LUK ING ABAZIIH ISA CHONG 6 - ITHAR CHONGHAK

Deennii khaena Chong Ensii

¹ Deennii inii nache Jesu ing ruwchimna avasi raenche asebok aenche sabarchu chim aeka engkik bajaana chiaeka ensahpa.

² Chutah-nache Pharisi aenche enriir, “Deennii iniina vajeer chonghak ing arumah iser nong nenuw ing yngkhaena nentuva?”

³ Jesu ing eningna abasang, “Devit ing aanruwfhuw aethoh enven achaam-rae ynchii atu,

⁴ ama ing Thangnang eenna ynsaangkhe varuwhka, jaethiim ae mahnaka isah aruthang thaangmah tarchu ama ing rika asahva, changpang mahka ama ing aanruwfhuw ae chukho amansah ae ichii ynthiing thiimziihna ynthinchu nenuw pamahchuw?”

⁵ Amana Jesu ing eningna ariir, “Mee Sapa inge Deennii Aafhuw va.”

Akik Ithiipoh Pasar Yngkheh

⁶ Nikhehna Jesu ing Deennii inii nache meekongnii eenting varuwhka amanchuw ae, engkaar nache akik tachang baen ithiipoh mee yngkheh heong.

⁷ Amana thiimthang aere Pharisi aeng Jesu chu emanraarnii ijongnii khaena Deennii iniine ina mansakva tamo ta aeka manchuwm aeka engenjaehpa,

⁸ changvakonchu Jesu ing emandenchu amanghuwtah nache akik tachang baen ithiipoh ningnache ariir, “Hanene huungnana ngiirla.” Ama ing hangiirka ngiirsa.

⁹ Amana Jesu ing eningna ariir, “ki ing neningna chong yngkheh kasiinah-chuw, Deennii iniine isa iture isamah itu, amanche ringkum ikarpeeh re imaangchu vajeer chonghak ing ukha ingkhe ruvaate?”

¹⁰ Aanuwnache Jesu ing enuw vakhaechu enka ina ningnache ariir, “Nakik kha ithohra.” Akikchu aathohtah nache damsa.

¹¹ Changvakonchu enuw embarung isii inche Jesu takline ynchiikha itu ing isava ta aeka yngkheh yngkheh ynsiisae.

Jesu ing Sebok Suum Ariinii Aateer

¹² Changlaenche Jesu ing bungting ithamsah sisa; amana jaenpumche Thangnang ting athamsahpa.

¹³ Amana khuw ahungvaar thoh Jesu ing asebok aechu eenka engkaar nache mee suum ariinii aateerpa, vokhehkho enuwchu chongthang ae taka ruming akhiingpa;

¹⁴ enuw enruming chuve, Pitar kho enchii Simon, ama anaepa Andriu, Jakop, Johon, Philip, Bartholomiu,

¹⁵ amanche Methiu, Thomas, Arphius asapa Jakop, amanche Zilot enchii Simon,

¹⁶ amanche Jakop sapa Judas, vokhehkho mee irensah hunginsuwh Iskariot Judas, enuw ae iva.

Jesu ing Manchuw aeka Vokhehkho Amandam ae

¹⁷ Jesu ing achongthang ae thohche bung tanii jungchumka idaam nache ngiirsa. Amanache asebok ae inempak aethoh vokhehkho Judia paam taniichaap, Jerusalem tanii, amanche Taire re Sidon chifhuw laartanii, Jesu thaminchu isiinii khaena vokhehkho ina vakhaechu mandamnii khaenache mee inempak vathengsae;

¹⁸ amanche ynthiingmah laetha ing entaklina ijachaam apeeh vakhae chukho theng aeka amandampeeh chirpae.

¹⁹ Chukhaenache mee inempak aenche atakchu iparnii khaena enjongpa, akhaechuve aningtanii ruwrengchu hungsuwhka mee aechu amandampa.

Rotharoh re Ijachaam

²⁰ Amana Jesu ing asebok aechu enka ariir: “Sara ae nenuw bor nenphava; Thangnang iruwngpaamchu nentavaata!

²¹ Atarae venchaam chiilaar nenpha ae nenuw bor nenphava; nenuw bavava nenta! “Atarae bakhik chuwka ichapchu nenuw bor nenphava; nenuw maniiva nenta!

²² “Mee Sapa khaena mee ae ing ibatir ae naka, ynrumah ae, ningjak ympiae, vokhehkho nenrumingchu thang mansii ae nave, nenuw bor nenphava!”

²³ Changchii inii nache nen-rotha manrohruw, vokhehkho ynthoh nuwna nungaeruw, thangbaenna nenphafhuw nongmen iruungpak omna; ajaenkho jinge ichii ing empa aenche jaephar ae taklina entuva.

²⁴ “Chukhaenache savang ae neningna chembe ijaniisapa; akhaechuve aaniing omah nungaechu nenphapa!

²⁵ “Atarae nenven ynva ae neningna chembe ijaniisapa; akhaechuve nenuw venchaam ing itheh vaata! “Atarae nemanii inja neningna chembe aajaehmeh ijaaniivaate; akhaechuve nenuw ichap ichuw phava nenta!

²⁶ “Nentaklina mee vakhae ing isapak ing ichong ae nengkhaena ijaniisapa, akhaechuve empa aenche ichummah jaephar ae ningnache entu vasahva.

