LUK ING ABAZIIH ISA CHONG 22 - ITHAR CHONGHAK

Jesu Enrumah

¹ Atii chor ynvaemah manlaennii kuurva thaemin isahnii aphachu hunganeengsa.

² Amana aanchung jaethiim aere thiimthang aenche Jesu chu ynsaangkhe thehchehva kenchiiva ta aeka ynruwhjaeh ing emanjongpa; akhaechuve enuw ing mee aechu enchiipa.

Judas ing Jesu Irensah Aru

³ Sebok suum ariinii sungna ynvae aruming Judas Iskariot ningnache umlae chuwngsa.

⁴ Chutahnache ama ing sika aanchung jaethiim aere rumniieen aarung iruung ae thohche Jesu chu ynsaangkhe eningna pivachiiva ichii khaena chong eman-seerpa.

⁵ Enuw ing enrotha rohka aningna seer ipeehnii khaenache enchong reepsa.

⁶ Chukhaenache ama ingkho ruka mee ing amanghuwnii mahdeh ing Jesu chu eningna ipeehnii khaena apha ichachu amanjongpa.

Jesu ing Manlaennii Thaemin Isahnii Asir

⁷ Atii chor ynvaemah thaemin isahnii aanii nache manlaennii kuurvana jaoti yntheh vachii aaniichu ahenphapa.

⁸ Chukhaenache Jesu ing Pitar re Johon chiirka ariir, “Inuw ing manlaennii thaemin sanii vaanchii aphamchu thoraang vaturuw.”

⁹ Amana enuw ing enriir, “Kenuw ing unakhe thoraang ituchu nang ing naadikva?”

¹⁰ Jesu ing eningna ariir, “Enruw, nenuw ing khuwruung na nenju-ruwhrae mee yngkheh ing chiiphur idomnaka eentuwhfhuw vaata; atakchu jiinuwna aruwhnii eennache varuwhruw.

¹¹ Amana eensung aafhuw ningnache nenuw ing taruw, ‘Jesu ing naningna kasebok aethoh manlaennii ningsiih thaemin saniiva kenchii aphamchu unakhenva tanuwna siiruw?’

¹² Amanache chungting iruungpak ongnii yngkhehna thoraang yntuvasah ama ing imansiivaata; amanache thoraangchu turuw.”

¹³ Enuw ing siaeka Jesu ing ariir inuwzii ing vatuwh aeka, amanache manlaennii ningsiih thaemin isahnii-chu thoraang entupa.

Aafhuw Ningsiih Thaemin

¹⁴ Aphachu ahenpha tahnache, Jesu ing achongthang ae thohche isahnii nache ongsa.

¹⁵ Amana Jesu ing ariir, “Ki ing ijachaam kaphamah rirae manlaennii ningsiih thaemin havi nenuw thoh isahhak kadikva.

¹⁶ Thangnang iruwngpaamchu ma-pung aphamahri raentaang, ki ing utaraenkho havi samahning ta ingka neningna kariirnah.

¹⁷ Aanuwnache Jesu ing vomrip chiichu ithohka ariir, havi verinuwna ynsemruw.

¹⁸ Ki ing neningna kariirnah, Thangnang iruwngpaam athengmahri raentaang, atanii basen naka ki ing vomrip chii havi inmahning.”

¹⁹ Amana Jesu ing tarchu verika amanpah aanuwnache bakhiika eningnache jepika ariir, “Havi neng-khaena kapeehchuw kashava. Ki yndennii khaena havi turuw.”

²⁰ Enuw ing ensah aanuwnache aanghakjaeh ing vomrip chiichu verika ariir, “Hava vomrip chii i nengkhaena ynta kasii ing kahak ithar chongiirva.”

²¹ “Changvakonchu enruw, kichu irensavachii meechu kithoh isahniina onghaknung.

²² Amaenna ajeer vasah laepah inuwzii ing Mee Sapa inche ma ataarnah; changvakonchu ynrensah mee ichuve aningna ijaniisapa!”

²³ Amana enuw ing entaksah sungna achuw ing ama nongchu tuvachiiva ynta aeka ynsiisae.

Iruungsehchu Achuw vachiiva ichii khaena Ynnahnii ae

²⁴ Enuw enareer sungna achuw ingkhe iruungsehva ynta aeka ynnahniisae.

²⁵ Amatah nache Jesu ing eningna ariir, “Reentaang mee iruwng aeng emee ae taklina aafhuw ynsuwhnii nong entunah; amanche aatuaricheh aechu mee ae khaena isa nong itu mee ae ta aeka engkhiingnah.

