JOHON 18 - ITHAR CHONGHAK

Jesu Ensuwr

¹ Jesu ing hava vakhae i ariir aanuwna ama ing asebok ae thoh Kidron ichii phae tingche vaksae. Amana ingkhon yngkheh omnache enuw ing vaongsae.

² Ama minchu Judas ingkho amanghuw, akhaechucve Jesu ing amanache asebok aethoh yntuwhchak ae.

³ Chutahnache Judas ing Rom ae laarchang ruwrkheh aere aanchung jaethiim aeng enjechiir vokhehkho Pharisi ae thohche ingkhon phanii inche vaksae; enuw ing jaemi re domi vokhehkho chemthar aajaeh enchi.

⁴ Jesu ing hungsuwh vachii vakhaechu amanghuwtah nache, ama ing eningting vaanseen sehka asii ae, “Nenuw achuwchu nenjongva?”

⁵ Enuw ing Nazaret tanii Jesu ta aeka embasang. Amachu kiping taka Jesu ing abasang ae. Jesu chu arensah Judas inche enuw thohche ingiirhak.

⁶ Jesu ing kiping taka eningna ariirtah nache, enuw entuknung ynriaeka ruwruw nache tiihpohsae.

⁷ Athar vokheh Jesu ing eningna asii ae, “Achuwva nenuw ing nenjongchu?” Enuw ing Nazaret tanii Jesu ta aeka enriir.

⁸ Jesu ing enuwchu abasang, “Ki amaping ta ingka neningna kariirpa; nenuw ing ki ynjong vatanuwve, havana mee ae i yngkae ae rasiing.”

⁹ (Havana ariir chong i ajae ama ing ajeer vasahchu ahungchumnii khaenava amachuve, “Apa, nang ing ympeeh aechii enuw i asae yngkheh-pangkho mamohmah aeng.”)

¹⁰ Amana Simon Pitar ing achem isuwka Aanchung Jaethiim suwhchu atuktah nache atari tanii aana asaehjohpa. Ama suwh aruming chuve Markus enchiiva.

¹¹ Jesu ing Pitar ningna ariir, “Nachem kha thinla! Kapa ing ympeeh ijachaam kamchu inmahnii ichii ing namandenva?”

Jesu Annas ningna Enghenruw

¹² Amana Rom laarchang aeng Jesu chu suwr aeka emphuwppa.

¹³ Ahaarpana Annas ningting ahenruw ae. Atakchu ama kum nache Aanchung Jaethiim ivi Kaiphas amfhuwva.

¹⁴ Havana Kaiphas iva ajae Jehudi aatuaricheh ae ningna mee aajaeh thikvachii changdenna mee yngkheh ithii inche sahakna taka ariir khava.

Pitar ing Jesu Arumah

¹⁵ Simon Pitar re sebok yngkheh ing Jesu aanuwchu ajiiae. Sebok yngkheh ive Aanchung Jaethiim ing amanghuw vasah vakhaka aanchung jaethiim eensukmae tingche Jesu thoh ynruw ing varuwhsa,

¹⁶ Pitar chuve suwngkuung ataang nache ong. Changlae sebok yngkheh ingkhe jungsuwhka suwngkungna ong rupanuw ningnache Pitar varuwh rasiing taka ariir.

¹⁷ na ong rupanuw inche Pitar ningna asii, “Nang hava mee i asebok ae kaarna yngkhehmah vachiikhang?” Mah, ki mahping taka abasang.

¹⁸ Isik om vakhaka laarchang aere suwh ae inche mi manseh aeka engu. Amana Pitar kho vaansenka michu ava u.

Aanchung Jaethiim ing Jesu Chong Asii

¹⁹ Aanchung Jaethiim inche Jesu asebok ae vokhehkho amanchuw ae khaenache inempak chong asii.

²⁰ Amana Jesu ing abasang, “Apha vakhaena ki ing mee vakhae kaarna yndang ing thamin katong chakva, meekongnii nakho vokhehkho rumniieen nachenkho kamanchuw chak ae. Ki ing utaraenkho ynruwh ing tongmahchak ing.

²¹ Amachu ynchii khaena nang ing chong ynsii vachii? Ki ing ynchiikha kariirva ichiichu siiaera-kariir vakhae enuw ing emanghuwsa.”

