JOHON 19 - ITHAR CHONGHAK

¹ Pilaat ing Jesu chu ruwka ithipak ing amambinpae.

² Laarchang aenche iring abah ing phurchii seem aeka Jesu arusae nache emangkhum; vokhehkho peen isen mansing aeka

³ vokhehkho vaneeng aeka Jehudi ae Irunwg Ringkum iseehpak ing ringraso ta aeka enriir. Amana enuw ing engabeengpa.

⁴ Pilaat ing athar jungsuwhka eningna ariir, “Enruw, ki ing atarae neningting jenbasuw vakata, amachuve ataklina ki ing ynraarfhuw yntanga tuwhmah ing.”

⁵ Chutahnache Jesu ing iring phurchii re isen peenchu singka jungsuwhsa. Pilaat ing eningna ariir, “Enruw, mee havi!”

⁶ Aanchung jaethiim aere Rumniieen aarung laarchang aenche enjemutah nache va-uung aeka enriir, “Khros taklina ynjamrasiing! khros taklina ynjamrasiing!” Pilaat ing eningna ariir, “Nenuw ing ruwnuwna jamsatahruw, ataklina ki ing miraar tuwhmah ing.”

⁷ Mee aenche embasang, “Ken vajeer chonghak inuwzii ing ama thik rarap vachiiva, ama ing Thangnang sapa ping achiinah.”

⁸ Pilaat ing ama chongchu asiitah nache ynchik sehsehsa.

⁹ Ama ing vajeernii eetingche athar huungka Jesu ningna asii, “Nang utanii itheng vachii?” Changvakonchu Jesu ing yntanga basang mahsa.

¹⁰ Pilaat ing aningna ariir, “Nang ibasang mahva nachiiva? Ki ing nangchu ynthennii vokhehkho khros taklina ijamnii ruwreng kadeensa ichii namanghuw mahva.”

¹¹ Jesu ing abasang, “Nang ing kataklina ruwreng nadeen i Thangnang ing ympitahna vatah. Amatah nache kichu naningting ympeeh mee taklinache iruungpak isii omna.”

¹² Amachu asiitah nache Pilaat ing Jesu chu ynthennii akhur ajongpa. Changvakonchu mee aenche athar uung ae, “Nang ing ama i bathen taniive, nang Kesar iruwng aarang-mah vachii! Achuw yngkheh ataksah ing iruwng ping tanave, Kesar iruwngchu arumahva!”

¹³ Pilaat ing ama chongchu asiitah nache, Jesu chu jenruwka Vaapa tunii ongnii (Hebreeu chong ing gabbatha) nache ong.

¹⁴ Changlaenche manlaennii kuurva inii siimchim hungta. Amana Pilaat ing mee ae ningnache ariir, “Enruw, nengaruwng havi!”

¹⁵ Enuw ing hanguung aeka enriir, “Thehruw! Thehruw! Khros taklina ynjamrasiing!” enchii. Pilaat ing eningna ariir, “Ki ing nengaruwngchu itheh nengadikva?” Aanchung jaethiim inche abasang, “Kenuw ing kendeen iruwng chuve Kesar vatah!”

¹⁶ Amana Pilaat ing Jesu chu khros taklina ijamnii khaena eningting amansirpa.

Jesu Khros taklina Enjam

¹⁷ Chukhaenache enuw ing Jesu chu enruwpa. Ama ing khros chu idomka isi inche rusaeruwh omnii (Hebreeu chong ing Golgotha ichii) minchu hungtungsa.

¹⁸ Amana enuw ing khros taklina enjampa; amanche meeniimeh ae chukho Jesu atari, atachang nache enjampa.

¹⁹ Pilaat ing Jesu khros ruchungna abaziih chuve, “Nazaret tanii Jesu, Jehudi ae Iruwng,” taka ataar.

²⁰ Mee vakhae aenche ama ynziihchu empa, akhaechuve Jesu enjamnii minchu khuwruung thoh aasen yndahmah. Amana yntaarchu Hebreeu, Latin vokhehkho Grik chong ing ynziihva.

²¹ Aanchung jaethiim inche Pilaat ningna Jehudi ae iruwng tanana baziih mahra, ama changdenna ama ing Jehudi ae Iruwng ping achii, tanana baziihra achii.

²² Pilaat ing abasang, “Ki ing kabaziihchu kabaziihva.”

