LUK ING ABAZIIH ISA CHONG 18 - ITHAR CHONGHAK

Muwkhuwnuw re Vajeer itumee taklina Ynghuwnii

¹ Jesu ing asebok aechu anasiir nache ithamsahna vokhehkho enrutha asikniimah khaena ynghuwnii thamin ing eningna ichong.

² Ama ing ariir, “Khuwruung yngkhehna Thangnang achiimah vokhehkho mee aajamah vajeer itumee yngkheh om.

³ Amanche ama khuwruung sungnache muwkhuwnuw yngkheh om, ama inche aningna anasiir vakka ariir, ‘Ki eejeehnii mee takline huw iripeehra taka athamsah.’

⁴ Ama ing apha topoh sungna chembe adapheh; changvakonchu aanuwnache abarungriirna mandenka ariir, ‘Ki ing Thangnang chu chiimah ingka vokhehkho mee aechu ijamah khang ae ningkho,

⁵ muwkhuwnuw havi inge anasiirna kaning amanghar khaene, ki ing ahuwchu ripeehtah kata achii-pa!’ ”

⁶ Amana Aafhuw ing ariir, “Ichum-mah ing vajeer aatu ing ynchii ariirse ichiichu siiruw.

⁷ Atii Thangnang ningtingche siim jaen aateer vasah amee aechu ibompeehnii khaenache achuw yngkheh ing henthamsa nave, vajeer tupeehmah niikhang? Ama ing ibompeehnii khaenache manthirva takhang?

⁸ Ki ing neningna kariirnah, Aafhuw inche engkhaena ithupak ing huwchu ripeeh vaatae. Changvakonchu Mee Sapa inche ajungthenglaenche laaruw paamne athacha om mee tuwhcheh vaate?”

Pharisi aere Ree Ikhuum ae taklina Ynghuwnii

⁹ Jesu ing entaksah chupang ichumpung ta aeka amanche reentaang vakhae mee chuve enrathiih mee ae ningna havana ynghuwnii thamin ikho atong:

¹⁰ “Mee ynniimeh aeng ithamnii khaena rumniieen nache itheng ae, yngkheh chuve Pharisi meeva amanche yngkheh chuve ree ikhuum meeva.

¹¹ Pharisi inche ngiirka athamsah, ‘O Thangnang, inempak kamanpah sahnahchii, ki chuve ikaam, ichummah vokhehkho reentaang rumee fhuwsar taklina ichuwhmah atu mee ae khavaang tamah ing, amanche havana ree ikhuum mee ithohkho aanghakmah ing achii.

¹² Ki chuve niisin yngkheh sungna voniimeh maaru katongnah, amanche ki ing kaphasah peehchae aangkheng sungna suumna yngkheh kapeehnah.’ ”

¹³ Changvakonchu ree ikhuum mee inche yndah ing ngiirka thangbaen yntongting rapkho amik hengenchehru ing abarung ichumka athamsah, “O Thangnang, isii icher ki naning imanchuwhsara achii!

¹⁴ Ki ing neningna kariirnah, Pharisi mee khamahva, ree ikhuum mee inge Thangnang maana ichum inche yngkaesa. Yngkhaena ynchii imbe ataksahchu ynruungsah mee inche ynjuursa vaata amanche ataksahchu ynjuursah mee chuve manruung vaata.”

Jesu ing Naepang ae Bor Apeeh

¹⁵ Jesu ing naepang aechu akik ing aparnii khaena mee topoh aeng aningna enveruwpa; amana asebok aeng emutah nache enuwchu enrakuhpae.

¹⁶ Changvakonchu Jesu ing naepang aechu een aeka ariir, “Naepang aekha khaammah aeruw; kaningting huung ae rasiing; Thangnang iruwngpaamchu enuw hangchii ae inge phavachiipae.

¹⁷ Ki ing neningna kariirnah, havana naepang ae vaange ichii ing Thangnang Iruwngpaam aaraang chehmah achuw yngkheh mee inche amanache supruwh ruwhcheh mahnii.”

Savangpa Yngkheh

¹⁸ Aanuwdeh nache achuw yngkheh Jehudi ae iruung inche Jesu ningna chong asii, “Isapak oja, ki ing ynchii tuningka ichen naemah iringnii phava kachiiva?”

¹⁹ Jesu ing aningna abasang, “Nang ing kichu ynchii khaena isapak oja ynchii vachii?” Thangnang mahnaka achuwkho isa omah.

