JOHON 5 - ITHAR CHONGHAK

Rumchii kuurna ina amandam

¹ Havi aanuwna Jesu ing Jerusalem na Jehudi ae kuurva entu nache isi.

² Jerusalem na Jao suwngkung ichii nache eensukreen asae rungameh rumchii kuurnache om; amachu Hebreeu chong ing Bethesda enchii.

³ Amana mikchu, khi kik ibong, amanche hakchaang ithiipoh ing ina aenche ama rumchii kuurnache yntorpoh ae,

⁴ akhaechuve marak marakna vaarmee inche rumchiichu aanohchak. Changlaenche maensa ing aparcheh ina meechu idam chakpae.

⁵ Ama kaarnache kum songthum arii eeriih chak sungna ihungna sapa yngkheh ynvae.

⁶ ma yntorjaehchu muka, vokhehkho apha iseehpak ing ihungna chukho manghuwka aningna asii, “Nang dampak ningka nachiinah?”

⁷ Ina sapa inche abasang, “Oja, rumchii aanoh chaklae amatinge ivedom vachii mee omahka, kachehmah romrom ing kajuk incha mee maensadoh chakva.”

⁸ Changlaen siimche Jesu ing ariir, “Hangsuwra, amanche naduup pomna-na sira.”

⁹ Amana inachu vadamsa vokhehkho aduupchu pomka isi achehpa. Havi Deennii inii nache isuwhva,

¹⁰ chutahnache Jehudi aatuaricheh aenche idam meechu atanii Deennii iniina nang ing naduup naadom i vajeer chonghak nabakhiisa ta aeka enriir.

¹¹ Ama ing ki ymmandam mee inche, naduup pomnana sira achiitah nava taka abasang ae.

¹² Enuw ing ensii, “Achuwva havi tura achiichu?”

¹³ Changvakonchu idam mee inche Jesu va ichii manghuwmahsa, amana Jesu inche mee kaartanii ynruwhjaeh ing suwhsa.

¹⁴ Athar Jesu ing ama meechu rumniieen nache aantuwhfhuwrae ariirpeeh, “Atii damsachii, rungaera athar vokheh isii tumahra, havi chungna isamahpak naningna isuwh-kho arusa.”

¹⁵ Ama mee inche hungsuwhka Jehudi aatuaricheh ae ningna ama ing athacha meechu Jesu va taka amanthang.

¹⁶ Chukhaenache Jehudi aenche Jesu chu Deennii iniina ina amandam khaena ynnang embasenpa.

¹⁷ Amana Jesu ing abasang ae, “Kapa ing nong atunah, ama khaena kikho tuva kachiiva.”

¹⁸ Ama achongriir nache Jehudi aatuaricheh aenche ithehnii enjongpa; Deennii vajeer chonghak abakhii khaenapang mahka, ama ing Thangnang chu kapava achiinah vokhehkho ataksahrap Thangnang thoh amanchimpa.

Asapa Jesu Aatuaricheh

¹⁹ Jesu ing abasang, “Atatak ing kariirnah: kapa ing atuchu mu ingka katumah naka, Mee Sapa inche anum ing yntanga itu chehmah. Ampa ing atuchu asapa ingkho atuva.

²⁰ Ampa inche asapa chu aning mansiihka atu ari chaapchu amansiiva. Havi chungna iruung iruung aajaehkho mansii vaata, amanache nenuw ngikva nenta.

²¹ Ampa inche ithii amanring vaang, asapa ingkho pining achii ningnache apeehnah.

²² Ampa ing achuw tikho vajeer tumah. Asapa ningna vajeer itunii aatuaricheh aangkheng apeehsa.

²³ Amanche mee vakhae ing ampa aajavaang, asapa chukho ijavaatae. Achuw yngkheh ing asapa chu ijamah nave ajenchiir ampa chu aajamahva.”

²⁴ Atatak ing kariirnah: Achuw yngkheh ing hava kariir chaap i rungaeka amanche ki ynjenchiirchu athacha mee inche ichen naemah ringkum phavaata. Entaklina vajeer yntumahnii changvakonchu ithii tanii iring emphapa.

