METHIU 13 - ITHAR CHONGHAK

Sachii Ivorna Ynghuwnii

¹ Ama inii nache Jesu ing een tanii hungsuwhka chifhuw kuurting vaksa.

² Ama mapham nache akuurna mee inempak avaangkong tahnache Jesu ing ruwkuwngna hangkarka ngiirsa; changlaenche mee vakhae ing chifhuw kuurnache ingiir ae.

³ Amana Jesu ing thamin atongthoh ynruw ing manchuw aeka eningna ariir, “Mee yngkheh ing sachii ivor hungsuwhsa,

⁴ ama ing sachii avorlae lam kuurna ibuwchu vaati ing asahpa.

⁵ Sachii areh inche rung kaarna bukka abur adongkhroh tahnache imaenhak ing hangmuwng khangnakho

⁶ inii ynsa ing deengka manvuwsa, vokhehkho arajung paecheh mahka chongsa.

⁷ Sachii areh inche iring kaarna bukka iring inche aabuum tahnache ynla chehmahsa.

⁸ Sachii areh ingve ruwruw isana bukka isajaeh ing hang-muwngka sarup chaama, somruk, vokhehkho sarup somthum ithi ing ynlana.”

⁹ Aana ipaar mee chaap inche siisa rasiing.

Ynghuwnii thamin khaena Amanden

¹⁰ Amana sebok ae ing Jesu ningna ensii, “Ynchii khaena eningna yng-huwnii thamin ing natongva.”

¹¹ Jesu ing eningna abasang, “Ithuwhpak Thangnang lipah chong havi neningna chembe amandangpa, changvakonchu eningna chembe pimahri ae.

¹² Adeen mee ningna inempak adeennii ing pivakata; amanche adeenmah mee ningtanii chuve adeensah topohti chukho rivakata.

¹³ Ki ing eningna ynghuwnii thamin ing katong havi en-khang ae nakho mumahnii ae, rungae vaatae changvakonchu siimahnii ae amanche ynghuwkho manghuwmahnii ae.

¹⁴ Jaephar Isaia ing ajeerchu entaklina suwhna amachuve: ‘Enuw ing rungae chuve rungaevaatae, changvakonchu manghuwmah niiae, enuw ing enchuve envaatae changvakonchu mumah niiae.

¹⁵ Akhaechuve embarungriir musa vokhehkho engana pirsa, amanche emik engasiingpa; changmah nave emik ing muae naka, engana ing siiae naka, embarungriirna manghuw ae naka, vokhehkho kaningting hunganleh ae naka, amanche ki ing enuwchu mandamva kachiipae.’

¹⁶ “Changvakonchu nenuw chuve aajaehmeh nenlaepah isava! Ne-nuwve nemupa, amanche isiikho nensiipa.

¹⁷ Ki ing neningna atatak ing kariirnah, Jaephar aajaeh ing vokhehkho Thangnang mee aajaeh ing nenuw ing nemu havi munungka enchii muchehmah ae, amanche nensii chong havi siinungka enchii siichehmah ae.

Jesu ing Sachii ivorna Ynghuwnii ing ariir

¹⁸ “Chutahnache sachii ivor thamin havi rungaeruw.

¹⁹ Achuw yngkheh ing iruwng lipah chong havi siikhang nakho manghuwmah nave, ichamah thengka abarungriirna avorchu asiihpa; haviva lam kuurna sachii ynvorchu.

²⁰ Rung kaarna sachii ynvor chuve, ama ing chongchu asiithoh rotharohpak ing anikungna aaraangpa.

²¹ Changvakonchu arajung ithuwh ing apaehmah tahnache among pangteh khaena abadaar. Chutahnache havana chong khaene inangnii abasuw raenche ama ing anikungna abathenpa.

²² Iring kaarna sachii ynvor chuve, isa chongchu asiipa, changvakonchu laaruw paam vakhar re lerchii yndik ing chehka ynlachehmah chuva.

²³ Ruwruw isana sachii ynvor chuve chongchu siika amanghuwsa, amanche sarup chaama, somruk, vokhehkho sarup sothum ynlana.”

Ichuwr muwna Ynghuwnii

²⁴ Jesu ing eningna reentaang thamin yngkhehkho atong amachuve, “Thangbaen paam i mee yngkheh ing isa sachii avorthoh yndeeng arusa.

²⁵ Changvakonchu mee aenche enjaarthir aajeehnii mee ing thengka akaarna ichuwr amuw vorka yngkaesa.

²⁶ Chukhaenache hangmuwngka aanlarae ichuwr thoh hangmuwngsa.

²⁷ Amana ameenae aeng theng aeka aningna enriir, ‘Aafhuw naruwraena isa sachii vormah chiikhang? Ynsaang taka ichuwr ynvaeva?’

²⁸ Jesu ing eningna ariir, ‘Havi ki eejeehnii mee aeng atupae.’ Amana meenae aeng embasang, ‘Chunuwcha vaknungka ichuwr chaap vaaphichir kente?’

²⁹ Changvakonchu ama ing ariir, ‘Iphimah riruw,’ ichuwrchu kenga-phinah tatanuwka gehu burkho iphiniiva nenta.

³⁰ Khangkhe ichii ing muwnghak jaehtah ae rasiing, ikuumpha inii nache ki ing aakuum ae ningna ichuwr aekha ynthufhuw ing amaensana khuum nuwna phuwpruw, changvakonchu gehu chuve ki kaatomting thinruw tavakata.”

