachii chongmahva, changvakonchu havi chuve thangbaenna ong kapa ning-taniiva.

¹⁸ Amatah nache naningna kariirnah amachuve nang i Pitar vachii, hava rung takline ki karuwrthiing mangiirva kata, amachu ithii ruwreng inche utaenkho chehmahnii.

¹⁹ Ki ing thangbaen iruwng lipah longtingchu naningna pivakachii; laaruw paamna nang ing naphuwpchu thangbaen nakho ynphuwp vaata, amanche laaruw paamna nabathenchu thangbaen nakho ynthen vaata.”

²⁰ Ama aanuwnache Jesu ing asebok ae ningna ki i Khrista chuva ichii achuw ningnakho riirmahdehruw taka ajeerpa.

Jesu ing Ijachaam Phavachii vokhehkho Thikvachii maen ing Ajeer

²¹ Amanache basenka Jesu ing asebok ae ningna isajaeh ing ariirpa, “Ki Jerusalem ting siningka upa ae, aanchung jaethiim ae amanche thiimthang ae kikna ijachaam aajaeh kakhaang inuwna ithehvaatae, changvakonchu aanuw inii nithum nache hangring vakata.”

²² Amana Pitar ing Jesu chu ruwka arakuh, “Aafhuw, Thangnang ing rumahnii, ama changchiichu naningna utaenkho suwhmahnii.”

²³ Jesu ing Pitar ningting vaanlehka ariir, “Umlae, katuknung ting ong! Nang ing kama namansiknah, akhaechuve nang ing namanden ive Thangnang tanii mahva, laaruw paam taniiva.”

²⁴ Amana Jesu ing sebok ae ningna ariir, “Achuw yngkheh ing kaanuw jiiningka tanave, ataksah ing ynjuursa rasiing, vokhehkho akhros chu idomsana ijiirasii.

²⁵ Achuw yngkheh aringkum karningka achii mee inche imaangchu phavaata; changvakonchu ki kakhaena aringkum imaang mee chuve iringchu phavaata.

²⁶ Achuw yngkheh ing laaruw paam vakhae phakhang nakho, alaetha mamaang nacha ynchii kaaniivaate?

²⁷ Mee Sapa inche ampa aruwreng thoh, avaarmee aethoh ajuwnglaenche, mee vakhae ing ama ama ing atu ari inuwzii ing nongmen phasa vaata.

²⁸ Ki ing neningna atatak ing kariirnah, havane mee topoh ingiir ae i Mee Sapa ing aaruwng lipah thoh ijuwngchu emumahtaang ithiichu mumahnii ae.”