JOHON 7 - ITHAR CHONGHAK

Jesu vokhehkho Anae ae

¹ Havi aanuwna Jesu ing Galili ting sisa; akhaechuve Jehudi aatuaricheh aenche ithehnii khaena enjong.

² Atii Jehudi ae Ynsennii Kuurva aaniichu hunganeengsa,

³ chu-khaenache Jesu anae aenche aningna enriir, “Hava mapham i bathen nana Judia paam ting sira, amana nasebok aenche natu nari nongchu muvaatae.

⁴ Mee ing imanghuw rasiing achii mee inche anongtuchu thuurmahchak. Chukhaenache nang ing hangchii i natu vanave, nataksah ing laaruw paamne mandangsara.”

⁵ (Ama anae ae rap ingkho aningna thachamah ae.)

⁶ Jesu ing eningna ariir, “Ki kakhaena apha ichiichu hemphamahri, changvakonchu nengkhaena apha chuve anasiirna omna.

⁷ Nenuwve laaruw paam mee aeng ibatirmah ae, changvakonchu ki chuve ymbatirnah ae, yngkhaena ynchii imbe entu enri vakhae sakmah ta ingka kariirpa.

⁸ Nenuw kuurva tingche sisaruw; ki chuve havana kuurva i simahning, akhaechuve kakhaena apha ichiichu hemphamahri.”

⁹ Havi riirka ama ing Galili nache ongsa.

Ynsennii Kuurvana Jesu ynvae

¹⁰ Anae aenche kuurva tingche ensi aanuwna Jesu kho isi; changvakonchu ama ing yndang ing siru ing ynruwhjaeh ing isi.

¹¹ Jehudi aatuaricheh aenche kuurva sungnache jong aeka vokhehkho unakhe ongne ta aeka mee ae ensii.

¹² Amana mee aenche ataklina aajaeh ichong ae. Mee topoh aenche atak i isapak meeva ta aeka enriir. Mee areh aenche ama sakmah, ama ing mee aechu arehting aruwnah enchii.

¹³ Changvakonchu achuw ingkho yndang ing riirmah ae, akhaechuve enuw ing Jehudi aatuaricheh aechu enchiitah nava.

¹⁴ Kuurva entuchu achimbang ahenpha ruvaena Jesu ing Rum-niieenna vakka amanchuw ae.

¹⁵ Jehudi aatuaricheh aenche ngik aeka vokhehkho enriir, “Hava mee inge thiimziih ateen chahsiing angjaehmeh amanghuwva?”

¹⁶ Jesu ing abasang ae, “Ki ing kamanchuwchuw i kaningtanii mahva, changvakonchu kichu ynjenchiir aning taniiva.

¹⁷ Thangnang ing amanden tuningka achii achuw yngkheh in-chembe kachong i Thangnang taniiva changmahka kaningtanii sahva ichiichu manghuw vaata.

¹⁸ Achuw yngkheh ing ataksah tanii ariir chuve ympahsah iphanii khaena atuva; changvakonchu atak ajenchiir meechu ama ing ympahsah phanii khaena atuchu ichum meeva, amanche aningnache ynraar ichii yntanga omah.

¹⁹ Mosi ing vajeer chonghak ipimahkhang? Changvakonchu nenuw achuw yngkheh ingkho vajeer chonghakchu manjiimahchuw. Ynchii khaena nenuw ing kichu ithehnii khaena ynjong vachuw?”

²⁰ Mee ae ing embasang, “Nataklina umlae chuwngsa! Achuwva theh kachii taka ynjongchu?”

²¹ Jesu ing enuwchu abasang, “Ki ing laetho yngkheh katutahna nenruw riimna.

²² Mosi ing nensiti aechu vinchiip khaena ariirpa (amachu Mosi ing abasenmah vakhangnare, nenfhuw fhuwven aeng embasen vasahva), amana nenuw ing Deennii inii nache vinchiipchu nentupa.

²³ Nenuw nensiti aechu Deennii inii nache vinchiip tutanuwve, Mosi vajeer chonghakchu kiimah, amachu ynchii khaena Deennii iniina meechu kamandam tahna kataklina nenbarung isiiva?

²⁴ Taangna adongchang ing vajeer tumahruw, changvakonchu ichum inche vajeer turuw.”

Atak i Mesaija chuva?

²⁵ Jerusalem mee topoh aenche enriir, “Hava mee i mahvakhang aatuaricheh aeng thehkenta enchiikha?

²⁶ Enruw, ama ing mee kaarna chongna amanche enuw ing aningna yntangakho riirmah ae! Havi aatuaricheh aeng atatak ing Khrista chuva ichii emanghuwtah nava?

²⁷ Changvakonchu Khrista ing ajuwnglaenche, achuw ingkho utanii ithengva ichii manghuwmahnii. Havana mee ichuve inuw ing utanii ithengva ichii ymmanghuwsa.”

