JOHON 1 - ITHAR CHONGHAK

Iringnii Chongsae

¹ Abasenlimna chongsaechu om vasahva, amana chongsaechu Thangnang thoh ynruwhak ing om amanche chongsae inche Thangnang atak chusa.

² Abasenlimna chongsaechu Thangnang thoh ynruwhak ing om.

³ Ama ajaarnache Thangnang ing peeh aangkheng aseem, amamah naka yntanga ynseem peeh omah.

⁴ Aningnache iringnii ahungsuwhnii ynsuwhka amanche havana iringnii inge laaruw mee ningnache irengchu ajenreenpa.

⁵ Ireng inche ynthim nache aenka, ynthim inche chehmahsa.

⁶ Thangnang ing achongjeer ajenba-then aruming Johon ichii om,

⁷ hava mee inge irengchu saarkhii ipeeh ijuwng ajaar inche mee vakhae ing siinaka athachanii khaenava.

⁸ Atak ichuve ireng chumahva, changvakonchu irengchu saarkhii ipeeh ijuwngva.

⁹ Laaruw paamna ijungtheng atak i mee aangkheng ningna irengchu ipeeh ichum ireng chusa.

¹⁰ Laaruw paamna chongsaechu omsa, ama ajaarna Thangnang ing laaruw paam seemkhang nakho laaruw mee inche manghuwmahsa.

¹¹ Ama ing apaam sahna ijuwng vakonchu ameesah aenche herimahsae.

¹² Changvakonchu achuw yngkheh inchembe thachaka ahengaraang ae; amatah nache enuwchu Thangnang siti ynsuwhnii ruwrengchu apeehpae.

¹³ Enuw i sii re hakchaang vokhehkho mee ing amanden nache jungom siti mahpae, Thangnang ing amanden nachenva.

¹⁴ Chongsae inche mee ynguurka tungsiih re ichum ynriim inche yng-kaarna paarsa; Thangnang sapa yngkheh ynsuwh ing alaar isachu iraangka, inuw ing alaar isachu imu ymphapa.

¹⁵ Johon ing ama akhaena uungka saarkhii apeeh, “Haviva ki ing akhaena ichong ingkha, ama ing kaanuwna juwngna changvakonchu atak ichuve kachungna ruunghakna, akhaechuve kaommah rirae ama om vasahva.”

¹⁶ Aningtanii tungsiih ynriim inche inuw vakhaechu ama ing bor ympeehpa.

¹⁷ Thangnang ing Mosi ajaarna chonghakchu apeehva chang-vakonchu tungsiih re ichum chuve Jesu Khrista ajaarnava.

¹⁸ Achuw ingkho Thangnang mumahri; Thangnang thoh aanghak ampa buumna ong asapa ningna chembe imuchu amamphasa.

Baptis Johon Chongjeer

¹⁹ Jerusalem tanii Jehudi aatuari-cheh aenche jaethiim aere Levi aechu Johon ningna vechiir aeka enuw ing aningna chong ensii, “Nang achuw vachii?”

²⁰ Johon inche ynsang damahka ynthiingkiir ing abasang ae, “Ki chuve eekarpeeh Khrista chumahping.”

²¹ Chunuwcha achuw vachii ta aeka ensii. Elija vachii chang? Ki amamahping, taka Johon ing abasang ae. Chunuwcha jaephar vachii ta aeka ensii. Ama ing kimahping taka abasang.

²² Chunuwcha achuw vachii riirla enchii. Kenuwkho yngkaenungka ynvechiir ae ningna ahuwnii hungriir kenta. Natakcha achuwping nachiiva chang?

²³ Amana Johon ing ajaennii jaephar Isaia chong ipherka ariir, “Ki chuve Aafhuw ing ajiinii lamchu manchiimruw ichiinii khaena, paamfhuwna uung senruwr yngkheh chuping!”

²⁴ Pharisi aeng envechiir chong areen mee ae aenche,

²⁵ Johon chu ensiireeh, “Natak icha Khrista chumah taniika, changmahka Elija chumah taniika vokhehkho jaephar chukhommah taniicha, yngkhaena mee aechu baptais namantupae?”

²⁶ Johon ing abasang ae, “Ki ingve chiina baptais kamantunah chang-vakonchu nemanghuwmah mee yngkheh nengkaarna ngiirna,

²⁷ atak chuve kaanuwting ijuwngpehva, changvakonchu ama akheerkhaang runoh rapkho parvakachii ki matik chasamah ing.”

²⁸ Hava vakhae i iniisuwhtah yntongting om Johon ing batais amantunii ae Jordan chifhuw laar Bethani paam nache isuwhva.

