KOLOSIA 3 - ITHAR CHONGHAK

¹ Khrista thoh hangringhak vasahchuw vakhaka Thangnang tachangna Khrista ongnii chungtaniichu jongruw.

² Chungtanii khaenache nenbarungriir piruw, thangtanii laaruw paam khaenache pimahruw.

³ Akhae-chuve atii nenringkum i Khrista thoh Thangnang ningna ynthuurka omna.

⁴ Chukhaenache inuw vakhae ynringkumchu Aafhuw Khrista ing ajungindang raenche, nenuw vakhae chukho amathoh ynruwhak ing maepah ing yndangvanenta.

Baruw Ringkum re Ithar Ringkum

⁵ Chukhaenache nentaklina om laaruw paam barungriir chaapkha bathen chirruw; amachuve ichuwhmah nong, ynthiingmah, hakchaang ing aadik isamah amanche lae ruthaksii irum barungriir hava vakhae iva.

⁶ Hava vakhae khaene Thangnang barung sikniichu thengvaata.

⁷ Apha vokhehna chembe hava vakhae i neningna omka adernache isichuw.

⁸ Changvakonchu atiive hava vakhae i bathen chirruw: amachuve, barung isii, thirfhuwr, yngensiimah, sehmaner om vokhehkho ichong fhuwmah ichong hava vakhae i neningna omahrasii.

⁹ Yngkheh ing yngkheh taklina isamah chong chongmahruw, akhaechuve ajaennii baruw nong chaapkha nenlenchir vasahva,

¹⁰ atii Eeseem Aafhuw chu nemanghuw khaena ithar mee ynsuwh sachuw.

¹¹ Atiive aden ing Grik naemahnii, Jehudi naemahnii, vinchiip aere vinchiipmah naemahnii, Reentaang mee vokhehkho Saithian mee, suwh re suwhmah mee tiimahnii, changvakonchu Khrista chuve aangkheng khaena rutumva, amanche aningna aangkheng yngkhehpang vatah.

¹² Atiive, ynthiing kaningsiih ae, Thangnang ing eeteer vasah mee vachuw khaka nentaklina meening manchuwhnii, rukuum tunii barungriir, ynjuursah, iduwr, ikhaangcheh,

¹³ vokhehkho yngkheh re yngkheh ynchaar nuwna, Aafhuw ing yngkuhpeeh vaang nenuw yngkuhpeehruw.

¹⁴ Hava vakhae chungne barungriir yngkhehpang ing amangomcheh vokhehkho afhuwpcheh ningsiih barungriirchu reenruw.

¹⁵ Yngkhehpang ing omnii khaena nenuwchu yngeen vasah Khrista tanii idaechu nentaklina omlasii. Havi khaene manpahruw.

¹⁶ Khrista chongsaechu nentaklina isa ing vokhehkho ynriimjor ing omsana ising iveer thoh ynruw ing yngkheh re yngkheh ynriirpeeh nuwna nen-barungriirna Thangnang ympahthoh ynruw ing ympahnii la, iseeng la vokhehkho ynthiing lachu tupohruw.

¹⁷ Amanche nentu nenri aangkhengna, nong vakhang nakho, chong ing vakhang nakho, aangkhenglaangna apa Thangnang chu Jesu jaarna nenbarungriirna ympahthoh ynruw ing turuw.

Khristian Eengkuw Paarnii

¹⁸ Rakhiinii vasah ae, Aafhuw ningna matik icha mee vaang ing nenfhuwsar ae derna ongruw.

¹⁹ Fhuwsar vakhae nenrumee aechu nening mansiihruw, amanche entaklina ipirtuh ing omahruw.

²⁰ Naepang ae, nenuw nempa chongriir manjiiruw, havi Aafhuw ing aadikchuva.

²¹ Ampa ae, nensiti ae taklina barung siknii tumahruw, amachu inche enuw duhvaatae.

²² Suwh ae, nenuw aangkhenglaangna nengafhuw ae chongchu manjiiruw, mee ing ymmunii khaena pangche nong tumahruw, changvakonchu Aafhuw nengajathoh ynruw ing nong turuw.

²³ Nenong nentu nache mee taklina kentuva ichii mandenru ing Aafhuw ningna kentuva taruw,

²⁴ Aafhuw ningtanii lerchii phava kenchiiva tanuwna rotharoh ing turuw; nentu nenri i Aafhuw Khrista anongchu nentuva.

²⁵ Ynraar nong atumee inche ynraar nongmenchu phavaata, amanche havi khaene adongchang omahnii.