LUK ING ABAZIIH ISA CHONG 8 - ITHAR CHONGHAK

Jesu Abom ae Rupanuw

¹ Havi aanuwna Jesu ing khuw-ruung khuwruung ting, vokhehkho khuw khuw ting sika Thangnang iruwngpaam isa chongchu tongka vokhehkho manchuw aeka asiraenche asebok suum ariiniiae,

² amanche isamah laetha ing ichuwng vokhehkho ina amandam rupanuw ae chukho Jesu thohche ynruwhakpoh ae: Enuw chuve, ynthiingmah laetha sarii-meh ing ichuwng athurpeeh Meri Magadalen,

³ amanche Herot rukuum atu Kuza rumee Johanna, Susanna amanche aanem chuve reentaang tanii rupanuw ynvae ae; enuw vakhae aenge endeensah lerchii ing Jesu nongna abomsah ae.

Sachii Ivorna Ynghuwnii

⁴ Jesu ningnache khuwruung chaap tanii theng aeka mee inempak engaang-kong tahnache, Jesu ing ynghuwnii thamin ing ichong,

⁵ Sachii amuw vorvachii mee yngkheh inche amuwchu ivornii khaena hungsuwhsa; ama ing amuwchu avortah nache lamfhuw kuurna bukka mee aenche engkhi ing enchaniipa, vokhehkho vaati aengkho ensahpa.

⁶ Amanche areh inche rung kaarna bukka ahangmuwng tahnache chongsa, akhaechuve ruwruwchu isa vaehsa.

⁷ Amana areh inche iring kaarna bukka imuwngcha hangmuwngka iring inche ibuumka ihangmuwng chehmahsa.

⁸ Changvakonchu areh chuve ruwruw isana bukka hangmuwngsa, vokhehkho asae chaama athi ing ynlasa. Hava vakhae i ariirnuwna Jesu ing uungka ariir, “Achuw yngkheh aana ipaar chaap inche siisa rasiing.”

Ynghuwnii thamin khaena Amanden

⁹ Jesu asebok aenche aningna ensii, “Havana ynghuwnii thamin i ynchii nariirniiva?

¹⁰ Jesu ing basang aeka ariir, ‘Thangnang iruwngpaam ithuwhpak chongchu neningna kapeeh-vachuw; changvakonchu reentaang mee ae ningna chembe ynghuwnii thamin vatah, chutahnache enuw ing emubrohna emuniimah ing amanche siikhang ae nare emanghuwniimah ing katongva.’ ”

Jesu ing Sachii ivorna ynghuwnii ing Ichong

¹¹ Atii haviva ynghuwnii thaminchu: Sachii amuw inche Thangnang chong chuva.

¹² Lamfhuw kuurna ibuw ae chuve chong asii mee ae chuva; amachu aanuwna umlae ing vathengka enthacha niimah ing vo-khehkho ikarpeeh emphaniimah inche embarungriir sungtanii chongchu avaripa.

¹³ Rung taklina ibuw ae chuve, chongchu sii aeka rotharohpak ing engaraangpa, changvakonchu arajung apaechehmah tahnache apha topohpang tina thacha aeka batheem atheng raenche tiihsae.

¹⁴ Iring kaarna ibuw ae chuve, enuw ing siiaeka enring kumpumna hungpaarniiva enchii emanden, vokhehkho laaruw paam rotharoh kuurva inche cheh aeka engaanla changcheh mahsa.

¹⁵ Amana laruw isana ibuw ae chuve, chongchu siiaeka isapak barungriir thohche icheepther ing bachuw aeka aanlamahri raentaang abadaarcheh chupae.

Buruk derna Jaemi

¹⁶ “Achuw ingkho jaemi barengka buruk ing mangkhum chakmah, changmahka rukhum derna siimahchak, changvakonchu ivaruwh mee aenche irengchu imunii khaena asiihnii nache asiihnah.

¹⁷ Akhaechuve yndangrudeh ing ynthuurcheh vachii ynchiikho omah, vokhehkho manghuwru ing ynthuur naka yndangmah vachii yntangakho omah.

¹⁸ Chukhaenache nenuw ing ynsaangkhe nensiise tanuwna ynriimsaruw; adeen taklinache jepivakata, amanche adeenmah taklinache topoh kadeensa taka amanden sahrap chukho ripeehva kata.”