Thangnang Jaoti

²⁹ Akhuwvaar nache Jesu ing Johon ningna ivachu avemutah nache ariir, “Enruw, laaruw paam isiicher areenchir Thangnang jaoti reeh!

³⁰ Havana mee iva, hangsenna kariir chakkha, ‘Mee yngkheh kaanuwna thengna, atakchu kachungna ruwreng adeensehsa, akhaechuve ki kaommah rirae ama om vasahva.’

³¹ Ki ing atak i achuwvaate ichii chuve hemanghuw mahri ing changvakonchu Isrel mee aeng emanghuwnii khaena ki ing chii nache baptais kamantuva.”

³² Johon ing havana saarkhii i apeeh, “Khunu vaang ichii yngkheh thangbaen tanii laetha ynthiing ataklina ijung-chuwchu kamu.

³³ Ataraenpha ing ama i manghuwmah ing changvakonchu chiina baptais itunii khaenache kichu ynjenchiir Thangnang ing ariir, ‘Mee yngkheh taklina laetha jungchum naka ichuw muvaanta; ama chuva laetha ynthiing ing mee aechu baptais mantu vachiichu.’

³⁴ Johon ing ariir, ki ing kamupa vokhehkho neningna kariirnah, atak i Thangnang sapa chuva.”

Ahaarpa Jesu Sebok ae

³⁵ Akhuwvaarna Johon ing asebok mee ynniimeh ae thohche ingiirhak ae,

³⁶ Jesu ing ivasichu ama ing vemuka ariir, “Enruw, Thangnang Jaoti chu vathengna.”

³⁷ Sebok mee ynniimeh aenche ariirchu siiaeka amana Jesu aanuwchu enuw ing enjiipa.

³⁸ Jesu ing avaanleh tahnache aanuw enjiichu muka eningna chong asiiae, “Nenuw ynchii nenjongva?” Enuw ing embasang, una ongvachii oja?

³⁹ Ama ing abasang, “Huungruw vokhehkho va-enruw.” (Changlaenche siim apha manrii ita.) Enuw ing aanuwchu henjii aeka una ongva ichiichu emupa, vokhehkho ama inii nache aningna cheengsae.

⁴⁰ Johon chongchu siiaeka Jesu aanuw enjii meenii sungne yngkheh chuve Simon Pitar naepa Andriu va.

⁴¹ Ama ing aipa Simon yntuwhfhuwka ariir, “Kenuw ing Mesaija chu kengaantuwh fhuwpa.”

⁴² Amana Jesu ningting Simon chu ahenruwpa. Jesu ing aningna enka ariir, “Nang i Johon sapa naruming Simon vachii changvakonchu atanii basenka naruming i Kaiphas yntavaata.”

Jesu ing Philip re Nathanel Aachiir

⁴³ Akhuwvaar nache Jesu ing Galili ting vakningka achiipa. Amana Philip chu Jesu ing yntuwhfhuwka aningna kaanuw ijiira achii.

⁴⁴ (Philip i Andriu re Pitar engkhuw Bethsaida taniiva.)

⁴⁵ Mosi vajeer chonghak na ynziih vokhehkho Jaephar aengkho akhaena embaziih vasah Nazaret Jesu, Josep sapa chu kenuw ing kengaantuwh fhuwpa taka Philip ing Nathanel ningna ariir.

⁴⁶ Changvakonchu Nathanel ing aningna ariir, “Nazaret tanii isa changsiichu hungsuwhcheh vaate?” Philip ing abasang, “Huungnana vaabuwrla.”

⁴⁷ Nathanel ing Jesu ningting ihuungchu amutah nache ama akhaena ariir, “Enruw Isrel ynthiingkiirchu haviva; aningna ynraar yntanga omah.”

⁴⁸ Nathanel ing aningna asii, “Yn-saangkhe kichu ymmanghuw vachii?” Jesu ing abasang, “Philip ing nang i yngeenmah rirae, thachang bur derna ong kamuchii.”

⁴⁹ Nathanel ing ariir, “Oja, nang i Thangnang sapa vachii! Amanche Isrel ae iruwngchu vachii.”

⁵⁰ Jesu ing ariir, “Thachang bur derna kamuchii kachiitahna ynthachapeh vachii? Nang ing havi chungna iruung iruung aajaeh hemuvanata.”

⁵¹ Amana aningna ariir, “Atatak ing naningna kariirnah, thangbaen chu ymmong vaata amanche Thangnang vaarmee aenche Mee Sapa taklinache ihangkar ijungchum entu nang ing muvaanta.”