JEMS 1 - ITHAR CHONGHAK

¹ Thangnang re Jesu Khrista, meenae Jems ki ing reentaang reentaang ting ong sungkhur suumariinii ongnii aphamsiirna salaam kapeehsahnah.

Thacha vokhehkho Losing

² Kauw kanae ae, nenuw ing aajaeh chaang enniiting bukkhang tanuwre, rotharohnii pangchu mandenjaehruw,

³ akhaechuve chaang enchu nencheh inche ikhaangchehnii ahenbasuwnah.

⁴ Changvakonchu ikhaangcheh nongchu mapung phavachiiva, amana chembe nenuw mintanuwka vokhehkho mapungchu phatanuwka ivaeh omahdeh tanuw.

⁵ Chukhaenache nenuw achuw yngkheh losing vaehnave, aangkhengna ipeehnii ihae vokhehkho ynrakuhfhuw omah Thangnang ningtingche heniihsa rasiing; Aafhuw inche aningna jepivaata.

⁶ Changvakonchu nenuw ing nenniihsah raenche thachava nenchiiva vokhehkho nenbarungriirna fhuwm ynvaemah vachiiva; achuw yngkheh ing fhuwm bavae nave, siiraang ing hechi avechi chifhuw ifhuwrthoh aanghakva.

⁷ Chukhaenache barungriir ynnii ynthuw, atu ari chaapna ireepchehmah;

⁸ changchii mee inche Thangnang tanii ynchii ynchii vakhangnare phava kata ichii ing mandenmah rasii.

Sara re Savang

⁹ Achuw yngkheh sara meechu Thangnang ing aathohsah raenche rotharoh phavaata,

¹⁰ vokhehkho savang meechu Thangnang ing thangting ajenbathak raenche arotha manroh rasii. Akhaechuve savang mee chuve riipaar vaang chiirvachii vatah.

¹¹ Inii ynsa inche deengka riiburchu chongsa amanche apaar chukho chuwrka yngentahna isapak chukho maangsa; amachuvaang savang mee chukho chiirvaata.

Chaang enre Batheem

¹² Batheem akhaangsah meechu bor aphava; akhaechuve isajaeh ing ingiircheh vakhaka, Thangnang ing aning amansiih ae khaena chongreep atu inuwzii ing iringnii phurchiichu ama ing phavaata.

¹³ Achuw ingkho batheem ting abuklae, “Ki i Thangnang ing ymbatheemva tamahrasii; Thangnang chu isamah inche batheemchehmah vokhehkho Aafhuw inche achuw tikho batheem mahchak.”

¹⁴ Changvakonchu mee vakhae i ataksah ing aadikpak nache runam nongtu inche abatheem sahva.

¹⁵ Chukhaenache aadikpak nong inche isamah isii icher abaringva; vokhehkho ama isii inche ahungnem tahnache ithiichu abaringva.

¹⁶ Kaningsiih kauw kanae ae, nenuw yngkheh yngkheh ynchaemahruw.

¹⁷ Isa kikthuur vakhae i Thangnang taniiva, vokhehkho ampa ningtanii ireng chuva. Aafhuw aningna chembe ynteh, ympeen ichii i aruvaam rapkho omah.

¹⁸ Ama ataksah ing amanden nache ichum inche ymbaringpa, chukhaenache ama ing aseem aren aalachu ynsuwhvataruw.

¹⁹ Kaningsiih kauw kanae ae, nenuw ing havi manghuwruw, amachuve mee vakhae ing singsii ing omva nenchiiva, changvakonchu asiitahna amanghuwsii, ichong tahna idim vokhehkho barung isiisiimah ynsuwhva nenchiiva;

²⁰ barung isii ing Thangnang lam ichumchu anong tuchehmah,

²¹ chukhaenache ibuwr itii vokhehkho isamah aangkheng bathen nuwna nenlaetha karcheh vachii ynthiing chongsae ympeehchu isajaeh ing manjiiruw.

²² Chongsae anong itu mee ynsuwh-ruw amanche nentaksah ynchaesa nuwna aangae mee chupang ynsuwh mahruw.

²³ Achuw mee yngkheh ing chong aangaepangchu ynsuwh naka nongchu tumah nave, ama meechu vaarthana amaepang amuthoh aanghakva;

²⁴ yngkhaena ynchii imbe ataksah amae amuchu bahirka, ama ynchii meeping ichii ynsiimahsa.

²⁵ Changvakonchu amanden ing vajeer chonghakchu anasiir ennaka vokhehkho abahir omru ing nong ing atumee inche isa phavaata.

²⁶ Achuw yngkheh mee ing aner iriimru ing ataksah taklinache mare tunaka ichum lamna isi ynthiing ping ichii ing amanden mee chuve ikanii-mah dehva.

²⁷ Dharmo ichii ive inuw vakhae apa Thangnang tanii ynthiing vokhehkho iseengjaeh lam chuva; amachuve, muwkhuwnuw aere ampa amnuw omah siti aechu rukuum itupeeh vokhehkho laaruw paamne yntak sahkho iseengjaeh ing ichumna isichuva.