JEMS 3 - ITHAR CHONGHAK

Ynriim ing Ichongnii

¹ Kauw kanae ae, inuw yntaksah ing ipirpak vajeer phavataruw ichii manghuwsa manuwka, nenuw mee aanem ing aanchuw mee ynsuwh-mahruw.

² Mee ymmanchuw tahna inuw vakhae khi mansiinii omna. Achuw yngkheh ing ariir chong nache khi mansiimah nave, ama meechu ichumpak meeva, amachuve ama ataksah ing aangkhengna ynriimsah acheh meeva.

³ Shakuurchu inuw ing ymmandenna ymmansichehnii ing anerkuchu naareeng vuwh ma-nuwve atakchu hembaheer vebaheer ynchehnah.

⁴ Ruwkuwng vakhaekho enruw, enuw aajaeh ruungkhang ae nare vokhehkho siiiraang inche tuwrkhang ae nakho, ruwkuwng aahuur mee inche amandenting aman-sichehnah.

⁵ Amavaange hakchaang na om bari ikho isiingpakva, changva-konchu iruungpak ing chongna. Enruw isiingpak marip chiihti ing iruungpak paam ikaang achehsa. Chukhaenache bari ikho miva.

⁶ Inuw vakhae ynsha taklina om bari ive ynthiingmah omnii laaruw paam vaang ichiiva. Chukhaenache bari inge isakho ymmanchehnah amanche ynringkum ikho mi sungting ymbathuchehnah vokhehkho longkong tingkho ymbabuw chehnah.

⁷ Laaruw mee inge sha, vaati, aven ing yntor, chii sungna om laetha ipaar chaap ymbathaechehnah,

⁸ changvakonchu bari ive achuwti ingkho ymbathaechehmah ivaeh omah isamah ithiinii chuwr asungna omna;

⁹ hava inge Aafhuw vokhehkho apa Thangnang chu ymmanpahniinah, amanche Thangnang ing aseem mee aechu siraap ympeehniinah.

¹⁰ Inuw ynnerne ympah niikho, isamah phorkho hungsuwhna. Chukhaenache kauw kanae ae, jinge tamahvaan chiiva.

¹¹ Chii hangfhuwrnii akhur yngkheh nache ithum chii re ar chii hangfhuwr chakkhang?

¹² Kauw kanae ae, thachang aanla kaarna chor aanla changmahka vomrip bur nache thachang ynla chehva takhang?

Ynraar vokhehkho Ichum Losing

¹³ Nenuw nengkaarna achuwva ising iveerchu? Ama mee inche alosing thoh iduwrjaeh ing anong isa vakhaechu mandangrasii.

¹⁴ Nenuw nenbarungriir sungna ichachehmah sehmaner om mee ynvae tanuwve ynding mahruw, amanche ichum taklinache ruungchichuh mahruw vokhehkho raarmah dehruw.

¹⁵ Havana losing i ynthiing chungtanii mahva changvakonchu havive laaruw paam tanii shava ae, isamah umlae ae tanii losingva.

¹⁶ Chukhaenache sehmaner aomnii apham nache ynnahnii, isamah ningjaknii nong aangkhenglaang omvaata.

¹⁷ Changva-konchu chungtanii losing chuve aren ynthiing chuva, idae aadik, idim, chongriirnii nungae, ningchuwh ing isip vokhehkho isa nongna aanla amangom, barungriir fhuwm ynvaemah, vokhehkho isachaang tuning tamah.

¹⁸ Chukhaenache ichum ynthiing aanla chuve idae apha ae taklina idaechu avorva.