JOHON 14 - ITHAR CHONGHAK

Jesu i Lamva, Ichumva, vokhehkho Iringniiva

¹ “Nenuw nenbarungriir manja-mahruw; Thangnang chu thacharuw, amanche ki chukho ithacharuw.

² Kapa een nache ongnii inempak omna, amanche nenuw nengkhaena ongniichu iseem hesi-ping. Amachu omah maniive ki ing havi neningna riirmahva kachiiva.

³ Amanche nengongniichu hesiningka seem ningve, ki athar juwng ningka nenuwchu jungruwva kachuw, amanache nenuw ingkho kaongnii nache ongva nenta.

⁴ Ki kasinii lamchu nenuw ing nemanghuwsa.”

⁵ Thomas ing aningna ariir, “Aafhuw, nang uting isivachii ichii kenuw manghuwmah ung, amachu ynsaangkhe naongnii lamchu mang-huwva kente?”

⁶ Jesu ing abasang, “Ki lam chuping, ichum chuping, vokhehkho iringnii chuping; ki kajaar namah naka achuw ingkho kapa buum hungtung chehmahnii.

⁷ Nenuw ing ki imanghuw tanuwve, kapa chukho manghuwromva nenchiiva. Atii chembe atakchu nenuw ing nemanghuwpa vokhehkho nemupa.”

⁸ Philip inche aningna ariir, “Aafhuw, nangpachu keningna iman-siisara, amana pensavakenta.”

⁹ Jesu ing abasang, “Philip, apha hangsenna ki thoh ynruwhakjaeh muwka ki ymmanghuwmah vachii,? Ki ymmu mee inche kapa chu amuva. Ynchii khaena kapa chu keningna imansiira tachiika nariirva?

¹⁰ Ki ing kapa ningnache ongning, amanche kapa inche kaningna ongna ta ingka kariir chongchu nathacha mahva? Ki ing neningna chong kariir vakhae i kataksah tanii mahva; changvakonchu kaningna ong kapa inche anongchu atuva.”

¹¹ Ki ing kapa ningna ongning amanche kapa ing kaningna ongna ichiichu thachara; changmahka nong yntu ajaarne ithachara.

¹² Ki ing neningna atatak ing kariirnah: Achuw yngkheh ing kichu ithacha nave, ki ing katu kari havi ama ingkho tuvaata; amanche havi chungna iruungpak kho tuvaata, yngkhaena ynchii imbe ki kapa ningting ihuungping.

¹³ Karuming nache nenghenii vakhaechu ki ing tuvakata, amana chembe ampa alaar isachu asapa ajaarnache yndangvaata.

¹⁴ Karuming nache heniih tanuwve, ki ing tuvakata.

Ynthiing Laetha khaena Chongreep

¹⁵ “Nenuw ing nening imansiih tanuwve, neningna kapeehchuw chong-hak vakhae i manjiiva nenchiiva.

¹⁶ Kapa ningnache ki ing niihva kata, amanche ama ing reentaang Eebom yngkheh apha om vakhaena nenuw thohche ongjaeh vachiichu ama ing ijepivaata.

¹⁷ Thangnang khaena ichum mandang vachiichu laetha chuva. Laaruw paam mee aenche iraangcheh mahnii ae, yngkhaena ynchii imbe imu vokhehkho ynghuw chehmahnii ae. Nenuw inchembe nemanghuwsa, akhaechuve ama ing nenuw thoh ongjaehna vokhehkho neningna ongjaehna.”

¹⁸ “Ki ing kaangkaeraenche, nenum ing mamah ningchuw; ki neningting juwng vakata.

¹⁹ Apha mongteh khaena laaruw paam mee ing imu-mahnii, changvakonchu nenuw inchembe imuva nenta; amanche ki iringping khaeka nenuwkho ringva nenta.

²⁰ Ama iniichu ahenpha raenche, ki i kapa ningna ongna amanche neningna ki ing ongvaang inge, nenuw ing kaningna ongnachuw ichiichu manghuw vanenta.”

²¹ “Achuw yngkheh ing kachonghak vakhae i runaka manjiinave, ki aning ymmansiih mee chuva. Kichu aning ymmansiih ningnache kapa ingkho aning mansiih vaata; ki ingkho kaning amansiihchu aningna mandang vakata.”

²² Judas (Judas Iskariot khamah) ing ariir, “Aafhuw, ynsaangkhe nang inche keningna yndang taniika amanche laaruw paam nache yndangmahva nachiiva?”

²³ Jesu ing aningna abasang, “Achuw yngkheh ing ki aning imansiih nave kachongriir chaap manjiivaata. Kapa inche aning mansiih vaata, amanche kapa re ki ing aning nache theng nungka ama thohche onghakva kenta.

²⁴ Achuw yngkheh ing ki aning imansiihmah nave kachongriir chaap manjiimahnii. Nenuw ing nensii kachongriir i kaningtanii mahva, kichu ynjenchiir kapa ningtaniiva.”

²⁵ “Nenuw thoh kaong raenne havi kariirva.

²⁶ Kapa ing karumingna Eebom jenchiir vachii inche aangkheng imanchuw vaata amanche kariir chong vakhae i nengaansiinii tuvaata.”

²⁷ “Idaechu ki ing neningna kamahsa; kaningna om idaechu kapeehnahchuw; laaruw paam ing ympeeh thohche aanghakjaeh kapeehmah vachuw. Nenuw nenbarungriir manjamahruw, vokhehkho ynchik mahruw.

²⁸ Ki ing neningna kariir i nensiipa, ‘Ki yngkae ningka amanche neningna juwngva katareeh.’ Nenuw ing nening imansiih tanuwve nenrotha manrohva nenchiiva, yngkhaena ynchii imbe kachungna kapa inche ruunghakna.

²⁹ Hava vakhae i asuwhmah rirae neningna maen ing kariirpa, amana chembe ahungswuh raenche nenuw ing thacha vanenta.

³⁰ Apha iseehpak ing nenuw thoh chongchehmah ing, havana laaruw paam aapuhchu thengna. Ama ing katklina ruwreng yntanga deenmah,

³¹ changvakonchu laaruw paam mee ing kapa i kaning kamansiihsa ichiichu manghuwva nenchiiting buksa; ama khaenache ama ing ariir vakhaechu katuva.” “Huungruw, inuw hava min i bathen taruw.”