JEMS 5 - ITHAR CHONGHAK

Savang ae taklina Ichong

¹ O savang ae! Atarae aphane huungruw, nentaklina ijachaam ningchuwhnii thengvachii khaena chapruw vokhehkho nening mandong-saruw.

² Nenler nenchiikha chuwmsa amanche nenpeendiir khakho arungi ing asahpa.

³ Nensana re seerkha jorhing vaksa amanche jorhing iva inche nentaklina asaarkhii ynsuwh vaata, vokhehkho ama inche mi ikaang vaang nenuwchu isavata. Amachuve nenuw ing achinii inii khaena lerchii nemanghuwngpa.

⁴ Enruw, nenuw ing neeh ae chuwka ruthamen piva nenchiichu manchae ae chuwka areh nenseeh ingkhe uungna; changpang mahka shaang aavuwh aeng uung aechu Aafhuw laarchang aeng ensiipa.

⁵ Nenuw ing laaruw paamna inungaepak ing paarchuwka vokhehkho nungaesachuw; nentaksah ing ynthehsava nenchii khaenache nenbarungriir kha nemamar sahpa.

⁶ Ichum meechu nenuw ing nemanraarpa, nenthehpa; enuw ing nenuwchu irumah tumahsae.

Ikhaangchehnii khaena Ynthohsah Chong

⁷ Havi khaene kauw kanae ae, Aafhuw ing ajungthengmah raentaang hehahruw. Enruw, laaruw paamne amen iruwpak chimuw bajaang khaena ynlang ing vokhehkho yntuk ing khuw asuwrmahri raentaang ruwbaar itu mee inche ahahjaehnah.

⁸ Nenuw vakhae ingkho hahjaehruw vokhehkho nenbarungriir mancheep jaehruw, Aafhuw jungtheng vachiichu ynneengsa.

⁹ Kauw kanae ae, yngkheh re yngkheh vajeer tunii khaena ynriirsa mahruw; enruw tuvachii Aafhuw inche eenkhaar kungna ngiirna.

¹⁰ Kauw kanae ae, Aafhuw rumingna ichong ae jaephar mee aeng ijachaam empha amanche engkhaang ae i buwtinnii ing risataruw.

¹¹ Enruw, ikhaang acheh mee aechu bor aphapae. Jop ing ikhaang achehchu nenuw ing nensiipa vokhehkho Aafhuw ing akuurchiimna asirpeeh chukho nensiipa. Aafhuw chuve ningchuwh vokhehkho ningsiih barungriir ing isipva.

¹² Chukhaenache kauw kanae ae, aangkhenglaangna iruwpak yngkheh chuve, thangbaen, laaruw paam vokhehkho reentaang ruming parnuwna chongreep tumahruw. Nenuw ing vajeer nenphaniimah ing nenruchu kenrusa taruw, nenru-mahchu rumah ung taruw.

Ithamsah Ruwreng

¹³ Nenuw nengkaarna achuw yngkheh ijachaam apha omvachuw? Ama thamsa rasiing. Achuw yngkheh arotha irohva? Ama ing ympahnii la turasiing.

¹⁴ Nenuw nengkaarna achuw yngkheh ina omva? Ama ing ruwrthiing upa aechu eenrasii, enuw inche Aafhuw rumingna inachu thou itaeh ae sana thampeeh ae rasiing;

¹⁵ thacha thamsah inche inachu karpeeh vaata, vokhehkho Aafhuw ing atakchu mandam vaata; amana isii tunave amachukho kuhpeeh vaata.

¹⁶ Chukhaenache ina chuwchu adamnii khaena, isii icher nentaklina omchu yngkheh yngkheh ynriirnuwna amanche yngkheh ing yngkheh khaena Thangnang tingche thamruw. Ichum mee ing athamsah chuve nong ituna inempak ruwreng pirna.

¹⁷ Elija i inuwthoh aanghak mee vatah, changvakonchu ama ing alaetha iruwhdeh ing khuw asuwrniimah khaena athamsah tahnache kumthum tharuk laaruw paamne khuw suwrmahsa.

¹⁸ Athar vokheh ama ing athamsah tahnache thangbaen tanii khuw suwrsa vokhehkho laaruw paamna aanlachu hunganlasa.

¹⁹ Kauw kanae ae, nenuw nengkaarna achuw yngkheh ing ichum tanii arehting sinaka achuw yngkheh inche ama meechu henbaricheh nave,

²⁰ areh aphuw lamting isi isii icher meechu alaetha ithii tanii ikarpeeh phavaata vokhehkho isii icher aajaehchu baruwpeeh vaata ichii manghuwrasii.