²⁵ Atatak ing kariirnah: Aphachu thengsa-apha ichiichu ahenphadehpa-ithii aenche Thangnang sapa iruurchu siivaatae, amachu asiichaap aenche iring phavaatae.

²⁶ Ampa taklina ringkum suwhnii om vaange, asapa ningna chenkho ringkum suwhnii apeehpa.

²⁷ Asapa chu mee taklina vajeer itunii aatuaricheh apeehpa, akhaechuve atak i Mee Sapa chutah nava.

²⁸ Havi khaena nenuw ngikmahruw; ithii vakhae aenche asenruwrchu siiva enchii apha ahenphapa.

²⁹ Thaen tanii hungsuwh vaatae; isa atu vakhae aenche hangring ae naka paarvaatae amana isii atu vakhae aenche hangring ae naka achinii vajeer phavaatae.

Jesu Asaarkhii

³⁰ “Kataksah aatuaricheh ing yntanga itu chehmah ing; Thangnang ing ajeriir nache vajeer katu vatah, amatah nache kavajeer i ichumva, yngkhaena ynchii imbe kamanden-sahna tumah ing changvakonchu ki ynjenchiir amanden inuwzii inche katu vatah.”

³¹ “Kasaarkhii i kamandensah tanii vanave ichumrem chuva ichii rumahnii.

³² Changvakonchu kathenna saarkhii apeeh yngkheh omna, ama ing ariirchu chumna ichii kamanghuwsa.

³³ Johon ningting nenuw ing chongjeermee nenchiir, amanche ama ing ichum inche ajeer.

³⁴ Ki chuve mee ningtanii saarkhii kaphamahva; Hava kajeer inge nenuw vakhae nenringnii ynsuwh vaata.

³⁵ Johon kha jaemi chuwhka vokhehkho ynreen thoh aanghakva, amanche nenuw ing apha topohpang khaena ireng nache nenrotha manroh nungka tavanenta.

³⁶ Kakhaena saarkhii kadeensa, havi Johon ing ympeeh saarkhii chungna ruunghakna. Katu chaap i kapa ing atu inuwzii ing katuva, ama inche kathenna ariirnah vokhehkho kapa ing kichu ynjenchiirva ichii amandangniisa.

³⁷ Ki ynjenchiir kapa ingkho kathenna saarkhii apeehsa, amanche nenuw ing asenruwrchu siimah dehchuw vokhehkho amaekho mumahchuw,

³⁸ amanche ajaera chukho nenbarung-riir sungna siimahchuw, akhaechuve ynjenchiir ningnache thachamah sachuw.

³⁹ Ynthiing thiimziih chuve nenpanah, akhaechuve amanache ichen naemah ringkum tuwhva kenta ichii nemandenpa. Changvakonchu ynthiing thiimziih inchembe kakhaena saarkhii pika chongna.

⁴⁰ Changkhang nakho atanii ipha ing kaningting ringkum iphanii khaena huungmahchuw.”

⁴¹ “Ki ing mee ae ningtanii ympah-chu jongmah ing.

⁴² Nenuw ynchii mee vachuw ichii kamanghuw sachuw, vokhehkho nenbarungriir sungna Thangnang ningsiih deenmahchuw ichiikho kamanghuwsa.

⁴³ Kapa aatuaricheh thohche ki ijuwngping amachu nenuw ing iheri mahchuw; changvakonchu achuw yngkheh ing ataksah aatuaricheh thoh juwngnave herivanenta.

⁴⁴ Nenuwve yngkheh ing yngkheh isuursah nengadiksa, changvakonchu Thangnang tanii isuursah iphanii chuve jongmahchuw. Amachu inche kichu ynsaangkhe ithachava nenchiiva?

⁴⁵ Kapa ningna ki ing nenuw i manraarva kachuw ichii ing kharmahruw. Mosi ningna ningmanden nemangom ingkhe nenuwchu imanraar savaata.

⁴⁶ Mosi chu atatak ing nenthacha vanave kichu ithachava nenchiiva, yngkhaena ynchii imbe ama ing ki achuwva ichiichu abaziihchir vasahva.

⁴⁷ Changvakonchu ama ing abaziih nenthachamah vakhaka, ki ing kariirchu ynsaang khenche thachava nenta?”