HIBREEU 7 - ITHAR CHONGHAK

Jaethiim Melkijedek

¹ Salem iruwng vokhehkho aanchungseh Thangnang jaethiim Melkijedek inche Abraham ing iruwng aechu chehka ihunganrichu yntuwhfhuwka bor apeeh.

² Abraham ing aphasah sarup suum sungna sarup yngkheh apeeh, amaensana arutho ymbaritahna ichum ynthiing iruwng achiiniiva vokhehkho Salem iruwng ichiichuve, “Idae iruwng” va.

³ Ampa amnuw ahungsuwhnii athamin ichah, ama ahungsuwhnii inii vokhehkho apaar ichiim omah, changvakonchu Aafhuw Thangnang sapa vaang ynsuwhka Melkijedek inge parden omrudeh ing jaethiim ynsuwhka om.

⁴ Melkijedek ichii mee i aajaemeh iruungva kharruw, Aafhuw Thangnang chongreep derna Isrel sungkhur sungna sapa mamuwr Abraham ing laartanii ahengkhuum peehchae vakhaena sarup suumna sarup yngkheh Melkijedek ningna apeehpa.

⁵ Jaethiim pham ivi Levi sapa aenche chongreep inuwzii ing mee aetanii peehchae vokhehkho Isrel aetanii suumna yngkhehchu iphanii chonghak aphapae.

⁶ Changvakonchu Melkijedek chuve Isrel ae sungkhur tanii mahkhang nare Abraham ing suumna yngkhehchu apeeh. Chukhaenache Melkijedek ing Abraham chu bor apeehva.

⁷ Iruungseh ing isiingchu bor apeehne achuw yngkheh ing afhuwnii dennii iriirnii omah.

⁸ Amanche thikva enchii mee aenche sarup suumna sarup yngkheh emphanah, changvakonchu ringna ichii asaarkhii om ama inche aphasa.

⁹ Jinge iriir arusa, sarup suumna sarup yngkheh apha Levi ataksahrap ingkho Abraham ajaarna sarup suumna sarup yngkheh apeehva.

¹⁰ Melkijedek ing Abraham aantuwhfhuwrae Levi ichuve ampa diirriimna ynthinpehva.

¹¹ Levi sungkhur tanii ajaarna vokhehkho enuw enchonghak inche areer isuwh vanave, yngkhaenache Thangnang ing Aaron pham inuwzii ingmahka, Melkijedek pham inuwzii ing Khrista chu jaethiim ing ajebathenva?

¹² Akhaechuve jaethiimchu yntehnave, vajeer chonghak chukho yntehmah rumahsa.

¹³ Yngkhaena ynchii imbe reentaang sungkhur mee yngkheh tanii khaena chong havi ariirva. Reentaang sungkhur achuw mee yngkheh ingkho thiimkung nache nong tumah.

¹⁴ Akhaechuve nuwting Juda sungkhur tanii inuw Aafhuw Khrista ihungsuwhva ichii seengkiirna; Jaethiim khaena Mosi ing sungkhur khaena chongmahdeh.

¹⁵ Melkijedek thoh aanghak reentaang jaethiim yngkheh hungsuwh nave, ama inche athiseh ing seengsehna.

¹⁶ Aafhuw ichuve laaruw paam hakchaang ingmahva, changvakonchu ichen naemah iringnii ruwreng inuwzii ing jaethiim iviva.

¹⁷ Havane saarkhii apeehsa, “Nang chuve Melkijedek vaangkhe ichiim omah jaethiim chuvachii.”

¹⁸ Ajaennii chonghakchu suurka engkaniimah khaenache akakva.

¹⁹ Vajeer chonghak ing yntanga mapung mampha chehmah; chukhaenache athiseh ing isaseh ningmandenchu ynjenreen peehva, ama ajaarnache inuw ing Thangnang eeneengva.

²⁰ Havi chongreep turu ing jaethiim manvimah.

²¹ Enuw chuve chongreep ynvaeru ing jaethiim ivipae. Changvakonchu Thangnang ing Aafhuw ningnache taka, “Aafhuw ing chongreep atupa vokhehkho abarungriir manreeh mahdeh; Nang chuve Melkijedek inuwzii ing ichiim omah jaethiim chuvachii.”

²² Jinge ichii ing Jesu chuve chongreep thoh ynruw ing jaethiim vokhehkho athiseh ing isa chongiir ynsuwhsa.

²³ Amana jaethiim inempak omnae, akhaechuve henuumva enchiichu ithii ing akhaampa.

²⁴ Changvakonchu Aafhuw chuve ichiim omah ing anuumjaeh khaena yntehmah vachii jaethiim phamchu visa.

²⁵ Chukhae-nache Aafhuw ajaarna Thangnang avaneeng mee aechu Aafhuw ing ikarpeeh achehsa, Aafhuw chuve enuw engkhaena ithampeehnii khaena iringjaeh chuva.

²⁶ Hangchii Aanchung Jaethiim ichuve inuw yngkhaena matik ichava, amachuve ynthiing, isamahna thang isimah, ynchohmahdeh, isiicher ae tanii yngkhaevasah vokhehkho thangbaen chungna yngkaangsehva.

²⁷ Jaethiim aenche amaensana enuw entaksah isii khaena, aanuwnache mee ae khaena anasiirna chaatha empeehchu Aafhuw khaena chembe ikanii omahsa. Aafhuw ing vokhehpang ataksahchu aangkheng khaena chaatha ing ympisa.

²⁸ Vajeer chonghak ing isuur mee aechu aanchung jaethiim pham athinpae, changvakonchu vajeer chonghak aanuwna itheng chongsae chongreep inche asapa chu ichiim omah mapungpha ing pham athinpa.