²² Jesu ing changche achongtah nache, laarchang yngkheh inche ibeengka ariir, “Ynsaangkhe nang ing changche ichii ing Aanchung Jaethiim ningnache nabasangva?”

²³ Aning nache Jesu ing abasang, “Ki ynraar ing ichongping vaniive, ong ae ningne ynchii khava ynraarchu riirla. Changvakonchu ichum vaniive ynchii khaena kataklina ymbinvachii?”

²⁴ Amana Annas inche Aanchung Jaethiim Kaiphas ningting Jesu chu ymphuwp ing ahenbathen.

Pitar ing Jesu Arumahreeh

²⁵ Changlaenpha inche Pitar ing mi uka ongjaeh. Chutahnache areh aenche aningna enriir, “Nang kho hava mee i asebok ae kaarna yngkhehmah vachiikhang?” Changvakonchu Pitar ing rumahka abasang, “Ki ama mahping.”

²⁶ Aanchung jaethiim suwh yngkheh Pitar ing aana asaehjoh auwnaefhuw yngkheh inche Pitar ningna ivachong, “Nangmah vachiikhang Jesu thoh ingkhonna kamu chuwkha?”

²⁷ Athar vokheh Pitar ing “Mah, ki mahping,” achiichakna aarkhuwng inche khuwngsa.

Jesu ing Pilaat Maana ingiir

²⁸ Ziing imaenphikna Jesu chu Kaiphas een tanii vajeernii eenting enghenruw ae. Jehudi aatuaricheh ae chuve vajeernii een asungting varuwhmah ae, akhaechuve Manlaennii kuurva thaemin isahnii khaena iseeng ing ongnungka enchii.

²⁹ Amatah nache Pilaat ing jungsuwhka mee ae ningtingche hava mee takline ynchii nemanraarnii omva taka asii ae.

³⁰ Enuw ing embasang chuve, “Ama ing raarmah nave kenuw ing veruw mahnung.”

³¹ Pilaat ing ariir, “Nentaksah ing ama ruwnuwna nenvajeer chonghak inuwzii ing vajeer tusaruw.” Enuw ing embasang, “Kenuw ing mee achuw yngkhehchu ithehnii khaena ruwreng phamah ung.”

³² (Haviva Jesu ing ariir vasah ahungchumniichu achong inche aman-dangsa amachuve, ithii ningchuwh inche thiklo achiinah.)

³³ Pilaat ing vajeernii eenting hungruwhka Jesu chu eenka asii, “Nang Jehudi ae iruwng vachii?”

³⁴ Jesu ing abasang, “Nang ing hava ynsiichii i nabarungriir tanii hungsuwh sahva changmahka mee aeng riir aeka ynsii vachii?”

³⁵ Pilaat ing abasang, “Ki Jehudi va ynchii vachii? Nangchu kaningting ynghenpeeh mee aere Aanchung Jaethiim aenche havi ariirpae. Nang ynchii naraar omva?”

³⁶ Jesu ing ariir, “Karuwngpaam chuve laaruw paam nenmahva; karuwngpaam amachu laaruw paam i vaniive, kaanuw ajii aenche laar tuk ae naka Jehudi aatuaricheh ae engkik phamahva kachiiva. Karuwngpaam chuve laaruw paam imahva!”

³⁷ Chutahnache Pilaat ing asiireeh, “Changmanuwve nang iruwng vachii?” Jesu ing abasang, “Ki i iruwng ping ichiichu nataksah ing nariirpa. Ki havi khaene jungom ingka laaruw paamne ichumchu ijungriirnii khaena ijuwngping. Achuw yngkheh ichum tanii mee inche kariir i rungaevaata.”

³⁸ “Amana ichumchu ynchiiva?” taka Pilaat ing asii. Aanuwnache Pilaat ing taangting jungsuwhka mee ae ningna ariir, “Ki ing ataklina miraar babukfhuw yntangakho tuwhchehmah ing.

Jesu Ithehnii Chong Ichi

³⁹ Changvakonchu nenuw nenunu inuwzii ing manlaennii kuurva ne mee yngkheh kaeshumna yngkhum omna. Chukhaenache nenuw nengkhaena Jehudi iruwng havi bathen naka ynchiinahchuw?”

⁴⁰ Enuw ing uung aeka embasang, “Hava mee i mahva, Barabas khava!” Barabas ive ynruw ynrep meeva.