²⁶ Changvakonchu nenuw chuve amachu vaangche tamahchuw; nenuw nengkaarna ruungseh vachii inche naepang vaang ynjuursa vachiiva, vokhehkho aapuh inche meenae ynsuwh vachiiva.

²⁷ Achuw inche iruungsehva, isahniina ong chuva? changmahka rukuum atu mee chuva? Isahniina ongchumah vakhang? Chukhaenache ki chuve nengkaarna rukuum itu mee thoh aanghak ing omning.”

²⁸ “Nenuw chuve kichu chaang yngen vakhaena kithoh onghakchu vachuw;

²⁹ Kapa ing kaningna iruwngpaam yngkheh ympeehvaang, nenuw chukho ki ing pivakachuw.

³⁰ Nenuw ing karuwngpaam nache isahhak inhaknii khaena iruwngpham ongnii chaap nache ongtanuwka amanche Isrel sungkhur suum ariinii aechu vajeer tuvanenta.”

Pitar ing Jesu Rumahvachii Maen ing Ajeer

³¹ “Simon, Simon, enla, gehu re akoh ynteerka yngkhaevaang nenuwchu umlae ing ynniihnah.

³² Changvakonchu Simon, nang nathacha achenniimah khaena nakhaena ki ing kathamnah, amanche nang ing nabarungriir athar nahuung raenche nang ing nauw nanae aechu embarungriir manpirpeehva nachiipae.”

³³ Pitar ing abasang, “Aafhuw, ki chuve nangthoh kaeshum sungna onghaknii vokhehkho ithiihaknii khaenakho ynthong chirsing.”

³⁴ Jesu ing ariir, “Pitar, ki ing naningna kariirnah, nang ing ki i manghuwmah ing tataniika vathum-chak nariirmahri raentaang atanii jaen aarkhuung ing khuwngmahnii.”

Seerthuung, thuungfhuw, vokhehkho Laarchem

³⁵ Jesu ing eningna ariir, “Ki ing nenuwchu seerthuung, thuungfhuw vokhehkho kheerkhaang ichah ing kachiir raenchuw nenuw nenvaehnii omchuwkhang?” Enuw ing enriir, “Ynchiikho vaehmahdeh ung.”

³⁶ Jesu ing eningna ariir, “Changvakonchu atiive seerthuung adeen mee inche chirasiing, amanche thuungfhuw chukho chirasiing. Amana yntanga adeenmah mee inche apeen juwrsana laarchem iriirasiing.

³⁷ Ki ing neningna kariirnah, isii icher mee ae kaarnache ama ynvaesa taka ynziihchu kataklina suwhva chiiting buksa.”

³⁸ Enuw ing enriir, “Enla Aafhuw, laarchem ynniimeh omna.” Jesu ing ariir, “Ama ingkhe ynsuwh chaksa.”

Jesu ing Oleep Bungna Athamsah

³⁹ Jesu ing hungsuwhka anunu ing atuchak vaang Oleep Bung tingche vaksa, amana asebok aeng aanuw ajii ae.

⁴⁰ Ama ing ama minnahce avatung tahnache eningna ariir, “Nenuw batheem ting nenbukniimah ing thamsaruw.”

⁴¹ Amana rung ing kung ideengthoh ynchimvak yndahpakmah ing Jesu ing enuwthoh ynsaeka athamsahpa,

⁴² “Apa, nang ing irupeeh taniive, havana ijachaam kam i kaningtanii iripeehsar; changvakonchu ki ing kamanden ynsuwh mahsana, nang ing namandenchu ynsuwhrasiing.”

⁴³ Amana thangbaen tanii vaarmee inche juwngka ajungmanpirpa.

⁴⁴ Jesu abarungriir ija lamher ing ipirsehseh ing athamsahpa, amana aruthen ifhuwr ing ruwruwna ibuwchu sii atang atang vaang ynta.

⁴⁵ Jesu ing athamsah aanuwna hangiirka asebok ae ongnii ipha ing ahuungtah nache, enuw embarungriir ija inche ijaar ing ahenphapae.

⁴⁶ Amana Jesu ing eningna ariir, “Yngkhaena nenuw ijaar vachuw? Batheem ting nenbukniimah ing hangsuw nuwna thamruw.”

Jesu Ensuwr

⁴⁷ Jesu ing achong raenche enruw, mee inempak aechu asebok kaarna ynvae Iskariot Judas atak ing maensaka Jesu aabeeng tumnii khaena abuum tingche avaneeng.

