LUK ING ABAZIIH ISA CHONG 13 - ITHAR CHONGHAK

Barungriir Huungnii Chongjeer

¹ Apha ichiinache Galili mee ae ing Thangnang ting ipeehfhuw chaatha chaap empeeh raenche, Pilaat ing atheh aechu Jesu ningna chong abajen mee topoh omsae.

² Amana Jesu ing eningna abasang, “Galili mee aechu changche ichii ing entheh khaenache, Galili mee ae kaartanii enuw inche isii icher sehpae ichii ing nemandenva?

³ Ki ing neningna kariirnah, changchen mahva; nenuw ing nenbarungriir huungmah tanga tanuwka, nenuwkho enuw vaange maangchir vanenta.

⁴ Changpang mahka Shilom na om yngkaangpak een inche atiihrae mee suum arii iriih derka ithii aenche Jerusalem sungna ong mee vakhae chungna isamah sehpae ichii ing nemandenva?

⁵ Ki ing neningna kariirnah, Changchen mahva; nenuw ing nenbarungriir huungmah tanga tanuwka, nenuwkho enuw vaange nengkheng maangchir vanenta.”

Ynlamah Thachang bur taklina Ynghuwnii

⁶ Jesu ing ynghuwnii thamin havi ariir: “Achuw yngkheh mee ing ingkhon sungna thachang bur yngkheh aphin; nikheh nache ama ing aanla ajongtah nache ynlamahsa.

⁷ Chutah-nache ama ing ingkhon khaenache aapaanii ningnache ariir, ‘Enla, kumthum sungna ki ing thachang bur havi aanla kajong tuwhmahsing. Fuwrtahra; havi inge ruwruwchu ikaniimah ing amangom i ynchii ikanii omkhang?’

⁸ Ingkhon aapanii inche aningna abasang, ‘Aafhuw, atiikum pangve omtahrasii, ki ing akuur manriningka chuwkata vokhehkho ruwruw mansakpheh katae.

⁹ Ama inuwnache basen naka hunganla nave saksa; changvakonchu ynlamah nave changlaenche fuwrtah vaanta.’ ”

Jesu ing Akuung Ipuum ing Ina Rupanuw Amandam

¹⁰ Jesu ing meekongnii yngkhehna isa thamin Deennii inii nache atong.

¹¹ Amanache enruw, kumsuum arii iriih sungna akuung puumka ina ynjik achehmah rupanuw yngkheh om.

¹² Jesu ing amachu amutah nache eenka aningna ariir, “Rupanuw, ina chiikha damsachii.”

¹³ Amana Jesu ing ataklina akik ing avepartah nache akuung ipuum ynjik achehmahchu damsa, vokhehkho ama ing Thangnang chu amanpahsah.

¹⁴ Changvakonchu meekongnii aapanii inche Jesu ing Deennii iniina amandam tahnache abarung sikka ama ing mee ae ningnache ariir, “Mee ing inii niruk sungna nong tunii omna; chukhaenache inii niruk sungnache ina vakhaechu mandamnii khaenache thengruw, Deennii iniine thengmahruw.”

¹⁵ Jesu ing abasang, isachaang itu ae! Nenuw nengkheng ing Deennii iniina nensiir nendaar nenphuwpchu bajoh chuwka taangting chii nenpeehmah vakhang?

¹⁶ Abraham sanuw havi enruw, kumsuum arii iriih chakna umlae ing suwrka om havicha Deennii iniina ynjohpham suwhmah khang?

¹⁷ Amana hava chong vakhae i riirka, Jesu atak ajeehnii vakhae mee aechu ningjak apeehpae; amanche Jesu ing hangjaehmeh isapak nong atu vakhae khaene mee changjaeh aenche enrotha irohsah.

Encham Muw re Chor taklina Ynghuwnii

¹⁸ Chukhaenache Jesu ing ariir, “Thangnang iruwngpaamchu ynchiithoh aanghakne? Vokhehkho ynchii thohche mandeeng vaanchiiva?

