METHIU 11 - ITHAR CHONGHAK

Baptist Johon tanii Chong Ijeermee ae

¹ Atii Jesu ing asebok suum ariinii ae ningna chong ariir amanchichakna, ama denchu bathenka ynneengna om khuwveen nache mee ynchuwpeehnii khaena vokhehkho itongpeehnii khaena sisa.

² Changlae Khrista ing nong atu chaapchu kaeshumna ong Johon ing asiitah nache, asebok meeniimeh avechiirpa.

³ Enuw ing Jesu ningna ensii, “Nang i juwngva chiichu vachii, changmahka kenuw ing reentaang yngkheh hahva kenchiiva?”

⁴ Jesu ing eningna abasang, “Nenuw yngkae-nuwna nensii vokhehkho nemu vakhae havi Johon ningna tongruw:

⁵ Mikchu ing amupa amanche khibong ing isi achehpa, ynchor aenche manthiingsae vokhehkho naaseeh inche asiichehpa, ithii aechu hangringsae amanche isa chongchu sara ae ningnache yntongsa.

⁶ Kataklina fhuwm ynvaemah meechu bor aphava.”

⁷ Johon sebok aechu engaangkae inuwnache, Jesu ing Johon khaena ichongchu mee vakhae ningna abasenpa: “Ynchii imunii khaena nenuw ing lamkangna ivasi vachuw? Siiraang ing amanlaap fuwr chuva?

⁸ Changmahka ynchii imunii ing ivasi vachuw? Mee yngkheh ing ynnaarjaeh peendiir ynthongchu nenva enva? Chumna changvakonchu ynnaarjaeh peendiir ing ynthong mee aekha iruwng ae een nache ongnae.

⁹ Kaningna riirruw, ynchii imunii inche ivasi vachuw? Jaephar chuva? Chumna, changvakonchu nenuw ing nemupa, atak i jaephar chungna ruungna.

¹⁰ Akhaechuve akhaena ynziihka omna: ‘Enruw, ki ing nemaana kachong ijeermee yngkheh kajenchiirsa, ama ing nemaana nenlam heseem vaata.’

¹¹ Ki ing neningna atatak ing kariirnah, rupanuw ing abaring kaarna Baptis Johon chungna iruungseh hungsuwh mahri. Changvakonchu thangbaen iruwngpaamna aasiingseh inche Johon chungna athiseh ing ruunghakna.

¹² Baptis Johon aaniina ing basenka atanii ipha inge thangbaen iruwngpaam i ruwreng ing asuwrnah, vokhehkho ensuwr mee aenche siih aeka enrinah.

¹³ Akhaechuve Jaephar ae vokhehkho Mosi vajeer chonghak inche Johon aanii ipha inge iruwngpaam khaena chongnae;

¹⁴ amachu nenuw ing runungka tatanuwve, jungtheng vachii Elija chu atak iva.

¹⁵ Isiinii aana ipaar mee chaap inche siisa rasiing.

¹⁶ “Changvakonchu ataen siimnii suwnthar sitiae i ynchiithoh mandeeng kate? Enuw i kithiirna naepang ae ong aeka embarakfhuw engarang engeenthoh aanghakna.

¹⁷ Amachuve, ‘kenuw ing nakhaena seemruwr kentumnah, changva-konchu nang laammahchii; kenuw ing naning kemansiknah, changvakonchu nabarungriir jamah.’

¹⁸ Johon ing isahnii khaena juwngmah, chukhae-nache enuw ing atak i umlae adeensa enchiinah.

¹⁹ Mee Sapa inche saka inka thengsa, chutahnache enruw kaaraam aere juw in, ree ikhuum mee ae vokhehkho isii icher ae engarang chuva ta aeka enuw ing enriirnah; changvakonchu anong inche chumna taka amandangpa.”

Thacha omah Khuwruung

²⁰ Aanuwchak nache ama ing isuwh-mahri nong aajaeh atunii khuw aechu ynchah ahenbasenpa, akhaechuve enuw embarungriir huungmahdehsae.

²¹ “Nakhaena aajaehmeh ijaaniivaate, Korazin, nakhaena ijaniisapa Betsaija, mee ing atuchehmah nong aajaeh nakhaena yntu vakhae havi Taire re Sidon paamna vanave, peendiir asii niiae naka vokhehkho rungvuwh yntaeh ae naka embarungriir huungva chiipae.

²² Chukhaenache neningna kariirnah, vajeer inii nache nenuw ithi ing Taire re Sidon ing ningchuwh phaseh vaatae.

²³ Kaparnaum nangve, nataksah ing thangbaen ipha ing ynthoh saning nachiiva? Nang chuve ithii lipah ipha ing jungbuk vaanta. Nakhaena mee ing atuchehmah nong aajaeh yntu i Sodom na isuwh vanave, atanii ipha ing Sodom paam omjaeh vachiichu!

²⁴ Chukhaenache naningna kariirnah, vajeer inii nache nang ithi ing Sodom paam inche ningchuwh phaseh vaata.”

Kaningting Huungnuwna vokhehkho Nenja Basumruw

²⁵ Apha ichiinache Jesu ing ahemandang, “Laaruw thangbaen Aafhuw Apa, nangchu kaman-pahnahchii, nang ing hava vakhae i ising aere aanghuw mee ae taklinache thuurchiika amanche aanghuwmah ae ningnache namandangpa.

²⁶ Apa chumna, havi inge nang namanden chuva.”

²⁷ “Aangkhenglaang kaningna kapa ing ymmansirpa, ampa mahnaka asapa chu achuw ingkho manghuwmah, vokhehkho asapa mahnaka ampa chu achuw ingkho manghuwmah, amanche asapa ing mandang ningka achii meening nachen mahnaka achuw ingkho ampa chu manghuwmah.”

²⁸ “Ijapak ing nong tuchuwka vokhehkho peehrik nenreen nenuw vakhae kaningting huungruw; ki ing nenja basumpeeh vakachuw.

²⁹ Kariingkor rinuwna niiruw vokhehkho tamruw, akhaechuve ki duwrning vokhehkho ynjuursaning, amana chembe nenlaetha jabasumnii phavanenta.

³⁰ Akhaechuve kariingkor chuve laena vokhehkho jaangna.”