JOHON 20 - ITHAR CHONGHAK

Thaen Aruwh ing Heom

¹ Atii niisin abasemnii ahaarpa inii nache, Meri Magadalen ing aarkhiim nache thaen ting avaktah nache thaen kamnii rungchu ymmongka heom amupa.

² Amana Jesu ing aning amansiih Simon Pitar ningnare sebok yngkheh ningting vataenka avariir, “Aafhuw kha thaen tanii engasuwpa, amachu una ensiihsamo aomnii ynghuwmahsa!”

³ Pitar re sebok yngkheh inche thaen tingche vaksae.

⁴ Enuw ivataenhak ae, changvakonchu sebok yngkheh inche Pitar chu thijopka maensa ing thaenchu avepha.

⁵ Ama ing khupka aabuwrtah nache asungna peen yntorchu amu, changvakonchu asung tingve varuwhmah.

⁶ Ningkuur ing ivatung Simon Pitar inche vephaka thaensung tingche varuwhsa amana asungna peen hengantorchu amu,

⁷ vokhehkho Jesu rusae ynveennii peen chukho om. Ama peen chuve yngkheh thohche omhakmah changvakonchu ynthep ing heom.

⁸ Amana maensa ing ivatung sebok yngkheh khakho avaruwhtah nache muka athachapa.

⁹ (Changvakonchu ithii tanii hangring vaata ichii ynthiing thiimziih kha enuw ing manghuwmah riae.)

¹⁰ Amana sebok aenche engeen ting ynrisae.

Jesu ing Meri Magadalen ningna Yndang

¹¹ Meri inche thaenkhur ataang nache ngiirka ichap. Ama ing achap baram baram ing jukhupka thaenchu aabuwrpa

¹² amana ivaarjaeh ing ynthong ae vaarmee ynniimeh, yng-kheh ing Jesu yntornii arusae ruvaena amanche yngkheh inche akhi ruvaena ong aechu avemu.

¹³ Amana enuw ing aningna envesii, “Rupanuw, nang yngkhaena ichap vachii?” Ama ing ajebasang ae, “Ki kaafhuw chu enripa amanche unakhe ensiih vamo manghuw mahsing.”

¹⁴ Amana aruvae nache avaanlehtah nache Jesu ingiirchu amu; changva-konchu ama ing Jesu va ichii manghuwmah.

¹⁵ Jesu ing aningna asii, “Rupanuw, nang yngkhaena ichap vachii? Achuwva nang ing najongchu?” Ama ing amanden chuve atak i ingkhon aafhuw varapmuw taka aningna ariir, “Oja, nang ing naneeng vaniive iriirpeehra, unakhe naneengva, ki ing vakningka varisa kata.”

¹⁶ Jesu ing aningna “Meri!” achii. Ama ing aantongting vaanlehka Hebreeu chong ing ariir, “Raboni” (Havi arutho chuve Oja achiiniiva.)

¹⁷ Jesu ing ariir, “Kataklina iparmahra, akhaechuve ki kapa buumting ynrimahri ing. Nang yngkae-nana kauw kanae ae ningna hungriirla, ki kapa, enuwkho empa amanche ka Thangnang, enuw khaenakho Thangnang ningtingche ki ynrikata.”

¹⁸ Meri Magadalen ing yngkaeka sebok ae ningnache Jesu kamu ahungchiipa; amanche ama ing havi Jesu ing kaningna ariirva achii.

Jesu ing Asebok ae ningna Yndang

¹⁹ Abasemnii niisin inii khuri nache sebok aenche Jehudi aatuaricheh aechu chiiaeka engongnii eenkhaarchu kampang aeka ongpoh ae. Apha ichiinache eenkhaar kungna Jesu ing vangiirka ariir, “Idaechu neningna omrasiing.”

²⁰ Havi ariir aanuwnache akik vokhehkho adeep aechu amansii ae. Sebok aenche Aafhuw chu emutah nache inempak enrotha irohsah.

²¹ Jesu ing athar vokheh ariir, “Idaechu neningna omrasiing. Kapa ing ki ynjenchiir vaange, nenuw ikho ki ing kachiirnahchuw.”

²² Amana eningting jehuka ariir, “Ynthiing laetha i iraangruw.

²³ Nenuw ing mee ae isiichu kuhpeeh tanuwve, yngkuhpeeh vaata; nenuw ing kuhpeehmah tanuwve, yngkuhpeeh mahnii.”

Jesu re Thomas

²⁴ Jesu atheng raenche sebok ae kaarna ynvae yngkheh aruming Thomas (ymphuwr kho enchii) ynvae-mah.

²⁵ Amatah nache areh aeng Aafhuw kha kenuw ing kemupa ta aeka aningna entong. Thomas ing eningna ariir, “Akikna jopi buw kamumahri raentaang, amanche akikna abuw om taklinache kakikchar ing kapar mahri raentaang vokhehkho adeep nache kakik ing kaparmahri raentaangche, ki thacha mahning.”

²⁶ Inii neeriih aanuwnache athar vokheh sebok aenche eensung nache ongsae, ama kaarnache Thomas kho ynvaesa. Eenkhaarchu yngkamkhang nakho, Jesu ing engkaarna vangiirka ariir, “Idaechu neningna omrasiing.”

²⁷ Amana Jesu ing Thomas ningna ariir, “Nakikchar kha hane siira, amanche kakik i enla; vokhehkho kadeepne nakik ing veparla. Atii ithachamah kha manchen nana ithachara!”

²⁸ Thomas ing abasang, “Ki kaafhuw, vokhehkho ka Thangnang!”

²⁹ Jesu ing aningna ariir, “Ki ymmutah nachii nathachava? Kichu imumah khang ae nakho ynthacha mee aechu bor aphapae!”

³⁰ Jesu ing asebok ae maekungna laetho inempak atu aanem hane ynziihmah omna.

³¹ Changvakonchu havana ynziih inge Jesu i Khrista chuva, Thangnang sapa chuva ichii thachanii khaena amanche ama arumingna ithacha ajaarnache nenuw ing iringnii phanii khaena chenva.