¹⁹ Havi chuve mee yngkheh ing encham muwchu chika aruwraena avorthoh aanghakna; amana aburchu hangmuwngka thingbur vaangche hungruungsa, vokhehkho abah taklinache vaati aeng enrabuw enghuwnah.”

²⁰ Athar vokheh Jesu ing ariir, “Thangnang iruwngpaamchu ynchiithoh mandeeng kate?

²¹ Amachuve rupanuw yngkheh ing jaam chika amana chor thohche manvaeka ahangpuur mahri raen-taangche asiith thoh aanghakna.”

Eenkhaar Ymbik

²² Havi aanuwdehna Jerusalem yntongting vasivachii nache, Jesu ing khuwruung chaapna vokhehkho akhuw siirna isa thamin tongka ivasi.

²³ Changlaenche mee yngkheh ing Jesu ningna ariir, “Aafhuw, ikarpeeh phava enchii mee aechu topoh pangti vachiiva?”

²⁴ Jesu ing eningna abasang, “Eenkhaar ymbik nache ivaruwhchehnii khaena karkhiingruw; neningna kariirnah, mee inempak ing amanache ivaruwhnii tuvaatae changvakonchu chehmahnii ae.

²⁵ Eensung aafhuw inche hangiir naka eenkhaar akam-pang aanuwnache nenuw ing taangna ngiir tanuwka, vokhehkho eenkhaar-chu ichum tanuwka, Aafhuw, Aafhuw, ibarangpeehra tavanenta. Apha ichiinache ama ing nenuw utanii vachuw ki manghuwmah chuwng tanaka ibasang vaata.

²⁶ Chang-laenche nenuw ing ichong basenva nenta, ‘Kenuw ing nang thoh kensah kenginhak, vokhehkho keng khuwruung nache ymmanchuwchii.’

²⁷ Changvakonchu ama ing tavaata, ‘Ki ing neningna kariirnah, nenuw utanii vachuw ki manghuwmah chuwng; kaningtanii ongmahruw, ichuwhmah nong itu vakhae ae!’

²⁸ Nenuw ing Abraham, Isak, Jakop, vokhehkho Thangnang jaephar vakhae aenche Thangnang iruwngpaamna ong aechu nemuraenche, nenuw chuve taangting iren naka ama mapham nache nengha iriir tanuwka ijachaam, ichap ichuw phava nenta.

²⁹ Amana mee aenche iniisuwh tanii, taetah tanii, ikang, irip tanii theng ae naka Thangnang iruwngpaam ongnii nache ongvaatae.

³⁰ Chukhaenache enruw, maensa inche ningkuur vaata amanche ningkuur inche maensa vaata.”

Jesu ing Jerusalem Aning Amansiih

³¹ Changlaen siimche achuw yngkheh Pharisi aenche vatheng aeka Jesu ningna enriir, “Hava mapham i bathen nana apham yngkheh ting sira; Herot ing nangchu thehningka ynchiinah.”

³² Amana Jesu ing eningna abasang, “Nenuw ing vaknuwna imi ningnakhe riirruw, ‘Amachuve enruw, atanii re atuknuwkho umlae aechu thurva katae, amanche ina ae chukho mandamva katae, amanche inii animanthumnii nache kanongchu manchichir vakata.’

³³ Changkhang nare ataniikho, atuknuwkho, amanche thiim nakho ki siva kachiiting bukna; akhaechuve Jerusalem taangna Thangnang jaephar ing ithiichu sakmahnii.”

³⁴ “O Jerusalem, Jerusalem, Thang-nang jaephar aechu thehchiika, vokhehkho rung ing nadeeng ae nang, aar afhuw ing atichu abatha ing aop vaangkhe vajaehmeh nasiti aechu opsa ae ningka kachii, changvakonchu nenuw ing irupeeh mahchuw!

³⁵ Chu-khaenache enruw, nenta rumniieen havi aruwh ing kamahpa. Ki ing neningna kajeernah, nenuw ing Aafhuw rumingna ijungtheng atak i aajaehmeh bor aphava tatanuwka nenriirmahri raentaang imumah tanuw!”