²⁸ Jesu ing Rumniieenna aman-chuw ae raenche senruwr ipirpak ing uungka ariir, “Nenuw ing ki i achuwva vokhehkho utaniiva ichii atatak ing ymmanghuw sachuw? Kataksah aatuaricheh ing ijuwng mahping; kichu ynjenchiir atak chuve ichumva. Nenuwve atakchu manghuw mahchuw,

²⁹ changvakonchu kive kamanghuwsa, akhaechuve ki i aning taniiping amanche ama ing kichu ynjenchiirva.”

³⁰ Chukhaenache enuw ing atakchu suwrkenta enchii, changvakonchu achuw ingkho ataklina vabachuw chehmah ae, akhaechuve akhaena aphachu hemphamahrisa.

³¹ Changva-konchu mee changjaeh kaarnache athacha mee ynvae aeka vokhehkho enriir, “Khrista ing ajuwnglaenche hava mee inge laetho atu ithi ing tuvachiiva?”

Laarchang aechu Jesu Isuwrnii khaena Enchiir

³² Mee changjaeh aeng Jesu taklina ichong aechu Pharisi aeng ensiipa, chukhaenache aanchung jaethiim aenche Jesu isuwrnii khaena laarchang aechu enchiir ae.

³³ Jesu ing amana ariir, “Apha topoh khaenapang nenuw thoh onghakva kata amanche aanuwna chembe kichu ynjenchiir abuum tingche ynriva kata.

³⁴ Nenuw ing kichu ijongva nenta changvakonchu ituwhmah tanuw, akhaechuve kaongnii tingche nenuw isi chehmah tanuw.”

³⁵ Jehudi aatuaricheh aenche enareer sungna enriir, “Ama ing uting sinaka tuwhmah vaanchiiva? Grik ae khuwruung chaapna inuw ymmee ae ynsaenong aeka ong ae ningting sinaka amana Grik aechu manchuw vachiiva?

³⁶ Ama ing ijongva nenta changvakonchu ituwhmah tanuw, vokhehkho ki ing ongvakachii nache nenuw ing huungchehmah tanuw achiinah. Havi ynchii achiiniiva?”

Iringnii Chii Ympeeh

³⁷ Achinii vokhehkho athurfhuw kuurva inii nache Jesu ing hangiirka iruur ipirpak ing ariir, “Achuw yngkheh achii iraar mee inche kaningting huungsana inrasiing.

³⁸ Ynthiing thiimziih ing ariirsa, ‘Kichu ynthacha mee ningnache abarungriir tanii iringnii chiitaang chiichu ruwngvaata.’ ”

³⁹ Jesu ing ariir havi laetha khaenava amanche aningna athacha mee aenche amachu phavaatae. Changlaen chembe laetha ichiichu jepimahri, akhaechuve Jesu alaar isachu ithohmahri.

Mee aechu Jesu khaena Asiksik Suwhvachii

⁴⁰ Mee inempak kaarna mee topoh aenche ariirchu siiaeka vokhehkho enriir, “Hava mee i jaephar remchu varae.”

⁴¹ Areh aenche Khrista chuva enchii. Changvakonchu mee topoh aenchembe Khrista chu Galili tanii thengva chiiva enchii.

⁴² Ynthiing thiimziih ing ariir chuve Khrista chu Iruwng Devit tuti tanii vachiiva vokhehhko Devit ing apaarnii Bethlehem khuwna omva chiiva achiisa.

⁴³ Chukhaenache mee aechu Jesu khaena aruwr asiksik suwhsae.

⁴⁴ Mee areh aenchembe suwrnungka achiiae, changvakonchu achuw ingkho engkik ing vabachuw chehmahsae.

Jehudi Aatuaricheh aenche Enthachamah

⁴⁵ Laarchang aenche aanchung jaethiim aere Pharisi ae ningtingche hunganrisae, amana enuw ing enriir, “Ynchii khaena atakchu nenghenruw mahva?”

⁴⁶ Laarchang aenche embasang, “Achuw yngkheh ingkho ama ing ichong vaange chongmahri enchii.”

⁴⁷ “Nenuwkho ama ing aasiirting ynruwva?”

⁴⁸ “Aatuaricheh ae changmahka Pharisi aenche aningna enthachapa ichii yngkheh tanga ne-manghuwse?

⁴⁹ Havana mee hangjaeh inem ae inge Mosi vajeer chonghakchu emanghuwmah tahnache, Thangnang siraap dernache ongpae!”

⁵⁰ Nikodemas ichii Jesu aantuwh-fhuw vasah, Pharisi ae kaartanii ama inche eningna ariir,

⁵¹ “Inuw ynvajeer chonghak inuwzii ing aningtanii chong ynsiimah rirae vokhehkho ynchii atuva ichiichu yntuwhmahri raenche inuw ing meechu manraar chehmahmuw.”

⁵² Enuw ing embasang, “Nangkho Galili tanii vachii? Ynthiing thiimziih nache jongla amanche jaephar achuw ingkho Galili tanii thengmahnii ichiichu muvaanta.”