LUK ING ABAZIIH ISA CHONG 21 - ITHAR CHONGHAK

Muwkhuwnuw ing Atha Seer

¹ Jesu ing rumniieen nache kikthuur enthachu a-entah nache savang aeng enthachu amupa;

² amanche sarapak muwkhuwnuw ing pesa ynniimeh atha chukho ama ing amupa.

³ Amana Jesu ing ariir, “Atatak ing kariirva, havana muwkhuwnuw inge enuw vakhae chungna inemseh athasa;

⁴ Reentaang vakhae aeng endeenpoh ing enthasa, changvakonchu hava muwkhuwnuw sarapak inge adeensah aringnii topohtichu athadehpa.”

Jesu ing Rumniieen Maangvachii Ajeer

⁵ Mee topoh aenche isapak rung vokhehkho Thangnang ting kikthuur empeeh havi yngentahna aajaehmeh isava ta aeka rumniieen khaena enchong tahnache, Jesu ing eningna ariir,

⁶ “Nenuw ing nemu vakhae havi maangchir vachii apha inii nikhehna thengvaata; changlaenche rung yngkheh taklina yngkheh ing deengru ing kiimah vachii yntanga omahnii.”

Ijachaam Suwhvachii

⁷ Enuw ing Jesu ningna ensii, “Oja, ama changchiichu utaraenkhe suwhva chiiva? Vokhehkho ama vakhaechu ahungsuwh phanache ynchii buwtinnii ombaate?”

⁸ Jesu ing ariir, “Nenuw aasiirting mee aeng ynruwniimah ing ynriimruw; akhaechuve ki Khrista ping, aphachu ynneengsa ta ae naka mee aajaeh ing karumingna hungsuwh vaatae. Nenuw ing enganuwchu jiimahdeh aeruw.

⁹ Nenuw ing laar yntuk vokhehkho laarsa isuwh nensii tahna ynchik-mah dehruw; hava vakhae chaap i amaensana suwhvaata, changvakonchu achiniirem chuve ama apha sungnache suwhmahnii.”

¹⁰ Changlaenche Jesu ing eningna ariir, “Paam yngkheh re paam yngkheh ynna vaatae, iruwng lipah yngkheh re yngkheh ynrumahnii ae.

¹¹ Ipirpak linglaang vokhehkho reentaang apham aajaehna venchaam chiilaar, reentaang laena aajaeh suwhvaata; vokhehkho ichiisuwh amanche minvaen tanii iruungpak ruwriimnii aajaeh yndang vaata.

¹² Changvakonchu hava vakhae i asuwhmahri raenche enuw ing nengkikna ibachuw aenaka imanang vaatae; enuw ing nenuwchu meekongnii eenting vokhehkho kaeshum sungting ithin ae naka kakhaena iruwng ae, vokhehkho lipah aapuh ae maana nenuwchu ihenruw vaatae.

¹³ Havi ki kasaarkhii ipeehnii khaena nentaklina suwhvaata.

¹⁴ Chukhaenache nenuw ing ynchii basangva kente tanuwna amaensana nenbarungriir sungna kharmanung tanuwna mangiirruw,

¹⁵ nenuw nentaklina eejeehnii aeng ichong chehmahva enchii nenerna iveernii ki ing jepiva kachuw.

¹⁶ Nenpa nenuw aeng amanche nenguw nenae vokhehkho nensungkhur amanche nengarang ae rap ingkho irensa vaatae; havipang mahka achuw yngkheh chuve ithii imanpha vaatae.

¹⁷ Mee vakhae ing nenuwchu ki karuming khaenache ibatir vaatae.

¹⁸ Changvakonchu nenuw nenrusae sam asae yngkheh pangkho maangmahnii.

¹⁹ Nenuw ing ikhaang nencheh ingkhe nentaksah iring phava nenta.”

Jesu ing Jerusalem Maangvahii Ajeer

²⁰ “Nenuw ing Jerusalem chu laarchang aeng enruwkuwr nemu-raenche hungmaang vachiichu hunganeengsa ichii manghuwruw.

²¹ Changlaenche Judia sungna ong vakhae aeng bung ting taen ae rasiing, amanche khuwruung sungna ong mee aenche hungsuwh ae rasiing, vokhehkho khuw sungna ongchaap aenche khuwruung tingche hungruwhmah ae rasiing;

²² akhae-chuve ynziih chaapchu asuwhchirnii khaena huwrinii iniichu vaata.

²³ Changlaenche miknii ae, naereen ae, naeri atua chuve apha ichiinache aajaehmeh ijaniivate! Laaruw paam nache ijaniipak vokhehkho mee ae taklinache barungsii thengvaata.

²⁴ Mee topoh chuve laarchem yngeepak taklina bukvaatae, amanche areh chuve suwr ae naka paam vakhaechaap nache ruwvaatae; amanche reentaang mee aenche enganiichu achimahri raentaangche Jerusalem chu engkhi chuwngnii ing tuvaatae.”

Mee Sapa ing Juwngvachii

²⁵ “Inii, tha, aesii nache buwtinnii yngkheh suwhvaata; amanche laaruw paamne chifhuw rusa inche ichiisuwh vaang tanaka ipen laarsa omnaka apaam lijana ijachaamchu suwhvaata;

²⁶ Suwhvachii amachu laaruw paam mee ing ahahtahna ynchik ae naka murvaatae; akhaechuve minvaen ruwreng chaapchu manuh vaata.

²⁷ Aphanache Mee Sapa inche aruwreng vokhehkho alaar isa thohche ruwrduhna ijuwngchu enuw inche muvaatae.

²⁸ Hava vakhae i isuwh ahenbasen raenche nenrusae mangen nuwna hengenruw, nenuw ijungruw vachiichu junganeengsa.”

Thachang Burna Ynghuwnii

²⁹ Changlaenche Jesu ing havana ynghuwnii thamin i ariir: “Thachang bur re thingbur chaap ae i enjaehtahruw.

³⁰ Enuw inge ana iduung hangsuwm basen ae nave, atii saartha hungvisa ichii nentaksah ing nemanghuwsa.

³¹ Amavaange nenuw ing hava vakhae i nemuraenche, Thangnang iruwngpaam junganeengsa ichii manghuwruw.

³² Atatak ing kariirnah, hava vakhae i ahungandang mahri raentaang havana suwnthar i maangmah dehnii.

³³ Thangbaen vokhehkho laaruw paam ichuve maangvaata, changvakonchu ki kachongsae chuve utaraenkho maangmahnii.”

³⁴ “Nenuw isahnii innii ing, juw ynruw ing vokhehkho hava suwnthar ringkum inge nenbarungriir amanja-niimah ing changmahka ama inii inche chaangna uvaang, nentaklina manghuw mangharu ing abukniimah ing nenuw nentaksah ynriimsaruw;

³⁵ Ama inii nache laaruw paamna ong mee vakhae taklina thengvaata.

³⁶ Chukhaenache suwhvachii vakhae tanii nensuwhchehnii ing, amanche Mee Sapa maanache ingiir nenchehnii khaena apha vakhaena hahjaehruw vokhehkho thamsaruw.”

³⁷ Jesu ing siimna rumniieen nache manchuwchak aeka, khuri ajungvi-raenche Oleep Bung ting sichakka riihchaksa.

³⁸ Jesu achongchu mee ae inche rungae nungka enchii khaena imaen ing aziing siir aningting ithengchak ae.