MAAK 7 - ITHAR CHONGHAK

Fhuwven ae Purah Chongjeer

¹ Jerusalem tanii itheng Pharisi aere thiimthang topoh aeng Jesu kuurna empurlae,

² Jesu asebok aeng engkik chaamru ing imaar aechu enuw ing emu.

³ (Akhaechuve Pharisi ae vokhehkho Jehudi ae ing fhuwven ae purah chongjeer vakhaechu engahthernii khaena enuw ing engkik chaamru ing thaemin samah ae;

⁴ enuw ing kithiir tanii enghuungthoh ynchaammah ae nave thaemin samahchak ae; vokhehkho reentaang ynjiifhuw omna, amachuve kam vokhehkho bukam jaekhi chaamchak vachiipae.)

⁵ Amana Pharisi aere thiimthang aeng Jesu ningna enriir, “Nang nasebok ae i fhuwven ae purah chongjeer derna siru aeng engkik chaamru ing thaemin ensah i ynchii khaenava?”

⁶ Jesu ing ariir, “Isachaang nentu nengkhaena Isaia ing amanthang vasah ynziihka omna: Mee ae inge ener pang ing eejanah ae, changvakonchu embarungriir chuve kaningtanii yndahpak ing omnae.

⁷ Laaruw mee purah chongjeer vakhaechu Thangnang chonghakva ichii ing mee aechu manchuw aeka, Kichu aruwh thangsii ing ynrumnah ae.

⁸ Nenuw ing Thangnang vajeer chonghakchu bathen chuwka, nenpurah chongjeer chuve nemanjiinah.”

⁹ Amana Jesu ing eningna ariir, “Nenuw ing ajaennii nenpurah chong-jeerchu nengah thernii khaenache Thangnang vajeer chonghakchu rumah sachuw.”

¹⁰ Mosi ing ariir chuve, “Nangnuw nangpa ijaara, achuw yngkheh ing amnuw chang-mahka ampa taklina siraap pinave, ataklina isii ikha bukvaata achii;

¹¹ changvakonchu nenuw ingve, ‘Mee yngkheh ing amnuw ampa ningna, kaningtanii nang ing ikanii ipha aruchu Korbaansa, (amachuve Thangnang ningting ympisa) tachuwka,

¹² nenuw ing amnuw ampa khaena ynchii yngkheh ibomnii khaena manrumah sachuw,

¹³ Changche ichii ing nenuw ing ajaennii nenpurah chongjeer amakha nemanjiijaeh tahnache Thangnang vajeer chonghakchu manjiimah sachuw. Jinge ichii ing nenuw ing ajaenkho nentusa.’ ”

¹⁴ Amana Jesu ing vaanlehka mee vakhae ningna ariir, “Nenuw vakhaeng rungaeruw, vokhehkho manghuwruw;

¹⁵ taangtanii jungruwh ingkhe mee manchohmah, sungtanii hungsuwh ing meechu amanchohnah.”

¹⁶ “Achuw yngkheh isiinii aana ipaar mee inche siisa rasiing!”

¹⁷ Amana mee vakhaechu maka een yngkheh ting varuwhsa, changlae asebok aeng thamin atongchu ynchii nachiiniiva ta aeka ensii.

¹⁸ Jesu ing eningna ariir, “Nenuwkho reentaang mee ae vaang nemanghuw mahva? Taangtanii ing sungting jungruwh ingkhe mee manchoh chehmah;

¹⁹ changvakonchu ijungruwh chuve barungriir sungting mahva, venting jungruwhka taangting suwhna ichii nemanghuw mahva?” (changche ichii ing isahfhuw thaemin chaap ynthiingva taka Jesu ing ariir.)

²⁰ Amana Jesu ing ariir, “Mee yngkheh barungriir tanii ihungsuwh ingkhe meechu amanchohnah.

²¹ Akhaechuve laaruw mee barungriir tanii ing isamah chaap ihungsuwhva amachuve, naamak itu, lamruw, miktheh,

²² reentaang rumee fhuwsar taklina ichuwhmah atu, ikaam, ichamah chaap, mare itu, lamchat omah, sehmaner om, ichummah ing ichong, ynding, ipang, hava vakhae i hungsuwhna.

²³ Havana ichamah aangkheng inge barungriir tanii hungsuwhka meechu amanchohnah.”

Phonisia Rupanuw Athacha

²⁴ Aanuwnache Jesu ing hangiirka Taire re Sidon paamting sisa. Amana Jesu ing een yngkheh nache varuwhka achuw ingkho amanghuwmah rasiing takhang nare ynthuur chehmahsa.

²⁵ Changvakonchu umlae ing ichuwng rupanuwti amnuw ing Jesu khaena asiithoh vathengka Jesu khi derna vatiihsa.

²⁶ Hava rupanuw i Sairia paam ing akuwm Phonisia tanii Grik meeva. Sanuw inche asiti rupanuwti taklina ichuwng umlaechu ithurpeehra taka athamsah.

²⁷ Jesu ing sanuw ningnache ariir, “Amaensana naepang ae enven bavajap rasiing, naepang ae sahfhuwchu siih manuwka uti ting ipeeh sakmahnii.”

²⁸ Changvakonchu sanuw inche Jesu ningna abasang, “Chumne, Aafhuw, thaemin isahnii derna isahfhuw ynta rapkho uti aeng ensahnah.”

²⁹ Jesu ing sanuw ningnache ariir, “Nariir chong havi khaene nang yngkaera; nasiti rupanuwti ningtanii umlae kho taang suwhsa.”

³⁰ Sanuw inche yngkaeka een ahungtung tahnache, asiti inche ijaarniina hengantorka vokhehkho ataklina umlae ichuwngchu taangting isuwh ing aantuwhfhuwpa.

Naaseeh re Achong Isuwhmah Amandam

³¹ Aanuwna Jesu ing Taire paam-ting athar vokheh hunganrika, Sidon arikna ing Galili chifhuw ipha ing sika Dekapolis paam tungsa.

³² Amana enuw ing Jesu ningting aana iseeh vokhehkho achong ynghah mee yngkheh veruw aeka Jesu ningna ataklina nakik isiipeehra ta aeka enthamsah.

³³ Jesu ing ama meechu mee vakhae kaartanii ynruwhjaeh ing ruwka, amanche aana nache akikchar ing sinka, bachirka, vokhehkho abarina aparpa.

³⁴ Aanuwnache ama ing thangbaen hengenka aningnache ariir, “Ephaphata,” amachuve, “Ymmong rasiing achiiniiva.”

³⁵ Amana aanachu ymmongsa, abarikho abathahchehpa, vokhehkho isajaeh ing ichongkho achehpa.

³⁶ Amana Jesu ing achuw ningnakho entongniimah ing eningna ipirpak ing ariir. Changvakonchu mee ningna aajaeh tongmahruw takhang nakho, enuw ing mee ningna athisehseh ing enriirpa.

³⁷ Amana enuw ariirfhuwchah ing ngik aeka enriir, “Ama ing nong aangkheng isapak ing atupa; aana iseehkho asiipa amanche achong isuwhmah chukho suwhsa.”