LUK ING ABAZIIH ISA CHONG 16 - ITHAR CHONGHAK

Ichummah Rukuumtu Mee

¹ Jesu ing asebok ae ningna ariir, “Apha vokhehna savangpak mee yngkheh om. Ama ing alerchii rukuumtu mee yngkheh asiih; ama mee inche alerchii apeehchae amamaangpa ta aeka enrensahpa.

² Amana savangpa inche atakchu eenka ariir, ‘ki ing natu nari nanong khaena chong kasii i ynchiiva? Nang ing nong natu nabaziih chaapkha ipira, nang athar vokheh kalerchii rukuumtu ynsuwh chehmah tanii.’

³ Amatah nache rukuumtu mee inche abarungriirna ariir, ‘Kaafhuw ing alerchii rukuumtu kapha pham havi kaningtanii riro achiinah, atii ki ynchii tuva kachiiva? Ki ing ruwruw phuhkata kachiipa pirmahsing, amanche niihkata kachii ingkho kaning ynjakreehsa.

⁴ Katak i lerchii rukuumtu pham tanii ynthur aanuwtingche mee ae ing engeen sungna ymmanruwhnii ae inche, ynchii tuva kachiiva ichiichu kamanghuwpa.’

⁵ Chukhaenache ama ing aafhuw alerchii atuur vakhae mee aechu a-eenpa. Ama ing maensa ningnache ariir, ‘Nang ing aafhuw i aajaehmeh natuursa?’

⁶ Ama ing abasang, ‘Marup nakhe chaama chakva.’ Ama ing aningna ariir, ‘Nang ing naseerpham ynziih niikha verinana ongla amanche ithupak ing songa jebaziihra.’

⁷ Aanuwnache reentaang yngkheh ningnache ariir, ‘Nangcha aajaeh natuursa?’ Ama ing abasang, ‘Gehu thuungfhuw chaama.’ Amana aningna ariir, ‘Aanziih niikha verinana somiriih baziihra.’

⁸ Amana ichummah rukuumtu inche iveerpak ing atu ari khaenache savangpa inche amanpah; akhaechuve ireng siti ae chungna laaruw paam mee ae inge entaksahsah suwnthar khaena athiseh ing veernae.”

⁹ Chukhaenache ki ing neningna kariirnah, ichummah lerchii thohche nataksah khaena naarang tusara, nachehmah raenche, enuw ing ichen naemah ongnii een nache ihebariimnii vaatae.

¹⁰ Chukhaenache achiihtina thachafhuwchu nong vakhae nakho ithachafhuwva, vokhehkho achiihtina ichummah meechu nong vakhaena chumchehmah.

¹¹ Nenuw ing ichummah lerchiina thachafhuw omah tanuwve, achuw ing ichum lerchii nache ithacha vatakhang?

¹² Chukhae-nache nenuw ing reentaang mee yngkheh lerchii nache thachafhuw omah chuwchu achuw ing nenta ynsuwhchu neningna ipiva takhang?

¹³ “Achuw ingkho aafhuw ynniimeh nong tuchehmah; akhaechuve yngkhehchu batir naka yngkhehchu aning mansiih vaata, changmah naka yngkheh khaena ngiirnaka yngkhehchu thosamahnii. Nenuw ing Thangnang re lerchii meenae tuchehmah tanuw.”

Jesu Chongjeer

¹⁴ Seer engadikpak Pharisi ae ing Jesu achongjeer vakhaechu ensiitah nache, enuw ing Jesu taklina enerku thep aeka emaniisahpa.

¹⁵ Amana Jesu ing eningna ariir, “Mee ae mik bareng nachembe nentaksah ing ichumpung ichii ing nemandennah, changvakonchu Thangnang ing nenbarungriir amang-huwsa; yngkhaena ynchii imbe mee ae kaarna ynding mee aechu Thangnang mik barengna yntirsuwh pakva.”

¹⁶ “Mosi vajeer chonghak havi Thangnang jaephar Johon ipha ing omvasahva. Changlaennii ing ataraennii ipha ing Thangnang iruwng-paam tanii isa chong thaminchu yntongjaehnah; chukhaenache mee vakhae ing amatingche ihungruwhva.

¹⁷ Changvakonchu vajeer chonghak achiihti ynthiir changve, thangbaen re laaruw paam imaang inche laehakna.”

¹⁸ “Achuw yngkheh ing arumee ynsaefhuw naka, reentaang rupanuw yngkheh buwhnave, ama ing reentaang rumee fhuwsar taklina ichuwhmah atupa, vokhehkho afhuwsar thoh ynsae rupanuwchu abuwh mee inche reentaang rumee fhuwsar taklina ichuwhmah atuva.”

Savangpa re Lazarus

¹⁹ “Apha vokhehna savangpa mee yngkheh om, ama ing amen iruwpak peendiir ynnarjaeh ing ynthongka anasiir rotharoh inungae ing ipaar.

²⁰ Amana ahakchaang aangkheng ipaen, savangpa sakaar kungna ongchak sarapak Lazarus ichii pasar yngkhehkho om,

²¹ ama ing savangpa buw sahniina yntachu saningka kaven manva sakata achii, vokhehkho uti aengkho ahakchaang ipaenchu theng aeka abareehchak ae.”

²² Amana sarapak meechu thiksa amanche vaarmee aenche Abrahaam changbaen nache ongnii khaena enruwpa. Savangpa chukho thikka endimpa;

²³ amanche atakchu longkong nache ijachaampak ing ongka paamkhuw ahenthiirtah nache, Abraham changbaen nache Lazarus ongchu laarkhehna ahemupa.

²⁴ Chu-khaenache ama ing ahengeenpa, “Apa Abraham, ki naning imanchuwhsara, Lazarus akikchar ingkhe chiina fhuwmsana kabari amandaenii khaena ajenchiir peehsara; ki mi sungna ijachaam inempak kaphasahnah!

²⁵ Changvakonchu Abraham ing ariir, ‘Yndenla sapa, nang ing naringlae isa inungae aangkheng napha, amanche Lazarus ing isamah chaap apha; changvakonchu atii hane ama ing nungaechu aphapa, amanche nang chuve ijachaam naphanah.

²⁶ Ama-chungna, havanennii ing naning ipha ingkhe iraen nungka achii aeng engaraenchehniimah khaena vokhehkho amatanii ingkhe kening ipha ing achuw ingkho aaraenchehniimah khaenache, nang re kenuw ynruwrakna ithuwhpak yngkuwng yngkheh ynlaapmahdeh ing omna.’

²⁷ Savangpa inche ariir, ‘Chunuwvaniive apa Abraham, nang ing atak i kapa eenting ijenchiirnii khaena nangchu kathamsahnahchii,

²⁸ akhaechuve kanae ae rungaemeh omnae, enuw vakhaechu havana ijachaamnii maphamne enghungruwhniimah khaena ijungriirpeeh rasiing.’ ”

²⁹ Changvakonchu Abraham ing ariir, “Engkhaenache Mosi vokhehkho jaephar ae ongnae; enuw enchongriirchu rungae ae rasiing.

³⁰ Vokhehkho ama ing ariir, ‘Changmahva apa Abraham, achuw yngkheh ithii vasah ae kaartanii ing eningting juwngnave, embarungriir huungvaatae.’

³¹ Ama ing aningna ariir, enuw ing Mosi vokhehkho jaephar ae chongchu thachamah ae nave, ithii ae kaartanii achuw yngkheh hangring naka enthachanii khaena ynneemsah rumahnii ae.”