HIBREEU 8 - ITHAR CHONGHAK

Jesu chuve inuw Yngkhaena Aanchung Jaethiim va

¹ Atarae kenuw ing kenriir athurfhuw chuve haviva: Thang-baenna ynjasuwh iruwngpham ongnii tachangna ong Aanchung Jaethiim yndeensa,

² laaruw mee ing atumah, Aafhuw ing amangiir ynthiing vokhehkho atatak rumniithaam nongpuhva.

³ Jaethiim vakhae kikthuur vokhehkho chaatha ipinii khaenache pham athinpae; ama khaenache jaethiim havi khaenakho ipeehfhuw ombachiiting buksa.

⁴ Aafhuw ing laaruw paamna ong vanave ama ing jaethiim vivachii mahva, akhaechuve vajeer chonghak inuwzii ing kikthuur chaap pivachii jaethiim omnae.

⁵ Enuw ae ichuve thangbaenna om peeh masak vokhehkho aruthaksii amachu rukuum atusah paetah; Mosi ing rumniithaam atuphana Thangnang ing aningna ariirpeeh khavaangkhe ichiivatah; Aafhuw ing aningna ariirchuve, “Naningna bungna kamansiisii vaangkhe peeh aangkhenglaang itunii khaena enla achii.”

⁶ Changvakonchu atiichembe Jesu ing isaseh nongtuniichu aphapa, amakhaenache isaseh chongreep inuwzii inche, isaseh chongiir nache Jesu ing eenuwmpeehchu ynsuwhsa.

⁷ Amaensa chongiir inche raarmah nave, avomaniinii khaena ynjongmah vachiiva.

⁸ Thangnang ing enraarchu tuwhka ariir, “Enruw, aaniichu thengna taka Aafhuw ing ariirnah, apha ichiinache Isrel eengkuw re Juda ae eengkuw thoh ynruw ing itharpeh chongiir seemva kata;

⁹ Ki ing Ijeep lipah tanii engkik bachuw ingka kehenruw ae inii nakhe empa emfhuw thoh ynruw ing kaseem chongiir vaangkhe tamahnii; akhaechuve enuw ing kachongriir nache ongjaeh mahsae, amatah nache ki ing enuwchu mandenmah aeng.”

¹⁰ Haviva Isrel eengkuw ae thoh chongiir seemva kachiichu, Aafhuw ing taka, ki ing kavajeer chonghak vakhaechu embarungriir sungna thinva kata amanche embarungriir sungnakho baziih peehva katae; ki enuw Thangnang ynsuwhva kata, amanche enuw ing kamee ynsuwh vaatae.

¹¹ Achuw tanga ingkho aveenchaangchu manchuw mahnii vokhehkho auwnae ningna tamahnii, “Aafhuw manghuwra,” akhaechuve isiing iruung mee aangkheng ing imanghuw vaata,

¹² Ki ing enchumniimah nache kaning manchuwhva katae, vokhehkho entu enri isiicher amanche ynraar nong entu vakhae athar vokheh ynsiipeehmah aening.

¹³ Itharpeh chongiir khaena ariir-chuve, Thangnang ing amaensachu baruw amanguurpa. Atii hungseehka vokhehkho jungbaruw inche maang-vachii junganeengsa.