Eejeehnii Aechu Ningmansiihnii

²⁷ “Kachong aasii neningna kariir-nah: Eejeehnii mee aechu nening mansiih aeruw; nenuwchu ymbatir mee ae taklinache isachu turuw,

²⁸ Nentaklina siraap ympi aechu bor piaeruw, amanche nenuwchu ynjuum mee ae khaenache thampeeh aeruw.

²⁹ Achuw yngkheh ing naabeengna eebeeng nave, paangkheh tingkho dura; amanche napeen ari mee inche narungop kho rinave khaammahra.

³⁰ Naningna ynniih vakhae ningnache pira; vokhehkho napeeh nachae ari meechu athar nang ing siingmahra.

³¹ Nentaklina mee ing tunaka nenchii nemandenchu, nenuw ingkho ening-nache turuw.

³² “Nenuwchu aning ymmansiih taklina chenpang nenuw ingkho nening mansiih tanuwcha ynchii isuur-sahnii omkhang! Isii icher mee aerap ingkho enuwchu ening emansiih mee ae chupang ening emansiihnah ae.

³³ Amanche neningna isa yntupeeh ae ningna nenuw ingkho isachu tupeeh ae tanuwve, neningna ynchii ympahfhuw omkhang! Akhaechuve isii icher aengkho changche entunah.

³⁴ Amanche nenuw ing phava kenta ichii ing nemanden mee ae ningnache piae tanuwcha ynchii ympahfhuw omkhang! Isii icher mee aengkho athar iphanii khaenache isii icher ae ningna empinah.

³⁵ Changvakonchu eejeehnii mee aechu nening mansiihruw amanche isa chukho tupeeh aeruw, vokhehkho nenbarungriir sungna fhuwm ynvaerudeh in athar phareehva kata ichii mandenru ing mamfhuwh aeruw, amanche nenongmen inempak ruungvaata, amanche nenuw ing aanchungseh sitichu ynsuwhva nenta; akhaechuve mee ing atupeeh amang-huwmah mee ae, vokhehkho isamah mee ae taklinakho Aafhuw ingkho aning amansiihnah.

³⁶ Nenuw vakhae nenpa ing ningchuwh omvaang, nenuwkho ningchuwhchu omruw.

Reentaang taklina Vajeer Itu

³⁷ “Mee ae taklina vajeer tumahruw amanche nentakli nakho vajeer itumahnii; mee ae taklina manraar mahruw amanache Thangnang ingkho nening nache imanraar mahnii; kuhpeehruw amanche nenuw chukho ikuhpeeh vaata;

³⁸ piruw, amanche nening nakho ipivaata. Isapak achaang inae ing namnaka, inuk naka, ynriimjor inche nengkikna nenchicheh vakhae ipivaata. Nenuw ing nenguur inuwzii inche neningna athar Thangnang ing uurvaata.”

³⁹ Jesu ing eningna ynghuwnii thamin ariir: “Mikchu inche mikchu yngkhehchu ruwchehva takhang? Enuw enganii ing yngkuwng ting bukmah ae niikhang?

⁴⁰ Sebok ing aanchuwmee chungna ynchungseh mahva, machang ing atam mee vakhae inche aanchuwmee vaang hungtavaata.

⁴¹ “Chukhaenache namikna ibuwr omcha kharmah chiika, nauw nanae mikna ibuwr omchu ynchii khaena nabuwrva?

⁴² Nataksah mik narap thing yngkhangka omchu muruchii ing, ynchii khaena nauw nanae mikna ibuwr omchu ripeeh kachii nachiichehva? Isachaang itu nang amaensana namikna om thing yng-khangkha rijapla, aanuw nache nauw nanae mikna ibuwr omchu ynthiingkiir ing mupeh vaanta.

Thingbur re Aanla

⁴³ “Isa thingbur inche isamah ing ynlamah, vokhehkho isamah thingbur inche isa ing ynla chehmah;

⁴⁴ amachuve thing vakhaechu aanla inuwzii ing ymmanghuw chehsa. Mee ing utaraenkho iringbur nache thachang iriih mahchak, vokhehkho iringbur nache vomrip aanla iriih mahchak.

⁴⁵ Isa mee inche abarungriir tanii isachu amandangnah amanche isamah mee inche abarungriir tanii isamahchu ahemandangnah; akhaechuve abarungriir sungna ynthin inuwzii inche hangchongna.

Een Itu Meenii

⁴⁶ “Neningna kariir chucha turuchuw ing ynchii khaena nenuw ing Aafhuw, Aafhuw, tachuwka yngeen vachuw?

⁴⁷ Kaningna itheng chaap ing kachong vakhaechu siika nong ing atu mee chaapchu ynsaangkhe tane ichiichu neningna mandang kata:

⁴⁸ Ama mee chuve eenphamburchu ithuwhpak ing chuwka rung taklina een amangiir mee yngkheh thohche aanghakna; amana eenchu chii iriim inche ajensuktah nache manlaapcheh mahsa, akhaechuve ama ing rung taklina amangiirpa.

⁴⁹ Changvakonchu isiicha siika atumah mee chuve, eenphambur ichah ing ruwruw taklina een amangiir thohche aanghakna; chukhaenache chii iriim inche ajensuktah nache eenchu kiichirsa, amanche anikung narapche tiihsa vokhehkho eenchu amasak ithipak ing maangsa.”