Encham muwna Ynghuwnii

³¹ Jesu ing eningna reentaang thamin yngkhehkho atong, “Thang-baen lipah i mee yngkheh ing encham muw avorthoh aanghakna;

³² havi sachii kaarna aasiingsehva, changvakonchu ahangmuwng raenchembe hangruungka thingbur vaang ruungna, amanche vaati aeng enrabuw enghuwniinah.”

Chor taklina Ynghuwnii

³³ Jesu ing eningna thamin reentaang yngkhehkho atongreeh, “Thangbaen lipah i rupanuw yngkheh ing jaamchu sarup ynthum chor thohche manvaenohka ahangpuur mahtaang athuur thoh aanghakna.”

Jesu ing Ynghuwnii thamin ing Ichong

³⁴ Jinge ichii ing Jesu ing eningna chong aangkheng ynghuwnii thamin ing atong; ynghuwnii thamin ynvaeru ing yntanga chongmah.

³⁵ Havi Jaephar ing ariir chongchu isuwhnii khaena ariirva, “Ki kaner ing thamin tongva kata, laaruw paam abasenraennii ing yndangmah ithuwh chong aangkheng riirva kata.”

Jesu ing Ichuwr omna Ynghuwnii ariir

³⁶ Aanuwna Jesu ing mee vakhaechu maka een sungting varuwhsa, amana asebok aeng theng aeka Jesu ningna enriir, “Ruwraena ichuwr om thamin natong khaenakhe isajaeh ing iriirpeehra.”

³⁷ Amana Jesu ing enuwchu basang-ka ariir, “Isa sachii avorchu Mee Sapa chuva;

³⁸ ruwrae inche laaruw paam iva; amanche isa sachii inche iruwng lipah siti aepae; ichuwr inche ichamah siti aepae,

³⁹ amanche ichamah avorchu umlaeva; ikuumpha ahenpha inche laaruw paam hungchi ynthongva amanche aakuum mee aechu vaarmee aepae.

⁴⁰ Ichuwr khuum aeka embathu vaangkhe, laaruw paam achipha nache changche suwhvaata.

⁴¹ Mee Sapa inche avaarmee ae jenchiir vaata, enuw ing isii atu mee ae vokhehkho ichamah mee vakhae khuum vaatae.

⁴² Amana enuwchu mi sungting renvaatae; amanache enuw ing chapvaatae vokhehkho engha iriir ae naka ijachaam phavaatae.

⁴³ Chang-laenche Thangnang mee aenche iruwng lipahna inii irengvaang rengvaatae. Aana ipaar mee chaap inche siisa rasiing.”

Ynthuurjaehka om Lerchiina Ynghuwnii

⁴⁴ “Thangbaen lipahchu ruwraena lerchii yndimka omthoh aanghakna, amachu mee yngkheh ing atuwhtahna mangkhum jaehka arutha iroh ing yngkaeka adeensah aangkheng juwrka ruwraechu aariithoh ynghakna.”

Amen Iruwpak Rungna Ynghuwnii

⁴⁵ “Athar vokheh, Thangbaen lipah-chu amen iruwpak rung ajong lerchii ataar mee yngkheh thoh aanghakna,

⁴⁶ ama ing amen iruwpak rung yngkhehchu atuwhpa; amana yngkaeka ama ing adeensah aangkheng juwrka amachu aariipa.”

Ichakna Ynghuwnii

⁴⁷ “Athar vokheh, thangbaen lipah-chu ngaklah aeng chifhuwna ichak deeng aeka nga masing ikip inempak ahengkhum pohthoh aanghakna,

⁴⁸ ichakchu sipka taangting aheng-kipae; amana ong aeka isa chaapchu khutheengna enthinpa changvakonchu isamah chaap chuve enrenpa.

⁴⁹ Chang-che ichii ing laaruw paam ikho achipha nache suwhvaata. Vaarmee aeng juwng ae naka isa mee ae kaartanii isamah mee aechu iteervaatae,

⁵⁰ amanche isamah vakhaechu mi sungting renvaatae; amanache chapvaatae vokhehkho engha iriir vaatae.”

Ithar Ichum re Baruw

⁵¹ “Hava vakhae i nemanghuwpe?” Enuw ing Aafhuw kemanghuwpa ta aeka embasang.

⁵² Amana Jesu ing eningna ariir, “Chukhaenache thang-baen lipah khaena kasebok ynsuwh thiimthang ae chaap ing endeen vakhae itharkho amanche baruwkho ahemandang eensung aafhuw thoh aanghakva.”

Nazaret na Jesu Enrumah

⁵³ Jesu ing thamin itong amanchi-dehna ympeenka

⁵⁴ ama ing aongnii paam tungka meekongnii nache mee aechu amanchuw, amana enuw ngik aeka enriir, “Hava mee inge hangjaeh ising iveer i vokhehkho mee ing atuchehmah nong atu havi utanii aphava?

⁵⁵ Atak chuve thing ichar nongtu siti khamah vakhang? Amnuw ruming Meri mahvakhang? Jems, Josep, Simon vokhehkho Judas aekha anaemah paekhang?

⁵⁶ Amanche asar ae chukho inuwthoh onghakmah muwkhang? Chunuwcha hava vakhae i ama ing utanii aphava?”

⁵⁷ Changche ichii ing Jesu enrumahchu emandang. Changvakonchu Jesu ing eningna ariir, “Thangnang jaephar i reentaang paam navaang akhuwsung mee vokhehkho a-eengkuw mee ae rap ingkho teenmah ae.”

⁵⁸ Enuw ing aningna enthachamah khaenache, Jesu ing ama mapham nache iruungpak nong inempak tumah.