JOHON 17 - ITHAR CHONGHAK

Jesu ing Asebok ae khaena Athamsah

¹ Havi riirka aanuwnache Jesu ing thangbaen ting hengenka atham, “Apa, apha ichiichu hungvisa. Nasapa ningna nalaar isachu jepisara, amanache nasapa ki inche nalaar isachu mandang sakata.

² Laaruw mee vakhae khaena aatuaricheh ympeehchii vaange, nang ing ympeehchii ichen naemah ringkumchu mee vakhaena pisakata.

³ Ichen naemah ringkum ichuve ichum Thangnang chupang re najenchiir Jesu Khrista chu amanghuw chuva.

⁴ Laaruw paamna nalaar isa kamandangpa, itufhuw vakhae ymmansirchii nong vakhaechu kamanchipa.

⁵ Apa, laaruw paam abasenmah rirae naningna kadeen nalaar isa kha atarae ijepisara.

⁶ “Laaruw mee vakhae nache ka-mandang pachii. Enuw ae i kaningna ympeehchii namee khapae. Nang nachong emanjiipa.

⁷ Kaningna ym-peehchii vakhaekha naning taniiva ichii emanghuwpa.

⁸ Kaningna ympeehchii chong vakhaekha eningting pichir aengka engaraangpa. Atiive ki i nang ing ynjenchiir vachii ichii vokhehkho naning tanii ijuwngping ichiikho isajaeh ing enthachapa.

⁹ “Enuw engkhaena kathamsah-nahchii. Mee reentaang khaena mahva, nang ing ympeehchii namee ae khaenava.

¹⁰ Ki ing kadeenchu natava vokhehkho nang ing nadeenchu katava, amanche entaklina kalaar isachu kamandangsahpa.

¹¹ Atii naningting huungning; laaruw paamne ki ongmahning, changvakonchu enuwve laaruw paamne ongnae. Ynthiing apa, nang ing ympeeh aechii i narumingna isiipeeh aera, amana chembe nang re ki yngkhehpangmuw vaange enuw ingkho yngkhehpang ing omvaatae.

¹² Enuw thoh kaonglae nang ing ympeehchii naruming ruwreng ajaar inche maangrudeh ing kasiihpae. Ki ing enuwchu badaar aengka achuwkho ymmohmah ae, changvakonchu asae yngkhehpang chuve ynthiing thiimziih ahungchumnii khaenache ymmohna.

¹³ Atii nabuumting ki huungning. Havi laaruw mee vakhae ing embarungriir sungna rotharoh emphanii ing ta ingka mee vakhaena kariirva.

¹⁴ Najaera vakhae eningna kapeehpae, amanche laaruw paam mee aenche enuwchu embatirpa, akhaechuve ki i laaruw paam taniimah vaange, enuwkho laaruw paam tanii mahsae.

¹⁵ Enuw vakhaechu laaruw paam tanii jeri aera kachiimahva changvakonchu laaruw paamne isii tanii ibadaarpeeh aera kachiisahva.

¹⁶ Ki i laaruw paam taamah vaange, enuwkho laaruw paam taamahpae.

¹⁷ Naningtanii ichum inche manthiingsa aera, nachong chuve ichumva.

¹⁸ Laaruw paamne ki ynjenchiirchii vaange, ki ing enuwchu laaruw paamne kachiirpae.

¹⁹ Enuw vakhae thenna kataksahchu ynthiing saning, amana chembe enuwkho ichum inche manthiing vaatae.

²⁰ “Ki ing kathamsahchii i engkhae-napang mahva, enuw enchong ajaarnache ynthacha mee vakhae khaena khomva.

²¹ Enuw vakhae i yngkhehpang ing engomnii khaena kathamsah vachii. Apa! Nang ing kaningna vokhehkho ki ing naningna ongjaeh vaange, enuw vakhae i ynningna omchir ae rasiing. Enuw vakhae i yngkhehpang ing omnii amanche mee aeng ki i nang ing ynjenchiir vachii ichiichu manghuw ae rasiing.

²² Nang ing kaningna nalaar isa ympeehchii amathohkhe aanghak ki ing eningna kapeehpae. Nang re ki yngkhehpangmuw vaange, enuwkho yngkhehpang ynsuwh ae rasiing.

²³ Eningna ki ongning amanche nang ing kaningna ongnachii; ama vaange enuwkho yngkhehpang ing om ae rasiing; amana chembe nang ing ki ynjenchiir vachii, vokhehkho kichu nang ing naning ymmansiihchii vaange, enuwkho naning namansiihsae ichii laaruw paam mee vakhae ing manghuw rasiing.

²⁴ “Apa! Nang ing enuw vakhae i kaningna ympeehpachii, ki ingkho enuw i kithoh ong aechu kadiknah, amanche nang ing nalaar isa ympeehchiichu enuw ing muvaatae, akhaechuve laaruw paam abasenmah rirae ki i nang ing naning ymmansiihsah vachii.

²⁵ Ichum ynthiing Apa! Laaruw paam mee aeng nangchu imanghuwmah ae, changvakonchu ki ing kamanghuwchii inge nang ing ynjenchiir vachii ichiichu ynghuwna.

²⁶ Ki ing ening nache kamandang pachii; ataraenkho hentu vakata. Amanache kakhaena ningsiih nadeenkha eningnakho omvaata amana ki ynchenkho eningna ongva kata.”