²⁰ “Reentaang rumee fhuwsar taklina ichuwhmah tumah, mee thehmah, barukmah, ichummah khaena ngiirmah, nangnuw nangpa ijaara, ichii havana chonghak vakhae i namanghuwsa.”

²¹ Ama ing abasang, “Hava vakhae i kanaepangna basen ingka kamanjii vasahva.”

²² Jesu ing ama chongchu asiitah nache aningna ariir, “Yngkheh pangti namanvaehsa. Nang ing nadeensah vakhae juwrnana sara naeriing ae ningna piaera, amanache thangbaenna nalerchii omvaata; huung, kaanuw ijiira.”

²³ Changvakonchu ama ing Jesu chongchu asiitah nache abarungriir inempak jasa, yngkhaena ynchii imbe atak savang meesa.

²⁴ Jesu ing ijachu amanghuwtah nache ariir, “Savang mee aenge thangbaen iruwngpaam nache hungruwhva enchii aajaehmeh iruwvani!

²⁵ Akhaechuve savang mee ing Thangnang iruwngpaam nache varuwhva enchii chuve, siirchar ing simphuw khurna iruwh inche athiseh ing laehakna.”

²⁶ Ama chongchu aasii vakhae mee aenche enriir, “Changmaniicha achuw ing ikarpeehchu phacheh vachiiva?”

²⁷ Jesu ing ariir, “Mee ae ningna rumah vachiichu, Thangnang ningna chembe arusa.”

²⁸ Aanuwnache Pitar ing ariir, “Enla, kenuw vakhae ing kengeen kenruw bathenchir ungka naanuwchu kenjiiva.”

²⁹ Jesu ing chumna taka eningna ariir, “Ki ing neningna atatak ing kariirnah, Thangnang iruwngpaam khaena a-een aruw, arumee, auw anae, ampa amnuw, asiti ae abathen meechu,

³⁰ atarae nenkho aphafhuw inempak omna, changpang mahka hungvi vachii suwnthar nakho ichen naemah iringniichu phavaata.”

Jesu ing Thikvachii khaena Avomanthumnii Ichong

³¹ Havi aanuwna Jesu ing asebok suum ariinii aechu ruwka eningna ariir, “Enruw, inuw Jerusalem phanii ing hungsimanuw, Thangnang jaephar aeng embaziih aangkhenglaang Mee Sapa ningnache suwhchir vaata.

³² Atakchu reentaang mee ae ningting pivaatae, maniisa vaatae, ningjak pivaatae vokhehkho ataklina bachir vaatae;

³³ enuw ing ithipak ing manvar ae naka thehvaatae; amana inii avomanthumnii tahnache ama hangring vaata.”

³⁴ Changvakonchu asebok aenche hava vakhae khaene yntanga manghuwmahsae; akhaechuve emang-huwniimah khaenache athuurpa, vokhehkho ynchii ariirniiva ichiichu enuw ing manghuw mahsae.

Jesu ing Aaniihmee Mikchu Amandam

³⁵ Jesu ing Jeriko avephapha nache, aniihmee mikchu yngkheh inche lamfhuw kuurna heongsa;

³⁶ amana mee inempak ing ivasi huwruwsachu asiitah nache, havi ynchii isuwhva taka mee asiipa.

³⁷ Mee aenche aningna Nazaret Jesu vasina enchii.

³⁸ Amatah nache ama ing uungka athamsah, “Devit sapa, Jesu, ki naning imanchuwhsara!”

³⁹ Amana maen ynsa mee aenche nahuw tumahra ta eka enrakuh. Changvakonchu ama ing vanuh vanuh uungka athamsah, “Devit sapa, ki naning imanchuwhsara!”

⁴⁰ Amatah nache Jesu ing ngiirka kaningting atakkha henruwruw achii. Ama ing huungka ahenganeeng tah-nache, Jesu ing aningna asii,

⁴¹ “Ki ing nakhaena ynchii itupeeh naadikva?” Ama ing abasang, “Oja, kamik imu phasaning kachiisahnah.”

⁴² Jesu ing ariir, “Namik imuchu phasara; nang nathacha inche damsa-chii.”

⁴³ Anikung narapche imu achehpa, amanche Jesu aanuwchu jiika Thangnang chu amanpahsahpa; mee vakhae inche emutah nache Thangnang amanpahsah ae.