⁴⁸ Changlae Jesu ing aningna ariir, “Judas, nang ing Mee Sapa chu aabeeng tumchiika narensahva?”

⁴⁹ Jesu thoh ynruwhak ae asebok aenche hungsuwh vachiichu emutah nache enriir, “Aafhuw, kenuw ing laarchem inge tukva kenchiipae?”

⁵⁰ Changlaen siimche engkaarna yngkheh ing aanchung jaethiim ameenae yngkhehchu atachang aana asaehpa.

⁵¹ Amana Jesu ing ariir, “Havi inge ynsuwhsa!” Jesu ing aana asuhchu veparka amandampa.

⁵² Aanuwnache Jesu ing aanchung jaethiim aere rumniieen aarung iruung ae vokhehkho upa vakhae ae, atak ivasuwr ivatheng mee vakhae ningna ariir, “Vajeer chonghak abakhii ichamah ynruw ynrep suwrva nenchii vaangkhe laarchem re rumor thoh ivatheng vachuw?

⁵³ Anasiirna ki ing nenuw thoh Rumniieenna kaonglaen khencha nenuw ing kichu isuwrnii khaena nengkik varaammahchuw. Changvakonchu havana apha ive nengkhaenava vokhehkho ynthim ruwreng apha chuva.”

Pitar ing Jesu Arumah

⁵⁴ Enuw ing Jesu chu suwr aeka aanchung jaethiim een tingche enghenruwpa. Changlae Pitar ing yndahseh ing avejiipa;

⁵⁵ enuw ing vajeernii een sukmae ariknache mi manseh aeka engu kaarnache pitar kho ongsa.

⁵⁶ Meenae rupanuw yngkheh inche irengna ongchu amutah nache enteehka averiir, “Hava pasar ikho ama thoh ynruwhak chakpae.”

⁵⁷ Changvakonchu Pitar ing rumahka ariir, “Rupanuw, ama i ki manghuwmah ing.”

⁵⁸ Apha topoh ompheh reehka mee yngkheh inche amureeh tahnache nangkho enuw kaartanii yngkheh vachii taka ariirpa. Changvakonchu Pitar ing abasang, laaruw mee, ki mahping achii.

⁵⁹ Apha topoh iseeh aanuwting mee reentaang yngkheh ing ipirpak ing ariir, “Hava mee rem ikho amathoh ynruwhak chakpae; akhaechuve atak i Galili tanii meeva.”

⁶⁰ Changvakonchu Pitar ing abasang, “Laaruw mee, nang ing nariir chong i ki manghuwmah ing.” Ama chongchu abasang chakthoh aarkhuwng inche khuwngsa.

⁶¹ Amana Jesu ing aningting vaanlehka Pitar chu ave enpa. Chutahnache atanii aarkhuung ing akhuwngmah rirae vathumchak irumah tanii taka Jesu ing aningna ariir chongkha Pitar ing aansiipa.

⁶² Amana Pitar ing taang jungsuwhka abarungriir asuhpak ing chapsa.

Jesu Maniisa aeka vokhehkho Embin

⁶³ Atii Jesu chu embachuw pasar aenche maniisa aeka abinpae;

⁶⁴ vokhehkho enuw ing Jesu chu amik mangkhum aeka aningna ensii, “Riirla nangchu achuw ing ymbinva?”

⁶⁵ Amana enuw ing reentaang ithipak chong ing ataklina ariirpae.

Jesu chu Aanchungpuh ting Enghenruw

⁶⁶ Khuwchu hungvaarka, upa chaap ae, aanchung jaethiim ae vokhehkho thiimthang ae yngkongsae; amana enuw ing Jesu chu aanchungpuh tingche enghenruwpa.

⁶⁷ Amana enuw ing ensii, “Nang Khrista chu vataniive, keningna riirla.” Changvakonchu Jesu ing eningna ariir, “Ki ing neningna riirkhang ningle nenuw thachamah tanuw.

⁶⁸ Ki ing neningna chong siikhang ningchuwkho nenuw ing ibasangmah tanuw.

⁶⁹ Changvakonchu atanii basen naka Mee Sapa inche Aacheh Thangnang atachang nache ongvaata.”

⁷⁰ Enuw vakhae ing enriir, “Chunuw-cha nang Thangnang sapa vachii?” Ama ing eningna abasang, “Nenuw ing kiping ichiichu nenriirpa.”

⁷¹ Ama-na enuw ing enriir, “Inuw vakhae ing havi chungna saarkhii athar ijongnii ynchii omkhang? Inuw yntaksah ing anertanii ynsiipa!”