Jesu Amnuw re Anae ae

¹⁹ Havi aanuwna Jesu amnuw re anae aenche Jesu ningna vaksae, meechu anempak tahnache Jesu thohche yntuwh chehmahsae.

²⁰ Mee yngkheh inche aningna nangnuw re nanae ae ing taangna ngiir aeka nangchu yntuwhfhuw nungka ynchiinah ae taka ariirpa.

²¹ Changvakonchu Jesu ing eningna abasang, “Thangnang chongchu siinaka anong ing atu mee aechu ki kanuw chupae vokhehkho kanae chupae.”

Jesu ing Khuksuwr Siiraang Amandae

²² Inii nikhehna Jesu ing asebok ae thohche ruwkuwngna hangong aeka ama ing eningnache ariir, “Inuw ing chiiding veraen manuwka reentaang yngkheh minting sitaruw taka ariirtah nache, enuw ing ruw-kuwngchu enghuurpa,

²³ amana enuw ing changche envasiraenche Jesu jaardohsa. Changlaenche chiiding nache khuksuwr siiraang vetuka chiichu ynnohsa, vokhehkho chiichu ruwkuwng nache varuwhka phir isiipak inche omsae.

²⁴ Amatah nache enuw ing Jesu ningting huung aeka Aafhuw, Aafhuw, inuw thiklo ynchiinah! ta aeka enriirpa. Amana Jesu ing hangsuwka khuksuwr siiraang vokhehkho chii ynnohchu arakuhtah nache aaniimeh inche daerengsae.

²⁵ Amana Jesu ing eningna ariir, ‘Ne-nuw nenthacha chucha ukhava chang?’ Enuw ynchikkho ynchiksae, ingikkho ngiksae. Chukhaenache enuw ing yngkheh yngkheh chong aeka enriir, ‘Siiraang re chii aengkho chonghak apeehtahna emanjii Aafhuw havi achuwva.’ ”

Jesu ing Umlae ichuwng mee yngkheh Amandam

²⁶ Aanuwnache Galili thoh laar yndeeng Gerasani paam nache vatungsae.

²⁷ Amana Jesu ing avasitah nache ataklina ynthiingmah umlae ing ichuwng mee yngkheh khuwruung tanii hungsuwhka Jesu thohche yntuwhsae; amamee i apha iseehpak ing peendiir niiru ing vokhehkho een nakho ongru ing thaenkungna ongva.

²⁸ Chukhaenache ama ing Jesu avemutah nache va-uungka Jesu maanache vakhupka ipirpak ing ariir, athi omah Thangnang Sapa! “Nang ing kaningna ynchii tuningka nachiiva? Ki ing kathamsahnahchii, imanja samahra.”

²⁹ Havi ariir i ataklina ichuwng ynthiingmah umlae laethachu taangting asuwhnii khaena chonghak apeehtah nava. (Akhaechuve ynthiingmah umlae laetha inche atak i apha vakhaena asuwrva; vokhehkho mee aenche atakchu cheer aeka siir runoh ing phuwrkhang ae nakho amanche siir hang ing charkhang ae nakho ipehchir chakka ynthiingmah umlae laetha inche lampa kaarting aruwchakva.)

³⁰ Amana Jesu ing aningna ariir, “Naruming achuwva?” Karuming chuve inempak taka abasang. Akhaechuve ynthiingmah umlae laetha aenche ataklina chuwngsae.

³¹ Changlaenche ynthiingmah umlae laetha aenche Jesu ningna kenuw i idong naemah kuurdong tingche isinii khaena chonghak ipisamahra ta aeka enthamsahpa.

³² Changlaenche bungna voh inempak imaar ae; amana umlae aenche engkaar tingche ibathensara ta aeka enthamsah tahnache Jesu ing arupa.

³³ Changlaenche umlae aenche hungsuwh aeka voh ae kaartingche ruwhsae, amana voh aenche bung tanii jungtaen aeka chiiding ithuwh tingche ruwhchirsae.

³⁴ Amachu voh aacheer aenche emutah nache, khuwruung vokhehkho khuw sungting hungtaen aeka enriirpa.

³⁵ Amana changche isuwhchu mee aenche enva enpa, vokheh-kho Jesu abuum ipha ing vaksae. Changlaenche ynthiingmah umlae laetha aeng aningtanii isuwh mee inche peendiir niika abarungriir ichum inche Jesu buumna heong emutah nache ynchiksae.

