JOHON 3 - ITHAR CHONGHAK

Jesu re Nikodemas

¹ Pharisi ae ruwr tanii Jehudi upa aruming Nikodemas ichii yngkheh om.

² Jaenkhehna ama ing Jesu ningtingche vakka aningna ariir, “Rabi, nang i Thangnang ing ynjenchiir oja vachii ichii kamanghuwsa. Thangnang ynvaemah naka laetho hangjaeh natu i achuw ingkho chehmahnii.”

³ Jesu ing abasang, “Atatak ing na-ningna kariirnah, achuw yngkheh ing athar ynringreeh mahnave utaraenkho Thangnang iruwngpaam mucheh mahnii.”

⁴ Nikodemas ing Jesu ningna asii, “Mee inche ynsaangkhe athar naeduung vaang ynringreeh vachii vareeh? Ama ing utaraenkho athar amnuw ven rupumting ruwhreeh naka ynring chehmah nareeh.”

⁵ Jesu ing abasang, “Atatak ing naningna kariirnah, chiina vokheh-kho laethana ynringmah meechu utaraenkho iruwngpaam ruwhcheh mahnii.

⁶ Mee i amnuw ampa tanii hankchaang inuwzii ing ynringva, changvakonchu ama chuve laethacher nache ynringva.

⁷ Nenuw athar ynring-reehva nenchiiva ta ingka kariirne nang ngikmahra.

⁸ Sii ing raangningka achiitah tingche raangna; amachu nenuw ing ahuwrusa nensiinah, changvakonchu utanii ithengva changmahka utingkhe sine ichii chuve manghuwcheh mahchuw. Laethana yngringreeh vakhae chaap havi thohne aanghakva.”

⁹ Ynsaangkhe havichu suwhva chiiva taka Nikodemas ing asii.

¹⁰ Jesu ing abasang, “Nangve Isrel sungna athurfhuw aanchuwmee yngkheh chiika ynsaangkhe havi namanghuw mahva?

¹¹ Ki ing na-ningna atatak ing kariirnah: Kenuw chuve kemanghuwchu kenriirva, changvakonchu havi achuw ingkho thacha nungka tamahchuw.

¹² Laaruw paam tanii kariir chong nenthacha mahchu; ynsaangkhe thangbaen tanii kariir chongchu thachava nente?

¹³ Thangbaen tanii ijuwng Mee Sapa chumah naka achuw ingkho thangbaen karmahri.”

¹⁴ Paamfhuw nache Mosi ing siir baruwr aathoh vaangkhe Mee Sapa chukho ithoh vaatae,

¹⁵ amanche aningnache athacha mee vakhae aenche maangmahnii ae chang-vakonchu ichen naemah ringkum phavaatae.

¹⁶ Thangnang ing laaruw paam inempak aning amansiih khaenache asapa yngkhehpangchu ynjepeehsahpa, achuw yngkheh mee ing aningnache thacha nave maangmahnii changvakonchu ichen naemah ringkum phavaata.

¹⁷ Thang-nang ing asapa ajenbathenchu laaruw paam vajeer tunii khaena mahva, changvakonchu ama ajaarnache laaruw paam ing ikarpeehchu phanii khaenava.

¹⁸ Chukhaenache aningna athacha mee chuve vajeer tumahsa; changva-konchu aningna athachamah mee chuve vajeer chisa, akhaechuve ama ing Thangnang sapa yngkhehpangchu thacha mahsa.

¹⁹ Haviva vajeer ichiichu, amachuve laaruw paamne irengchu thengsa, amachu mee ae inche ireng ening mansiihva enchii changdenna ynthimchu ening emansiihsehpa, akhaechuve enuw enong chaapchu sakmahsa.

²⁰ Isamah atu vakhae aenche irengchu embatirnah, vokheh-kho ireng nache huungmah ae, yngkhaena ynchii imbe ama ing atu ari isamah chaapchu yndang naka tamahsa.

²¹ Changvakonchu achuw yngkheh ichum atu chuve anong vakhae nache Thangnang chongriir amanjiichu ynthiingkiir ing yndangnii khaenache ireng nache huungna.

Baptis Johon re Jesu

²² Havi aanuwna Jesu ing asebok aethoh Judia paam nache inii topoh vacheeng aeka mee baptais emantu.

²³ Johon ingkho Salim kuurna om Enon iva nache mee baptais amantu, akhaechuve amanache chii inempak om; amanche mee aenche aningnache theng aeka baptais atuae.

²⁴ Havi Johon chu kaeshum ting engkhum-mahri raenniiva.

²⁵ Atii Johon asebok aere Jehudi yngkheh thohche ynthiingnii khaena chong ynsangsae.

²⁶ Chukhaenache enuw ing Johon ningting huung aeka enriir, “Rabi, Jordan laarna ynruwhak chuwka saarkhii napeehkha havane ongna, amanche mee vakhae ing aningna theng aeka baptais entunah ae.”

²⁷ Johon ing abasang, “Thangbaen tanii ing aningna jepimah naka, achuw ingkho phacheh mahnii.

²⁸ Havana kariir i nentakrap ingkho kasaarkhii nachuw, ‘Ki Khrista chumahping, ama ajungtheng mahrirae ynjebathen chuping.’

²⁹ Songnuw i songpa rutum chuva; changvakonchu songpa khaena ingiir, achong arungae aarang chuve songpa senruwr asiiraenche inempak arotha rohna. Chukhaenache havana karotha iroh i atiive areersuwhsa.

³⁰ Amave hungruung sehseh vaata, ki chuve jungtak sehseh vakata.”

Thangbaen tanii Ijungtheng

³¹ Chungtanii ijungtheng chuve aangkhenglaang taklina ruungsehna; laaruw mee chuve laaruw tavaata amanche laaruw khaena riirvaata; chungtanii ijungtheng chuve aang-khenglaangna ruungsehna.

³² Amave amu re asii vakhaechu ariirnah, amachu achuw ingkho asaarkhiichu herimahsae.

³³ Achuw yngkheh asaarkhii aheri mee inchembe Thangnang i ichum remva taka amangiirnah.

³⁴ Thangnang ing ajenbathen mee inche Thangnang chongchu ariirnah, akhaechuve Thangnang ing aningnache laetha ynriimjor ing apeehsa.

³⁵ Ampa inche asapa chu aning mansiihka amanche akiklinache aangkheng amansir chirpa.

³⁶ Achuw yngkheh mee ing asapa ningnache thacha nave ichen naemah ringkum aphapa; asapa chongriir amanjiimah mee chuve iringnii ringkum imu phamahnii, changvakonchu ataklinache Thangnang barungsii omjaeh vaata.