LUK ING ABAZIIH ISA CHONG 7 - ITHAR CHONGHAK

Jesu ing Laarchang chaama Aapuh meenae Amandam

¹ Jesu ing mee vakhae inche ensiinii ing chong ariir amanchinuwting Kaparnaum tingche sisa.

² Amanache laarchang chaama aapuh ameenae yngkhehchu thikvachii ing henaksa. Atak i aafhuwchu iruwpak ing atusah meeva.

³ Laarchang chaama aapuh inche Jesu thengna ichii asiitah nache, ameenae inachu yndampeehnii khaena avakpeeh rasii tanuwna variirruw taka Jehudi upa aechu Jesu ningting avechiirpa.

⁴ Enuw ing Jesu ningting vak aeka aningna enriir, “Hava mee i nang ing bomva nachii matik chaana,

⁵ ama ing kenjaati inempak aning amansiihva vokhehkho meekongnii eenkho yntupeehva ta aeka Jesu ningna ipirpak ing enthamsahpa.”

⁶ Chukhaenache Jesu ing enuw thohche vak haksae. Amana Jesu ing vephavachii aasen avaehmah rirae, laarchang chaama aapuh inche aarang ae vechiirka Jesu ningna chong amanriirpae, “Aafhuw, ijahoh peehmah tahra, nang ing ka-eenna varuwhva nachii ki yntuursapakning;

⁷ chukhaenache katak rapkho Aafhuw naningting vakva kachii matik ichasah mahping ta ingka kamandensahva. Changvakonchu nachonghak pangchu ipipeeh sara, vokhehkho kameenaechu idam phasarasii.

⁸ Kikho aatuaricheh yngkheh derna ong meeping, kaderna laarchang mee inempak omnae: Ki ing yngkheh ningnache sira kachiitahna sina; amanche reentaang yngkheh ningnache huungla kachiitahna huungna; vokhehkho kameenae ningna-che amakha tura kachii atunah.”

⁹ Jesu ing ama chongchu asiitah nache inempak ngikka aanuwzii mee ae ningtingche vaanlehka ariir, “Ki ing neningna kariirnah, Isrel vakhae kaarna atanii ipha ing jinge ichii atha-cha om mee yntuwhfhuw mahri ing.”

¹⁰ Amana avechiir mee aechu eenting enghunganritah nache, meenae inachu hedamsa.

Jesu ing Muwkhuwnuw sapa Amanring

¹¹ Apha topoh aanuwting Jesu ing Najin ichii khuwruung ting vasisa, amana asebok aere, mee inempak ae thohche sipohsae.

¹² Ama ing khuwruung suwngkung avephapha nache ithii mee envedompa, atak i amnuw ing yngkhehpang abaringsah sapava, amanche amnuw chukho muwkhuwnuwva; amana khuwruung tanii mee inempak inche amnuwchu engaanruwfhuw.

¹³ Changlae Jesu ing amnuwchu amutahna aningchu mansiihka aningna ariir, “Nang chap-mahra.”

¹⁴ Amana Jesu ing envedomnii toraechu avepartah nache aandom mee aechu ngiirsae. Aphanache Jesu ing ariir, “Achiihpa iler, naningna hangsuwra ta ingka kariirnah.”

¹⁵ Changlaenche ithii inche hangsuwka ongsa, vokhehkho ichongkho abasenpa. Amana Jesu ing amnuw ningting amansirpa.

¹⁶ Amatah nache mee aechu eningdim ing ynchikpoh aeka vokhehkho enuw ing Thangnang chu manpah aeka enriir, “Iruungpak jaephar yngkaarna hungsuwhsa, vokhehkho Thangnang ing amee aechu aveersahpa!”

¹⁷ Jesu ing havana nong i atu khaena Judia paam vokhehkho akuurna ongchaap vakhae mee aenche ynseer aeka ynjarsa.

¹⁸ Johon asebok aenche havana chong vakhae i siiaeka aningna aman-thangpae.

¹⁹ Chukhaenache Johon ing asebok meeniimeh aechu eenka Aafhuw ningting vechiirka ariir, “Ijungtheng Aafhuw chu nangvachii, changmahka reentaang itheng kenuw ing hahva kenchii omne vataruw?”

²⁰ Enuw inche Jesu ningnache theng aeka enriirpa, baptais eetupeeh Johon ing kenuwchu naningne avechiirka jinge ichii ing siiruw achiinah, “Ijungtheng Aafhuw chuvachii, chang-mahka reentaang yngkheh hahva kenchiiva?”

²¹ Apha ichiinache Jesu ing ina chaap ae, isamah riirae ing ina ae vokhehkho ynthiingmah laetha ing ichuwng ae vakhaechu amandampae amanche mikchu vakhae chukho amandampae.

²² Amana Aafhuw ing eningna abasang, “Nenuw ing nensii vokhehkho nemu chaap vakhae i Johon ningna hungriirruw; mikchu aeng imu emphasahpa, engana iseeh aeng ensii-chehpa. Amanche khibong aenche isi enchehpa, ynchor aenche ynthiing emphasahpa, ithii ae chukho hangring emphapa, amanche havana isa chong katong chaap ikho sara naeriing aengkho ensiisahpa.

²³ Chukhaenache kataklina fhuwm ynvaemah meechu bor aphava.”

²⁴ Johon achongjeer aenche engaang-kae nuwna, Jesu ing Johon khaena mee changjaeh inem kaarnache thamin itong abasenpa: “Nenuw ing paamfhuw ne ynchiikha iva en ivasi vachuw? Sii iraang ing amanlaap thingdii chuva?