³⁶ Chukhaenache ynthiingmah umlae laetha ichuwng pasar havi ynsaangkhe taka idamva ichiichu aamuw mee aenche eningna entongpa.

³⁷ Changlaenche Geraseni khuw akuur apaangna ongchaap mee vakhae ing yngkaenii khaena Jesu ningna enthamsahpa; akhaechuve enuw inempak ngiksae. Amatah nache Jesu ing ruwkuwngchu ongniika ynrisa.

³⁸ Aningtanii umlae ae isuwh mee inche Jesu naanuw jiisa kata taka athamsahpa; changvakonchu rumahka aningna ariir,

³⁹ “Na-eenting ynrinana Thangnang ing nataklina ynchii atuva ichiichu tongla.” Chutahnache ama ing khuwruung apaam lija aangkhengna sika Jesu ing akhaena aajaehmeh iruungpak nong atupeehva ichiichu atongpa.

Jairus Asanuw re Jesu Peen apar Rupanuw

⁴⁰ Atii Jesu ing ahunganritah nache mee inempak inche rotharoh ing enghebariimpa; akhaechuve mee vakhae ing Jesu alam enghengen.

⁴¹ Changlaen siimche Jairus ichii pasar yngkheh vathengsa, atakchuve meekongnii sungna vajeer ituna aafhuw yngkhehva; ama inche Jesu chu rumka a-eenting ivakpeehnii khaena athamsahpa;

⁴² akhaechuve asanuw kumsuum ariinii ahenpha yngkheh pangchu thik ynthongsa. Jesu ing avasitah nache mee inempak aenche engaburpohpa.

⁴³ Ama kaarnache kumsuum ariinii chak sii ynta ing ina rupanuw achuw ingkho amandam chehmah inche

⁴⁴ Jesu tuknungna vakka apeen basuwrna avaparcheh tahnache sii yntachu daesa.

⁴⁵ Amana Jesu ing ariir, “Ki ymparchu achuwva?” Mee aenche achuw ingkho iparmah enchiitah nache, Pitar ing ariir, “Aafhuw, mee hangjaeh inge eeburpoh tahna vasiingta!”

⁴⁶ Changvakonchu Jesu ing ariir, “Mee yngkheh ing ki ymparsa; akhae-chuve kataklina ruwreng omchu sina ichii ki ing kamanghuwsa.”

⁴⁷ Amana rupanuw inche ynthuurcheh mahsing ichii amanghuw tahnache ynchiimpak ing vakka amana Jesu maanache vakhupsaka ynchii khaena Jesu aparva vokhehkho ahakchaang inachu ynsaangkhe idamva ichii vakhaechu mee vakhae kaarnache ariirpa.

⁴⁸ Amana Jesu ing ariir, “Kasanuw, nang nathacha inche idam naphasahpa; idaejaeh ing yngkaera.”

⁴⁹ Jesu ing changche ichii ing achong raenche vajeernii een aapuh yngkheh ing thengka nang nasanuw kha thiksa; chukhaenache Jesu kha manjamahra taka Jairus ningna avariirpa.

⁵⁰ Jesu ing ama chongchu asiitah nache Jairus ningna ariir, “Nang ynchik mahra, thacha jaehtahra, ama hangring jaehvachii vatah.”

⁵¹ Amana Jesu ing eensung tingche avaruwh raenche Pitar re Johon amanche Jakop vokheh-kho naepang ampa amnuw mahnaka achuwkho ivemanruwh rumahsa.

⁵² Changlaenche rupanuwti khaenache mee inempak chapsae; changvakonchu ama ing ariir, “Nenuw chapmahruw; rupanuwti havi ithii mahva, ama ijaar vatah.”

⁵³ Enuw ing Jesu chongchu ensii-tahna emaniisahpa, amachuve enuw ing thiksa ichiichu emanghuwpa.

⁵⁴ Changvakonchu Jesu ing akikna jebachuwka hangsuwra kasiti taka a-eenpa.

⁵⁵ Amana alaethachu hungan-risa vokhehkho vat hangsuwsa; changlaenche Jesu ing isahfhuw thaemin piruw taka chong ajeerpa.

⁵⁶ Amana ampa re amnuw inche inempak ngiksae; changvakonchu Jesu ing havana isuwh nong i mee ningna riirmah dehruw taka ajeerpa.