²³ Laarchang aenche Jesu chu enjam aanuwna apeendiirchu yngkhehter engkhingnii ing asae manrii isuwh ing engasiih. Amanche aantuwnii omah aruw yngkhehpang ing yngkhuung anii peen chukho enri.

²⁴ Amana laarchang aenche enareer ing enriir, “Havive isiihmah manuw, achuw ing phavaate ichii laepah enniitaruw.” Havi ynthiing thiimziihna ynziih vasahchu ahungchumnii chuva: “Kapeenchu entaksahna ynsem aeka vokhehkho kapeenchu enlaepah engenniipa.” Chukhaenache laarchang aenche havi entuva.

²⁵ Jesu khros buumna ynneengtang ing ingiir ae chuve amnuw, amnuw-fhuw, Klopas arumee Meri, amanche Meri Magadalen aepae.

²⁶ Jesu ing amana ingiir amnuw vokhehkho aning amansiihpak asebok Johon amucha, amnuw ningna ariir, “Rupanuw, nasapa i enla!”

²⁷ Aanuwnache ama ing sebok ningnache ariir, “Enla, nangnuw i.” Apha ichii nache sebok inche ruwka eenting yngkaesae.

Jesu Ithii

²⁸ Atii aangkheng chichirsa ichii amanghuwtah nache ynthiing thiim-ziihna ynziih vasahchu ahungchumnii khaenache, Jesu ing kachii raarne achiipa.

²⁹ Bukam yngkhehna vomrip chii achuum isip ing omchu thor abasuwrna rup aeka, Jesu baena ahemansin ae.

³⁰ Ama vomrip chiichu Jesu ing inka ariir, “Chisa!” Aanuwnache aruw barupka thiksa.

Jesu Isii ing Ensin

³¹ Khros taklina jam aeka entheh engkhichu mambong ae naka entakchu ynsumnii khaena Jehudi aatuaricheh aenche Pilaat ningna eniih. Akhaechuve ama iniichu Kuhnii iniisa, amatah nache ithii aechu Deennii iniichu hungvivachii khaena Ynthiingnii Inii nache omjaeh naka tamahsae.

³² Amatah nache laarchang aenche vak aeka Jesu buumna enjam ahaarpachu akhi emambongpa amanche avomanii yngkheh chukho akhi emambongpa.

³³ Jesu chuve maensa ing ithii vasah vakhaka akhi mambong mahsae.

³⁴ Changvakonchu laarchang yngkheh inche adeep nache isii ing asintah nache sii re chii suwhsa.

³⁵ (Aamu mee ing havi ariirva, amanache nenuw ingkho thacha vanenta. Ama ing ariir i ichumva, amanche ichum kariirva ichii ama ing amanghuwsa.)

³⁶ Havi aruw yngkhehpangkho bongmahnii taka ynthiing thiimziihna ynziihchu ahungchumnii khaenava.

³⁷ Reentaang ynthiing thiimziih yngkhehna ariir chuve, “Enuw ing ensin mee ningnache mee aeng envaatae.”

Jesu Endim

³⁸ Havi aanuwnache Aramathia tanii Josep inche Jesu ahakchaangchu irinii khaena Pilaat ningna aniihpa. (Josep ikho Jesu aanuw ajii mee yngkhehva, changvakonchu ynruwhjaeh ing ajiiva, akhaechuve Jehudi aatuaricheh aechu achiitah nache yndangmahva.) Jesu hakchaang irichu Pilaat ing ruka Josep inche ahangadom.

³⁹ Isivasah jaenkhehna Jesu ningna itheng vasah aruming Nikodemas ichii ama ing Josep thohche mar vokhehkho aloes ichii barim isa kilo songthum vakhae enchi.

⁴⁰ Enuw meeniimeh aenche Jehudi ae enunu inuwzii inche, Jesu hakchaangchu idimnii khaena barim isa marochu itaeh aeka isajaeh inche engarom.

⁴¹ Amanche Jesu enthehnii apham nache ingkhon yngkhehkho om. Ingkhon sungnache mee yndimmah rideh ithar thaen yngkheh om.

⁴² Ama iniichu Jehudi ae khaena chembe Ynthiingnii Inii vakhaka, enuw ing Jesu chu amanache emantorpa, akhaechuve thaenchu ynneengtang ing om.