²⁵ Vokhehkho nenuw ing ynchiikha munung tachuwka ivasivachuw? Peen ynnaarjaeh anii mee yngkheh chuva? Enruw, inempak ivaar ing ynthong inungaepak ing ipaar enuw ae chuve iruwng ae ongnii nache ongnae.

²⁶ Chukhaenache nenuw ynchii enkenta tachuwka ivasi vachuw? Thangnang jaepharchu nenva enva? Ichum chuve chumna, ki ing neningna kariirnah, atak chuve Thangnang jaephar athiseh ing manchungsehna.

²⁷ Haviva ama akhaena ynziihka omchu enruw, ki ing kachongjeer meechu nemaana kachiirsa, ama ing nengkhaena lamchu heseem vaata.

²⁸ Ki ing neningna kajeernah, rupanuw aeng embaring vakhae kaarna Johon aathi achuwkho omah; changvakonchu Thangnang iruwngpaamna aasiingseh inche Johon chungna ruunghakna.”

²⁹ Hava chong i aasii vakhae mee aengkho, ree ikhuum aengkho Johon ningna theng aeka baptais tusa aeka, Thangnang i ichum chuva ta aeka enrisah.

³⁰ Changvakonchu Pharisi aere thiimthang aenche aningna baptais itu rumah aeka entaksah ing Thangnang ing amandenchu rimahsae.

³¹ “Ataraennii suwnthar ne ipaar mee ae i ynsaangkhe ichiipae vokhehkho ynchiithoh aanghakpae taningka man-dang kate?

³² Enuw chuve kithiirna ong naepang aethoh aanghaknae. Enuw ing yngkheh yngkheh yngeen aeka enriirnah, ‘Kenuw ing nengkhaena baasi kentumnah changvakonchu nenuw ing laammahchuw! Kenuw ing kenchaprae chapmahchuw.’

³³ Akhaechuve Baptis Johon tarkho asahmah amanche vomrip chiikho ainmah thengsa, amanche nenuw ing atakchu ynthiingmah laetha areensa tachuwka nenriirpa.

³⁴ Mee Sapa inche jungthengka asahpa vokhehkho ainpa, amachu vokheh nenuw ing apeehbuwr iruung juw ain vokhehkho ree ikhuum mee aethoh, amanche isii icher mee aethoh ynchaarna tachuwka nenriir nahreeh!

³⁵ Thangnang losingchu ama asiti aenche aangkhenglaang chumna ta aeka emandangpa.”

Jesu ing Pharisi Simon Eenna ong

³⁶ Pharisi yngkheh ing Jesu thohche imaarpohnii khaena a-eenpa, chukhae-nache Jesu ing Pharisi een tingche varuwhka ongsa.

³⁷ Amana enruw, ama khuwruung nache isii icher rupanuw yngkheh inche Pharisi een sungnache Jesu ongna ichii asiitah nache rupanuw inche yntaehfhuw barim isa richiithou buwrchu vechika,

³⁸ vokhehkho atuknungna vangiirka chapsa, amanche amik richii ynta inche Aafhuw khichu manomka asam inche aanuwrpa vokhehkho akhichu tumka richiithou inche aataehpa.

³⁹ Jesu chu a-eenpa Pharisi inche amachu amutah nache abarungriirna mandenka ariir, “Hava mee i ynchii rupanuwva ichii manghuwva chiiva, akhaechuve rupanuw havi isii icher meeva.”

⁴⁰ Jesu ing abasang, “Simon, ki ing naningna kariirfhuw yngkheh omna.” Ama ing abasang, “Oja, ynchiiva iriirpeehra.”

⁴¹ Achuw mee yngkheh seer mee amanfhuwhchak ningnache seer afhuwh ae om. Yngkheh inche chanii songa amanche yngkheh inche somnii ariirunga entuurpa.

⁴² Enuw meenii inche ensingfhuw endeenmah tahnache akuhpeehpae. Chukhaenache enuw meeniimeh ne achuw ingkhe athiseh ing aning mansiihhak vaate?

⁴³ Simon ing abasang, “Ki ing kamanden chuve inemhak ing atuur meechu vaata.” Jesu ing aningna ariir, “Nang ichum ing vajeer natupa.”

⁴⁴ Aanuwnache rupanuw ningtingche vaanlehka Simon ningna ariir, “Nang ing rupanuw havi namuse? Na-een sungting varuwhsing, nang ing kakhi chaamnii chii ipimahchii, changva-konchu rupanuw havi inge amik richii ing kakhi manomka asam ing aanuwrpa.

⁴⁵ Nang ing kaabeeng tummahchii, changvakonchu kavaruwh chakthoh basenka kakhi atumchu manchenmah,

⁴⁶ changpangmahka karusaena richiithou itaehmahchii, changvakonchu ama inchembe kakhina richiithou aataehpa.

⁴⁷ Chukhaenache naningna kariirnah, ama ing isii arangchaap vakhae kakuhpeeh chirpa, akhaechuve inempak aning ymman-siihpa; changvakonchu topoh pangti ikuhpeeh apha inche topoh pangti aning amansiihnah.”

⁴⁸ Chukhaenache Jesu ing rupanuw ningnache ariir, “Nataklina isii icher chaap vakhae kakuhpeehchir pachii.”

⁴⁹ Changlae Jesu thoh imaarniina onghak aenche yngkheh ing yngkheh ningna ynriirsae, “Isii chukho akuh-cheh havi achuwva?”

⁵⁰ Jesu ing rupanuw ningnache ariir, “Nathacha inche yngkarsahpa, idaejaeh ing yngkaera.”