KOLOSIA 4 - ITHAR CHONGHAK

¹ Aafhuw ae, nenchungna thangbaen nache Aafhuw yngkheh omna ichii manghuw nuwna, nensuwh aechu isajaeh ing kuursa aeruw.

² Barungriir iruwh ing henthamnuwna ympah barungriir thoh ngiirtherruw,

³ amanche kengkhaena Thangnang ing achong tongnii re Khrista tanii ithuwh chongchu kemandang chehnii lam imongnaka,

⁴ amachu isajaeh ing kentong chehnii khae-nakho ithampeeh saruw.

⁵ Apha mamaangmahruw amanche taang-tanii mee ae ningnache ising iveer ing siruw.

⁶ Apha omba khaena nenchongna ningsiih ynvaesana mee vakhae ningna ynsaang basangva kenchiiva ichii chukho manghuwruw.

⁷ Taikikus ing ki ynsaangkhe ongning ichiichu neningna riirvaata; atak i nong isajaeh ing atu kening mansiih Aafhuw khaena nong kentufhuwva.

⁸ Havi khaenarap vokhehkho kenuw ynsaangkhe ongnung ichiichu ne-manghuwnii khaena amanche nenrotha amanrohnii khaena ama i neningna kavechiirva,

⁹ vokhehkho keningsiih kengarang, nong isa ing atu mee Onesimas thohkho ynruwhaknae. Enuw inge havane isuwh chaap aangkheng riirvaatae.

¹⁰ Kithoh kaeshum na onghak Aristarkas ingkho Barnabas aunaefhuw Mark ingkho nenuwchu salaam yntusahnah, (ama akhaena kavebaziih vasah khava, thengnave ibathungpeeh saruw.)

¹¹ Justus ruming areen Joshua ingkho nenuwchu salaam ynjetusahnah. Thangnang nong katufhuw kaarna enuw ae i vinchiip meepae, enuw inge kavaang inempak emanrum.

¹² Jesu Khrista nong atu nemee Ipaphras ing nenuwchu salaam ynvetusah thoh ynruw ing nenuw vakhae ing Thangnang yndentahna mapung ipha meechu ynsuwhnii khaena apha omba khaena athamsahrae eensiisahnah.

¹³ Ama akhaena ki ipirpak ing ngiirsakning, amachuve nengkhaena vokhehkho Laodesia re Hirapolis na ong vakhae khaena ipirpak ing nong atusa.

¹⁴ Kaningsiih ithiim Luk re Demas ingkho salaam yntusahna ae.

¹⁵ Laodesia na ong kauw kanae vakhaena amanche sanuw Nimpha eenna ruwrthiing engka vakhae ningna kaningtanii salaam ipipeeh saruw.

¹⁶ Hava chongthen i nempa inuwna Laodesia na ong ae ningna paaruw amanche Laodesia ruwrthiing tanii chongthen chukho paaruw.

¹⁷ Arkipas ningna jinge taruw, “Aafhuw ningtanii naraang nongkha amanchinii ing tura.”

¹⁸ Hava salaam chong i Pol ki katakrap ing kabaziihva. Katak i ynphuwp ingka ongning ichii eensiipeehruw. Neningna Thangnang atungsiihchu om ynsuwhrasii.