MAAK 8 - ITHAR CHONGHAK

Mee Lising Manrii Amamaar

¹ Apha aasenru ing aanuwnache mee vakhae ing athar vokheh vaangkongreehsae. Changlaenche ensahfhuw omahsa, amana Jesu ing asebok aechu akuurting ve-een aeka eningna ariir,

² “Havana mee hangjaeh i kaning amanchuwhnah ae, enuw ing kakuurna engongnii inii nithumchak ahenphapa, ensahfhuwkho yntanga omahsa.

³ Ki ing enuwchu enven ichaam ing engeenting mangkae ae ningve lamlah tanii mee topoh ynvaepae khaka, lamna venchaam ing itiih ynvae vaatae.”

⁴ Sebok ae ing Jesu ningna embasang, “Hava pammfhuw nenche achuw ing enuw hangjaeh ichu thaemin pichehva takhang?”

⁵ Jesu ing tar aajaeh nenchisa taka asii ae. “Sariimeh kenchisa,” ta aeka embasang.

⁶ Amana Jesu ing mee vakhaechu ruwruwna ongruw taka ariir; amanche Jesu ing tar sariichu verika, Thangnang amanpah thoh ynruw ing tarchu bakhiika, mee vakhae ningna semruw taka asebok ae ningna jepika, amana enuw ing tarchu ensempa.

⁷ Nga isiing topoh enchi chukho Thangnang manpahka, amana mee vakhae ningna semruw taka asebok ae ningna ariir.

⁸ Amana enuw ing enven ynva ing ensahpa; abariichu emangkong tahnache buruk sarii sipsa.

⁹ Amana asah mee aechu mee lising manrii vakhaepae.

¹⁰ Amana Jesu ing enuwchu amangkae aethoh ruwkuwngna Dalmanutha ichii paamting asebok aethoh sisa.

Laetho Yndang Enjong

¹¹ Pharisi aeng Jesu chu chaang ennii khaena thangbaen tanii laetho yndangnii aningtanii jong aeka vokhehkho chong hensii vesii embasen.

¹² Changvakonchu Jesu ing abarungriirna abuw nakka ariir, “Hava suwnthar siti aenge ynchii khaena laetho yndangchu ajongpae? Ki ing neningna atatak ing kariirnah, amachuve, hava suwnthar siti ae ningne laetho mandang mahning.”

¹³ Ama ing enuwchu maka athar vokheh ruwkuwng ting hangkarka chifhuw laar kahsa.

¹⁴ Amana enuw ing tar ichi embahirpa, changvakonchu enuw ing ruwkuwng sungna tar yngkhehpang chuve enchi.

¹⁵ Amana Jesu ing eningna chonghak apeeh ae, “Ynriim-ruw, vokhehkho Pharisi aere Herot chor khaena ynriimruw.”

¹⁶ Enuw ing tar enchimah khaenache yngkheh yngkheh chong emanseer.

¹⁷ Amachu Jesu ing amanghuw tahnache eningna ariir, “Nenuw ynchii khaena tar chimahsung tachuwka nemanseerva? Nenuw ataraen phanii ing nemanghuw mahriva? Nenuw nenbarungriir aajaehmeh ipirva?

¹⁸ Nemik ombroh ing nemumahva? Nengana ombroh ing nensiimahva? Vokhehkho nenuw nengaansiimahva?

¹⁹ Ki ing mee lising runga ae khaena tar runga kabakhiirae, buruk ajaeh-chak ynrii nemangkong?” Suum ariinii ta aeka embasang.

²⁰ Amanche mee lising manrii khaena tar sarii kabakhii raencha, baruk aajaehchak ynrii nemangkong? Sariimeh ta aeka embasang.

²¹ Amana Jesu ing eningna ariir, “Ataraenpha nenuw ing nemanghuw mahriva?”

Betsaida na Mikchu Amandam

²² Enuw ing vasi aeka Betsaida tungsae. Amana heong topoh aeng mikchu mee yngkheh veruw aeka atakchu iparnii khaena Jesu ningna enthamsah.

²³ Jesu ing amik ichuchu akikna bachuwka khuwsung tanii aruwpa, amana amikna bachirka vokhehkho ataklina akik asiih inuwna asii, “Ynchii namusa?”

²⁴ Ama ing hengenka ariir, “Ki ing mee ae kamusa; changvakonchu enuw ae i thing pangeng ichii ing hungsi vasi entu ing kamusa.”

²⁵ Amana Jesu ing athar vokheh amikna akik ynnii ing parka a-enteeh tahnache damsa vokhehkho peehchae aangkheng iseengkiir ing amuchehpa.

²⁶ Amana Jesu ing ama meechu eenting mangkaeka ariir, “Khuwruung sungting hungruwh mahra, vokhehkho khuwruung sungna achuw ningnakho riirmahra.”

Pitar ing Jesu chu Khrista chuva taka Ariir

²⁷ Jesu ing asebok aethoh Kesaria Philipi paam thoh ynneeng khuwsung henjii aeka hungsiae; amana lam nache Jesu ing asebok ae ningna asii ae, “Mee aeng ki i achuwva ynchiinah ae?”

²⁸ Enuw ing embasang, “Baptis Johon; areh aeng Elija; amana areh aenche jaephar yngkheh vachii enchiinah.”

²⁹ Jesu ing eningna asii ae, “Nenuw incha ki i achuwva ichii ing ymmanden nahchuw?” Pitar ing Jesu ningna abasang, “Nang i Khrista chuvachii.”

³⁰ Amana Jesu ing achuw ningnakho iriir rumahnii taka ipirpak ing ajeer.

Jesu ing Ijachaam phanaka Thikvachii Ajeer

³¹ Jesu ing Mee Sapa i ijachaam inempak phavaata, aanchungpuh ae, aanchung jaethiim ae vokhehkho thiimthang aeng rumah ae naka atakchu thehvaatae, amanche animan-thumnii inii nache hangring vaata taka eningna ynchuw abasenpa.

³² Hava chong i Jesu ing eningna isajaeh ing ariir. Amana Pitar ing Jesu chu ruwka arakuhpa.

³³ Changvakonchu Jesu ing hunganlehka asebok aechu amuthoh, Pitar chu rukuhka aningna ariir, “Umlae, katuk nungting ong, nang i Thangnang khaena mandenmahchii, mee khaenapang namandensa.”

³⁴ Amana Jesu ing asebok aethoh ynruw ing mee vakhaechu eenka eningna ariir, “Achuw yngkheh ing kaanuw jiining tanave, ataksahchu ynrumah rasiing vokhehkho ataksah khros idomsana kaanuw ijiirasiing.

³⁵ Achuw yngkheh alaetha karningka achii mee chuve maangvaata, changvakonchu achuw yngkhehchu kakhaena vokhehkho isa chong khaena alaetha maangnave ikarpeeh phavaata.

³⁶ Laaruw paamna om peehchae aangkheng deenkhang nare, alaetha maangnacha ama ing ynchii atuungsahse?

³⁷ Vokhehkho ama ing alaethachu ynchiithoh amanteh chehse?

³⁸ Ichuwhmah ing vokhehkho isii icher ing isip suwntharne, achuw yngkheh ing kakhaena vokhehkho kachong khaena aning manjak nave, Mee Sapa ing alaar isa thoh ynruw ing, ynthiing vaarmee aethoh ajungthenglaenche ningjak phavaata.”