HIBREEU 12 - ITHAR CHONGHAK

Thangnang Inuw Apa chuva

¹ Chukhaenache inuwchu hang-jaehmeh iruung ruwrduh vaange ichii ing irakuwrka saarkhii om khaena inuw ing irikpak vokhehkho iraecharii ing chaangna ymmangucheh isiichu rensa manuwka, inuw yngkhaena asiih tingche ikhaangsah thoh ynruw ing itaen yntaarnii tingche taensataruw,

² amanche ynthacha abur abasem re achinii Jesu chu enmanuwka, ymmaana om itaen yntaarniichu ikhaang thoh ynruw ing taentaruw. Aafhuw ing amaana om rotharoh ama khaena ningjakchu thosapeehru ing khros nache ijacham khaangka, Thangnang iruwngpham ongnii tachang nache ongsa.

³ Nenuw nenlaetha changtak naka nenjaniimah ing Aafhuw ataksahrap taklina isiicher ae tanii ijeehnii akhaangchu kharsataruw.

⁴ Nenuw ing ataraen phane isiichu laar tukchuwka sii ynta phanii ing irumah tumahri-chuw.

⁵ Thangnang ing asiti ae vaang ynthohsahnii chongsae neningna ichongkha nenbahirva? “Kasiti, Aafhuw ing eechahchu riithiih mahra, vokhehkho ynrakuh raenche changtak mahra.

⁶ Yngkhaena ynchii imbe Aafhuw ing aning amansiih meechu aachahnah, amanche aru mee chaapchu ponti apeehnah.”

⁷ Nenuw ing eechahchu khaang tanuwve Thangnang ing asiti ae vaang yntuva; yngkhaena ynchii imbe ampa ing aachahmah siti achuw omkhang?

⁸ Changvakonchu eechahmah naka sarup iphahakchu ynsuwh tanuwve, nenuw asapa chumah vachuw, lamcha vachuw.

⁹ Inuwchu ymmanchum laaruw mee apa ae om, amanche inuw ing eejasah ae. Inuw ing aajaehmeh athi ing laetha apa ama dernache ongmanuwka ringmah manuw khang?

¹⁰ Enuw ing isava enchii inuwzii inche inii topoh khaena inuwchu eechah ae, changvakonchu inuw ing Aafhuw aningna ynthiingchu iphahak inche ynkanii khaena eechahva.

¹¹ Ynchah ichii i anikungna chembe rotharoh omah, changvakonchu ijaniiva, changkhang nakho aanuwna chembe ama ajaarnache ynchuwsah apha mee aenche ichum ynthiing idae aanla enruwpnah.

Iriirpeehsah re Ynriimnii

¹² Chukhaenache nabaen ikham vo-khehkho nakheerkhuw ipaang mahkha manpirla,

¹³ amanche nasinii lamchu manchiimla, amana chembe ibong khichu ynthiirmahnii, changvakonchu damnii vaata.

¹⁴ Mee vakhae thoh idae omnii turuw vokhehkho ynthiing inche ongruw, amachumah naka achuw ingkho Aafhuw mumahnii.

¹⁵ Thang-nang tungsiih tanii achuw yngkheh ing asuurniimah ing ynriimpak ing enruw, changmah nave ikhapak arajung hengkaap naka ijachaam basuw vaata vokhehkho ama inche mee aanem hungmaangnii vaata;

¹⁶ vokhehkho achuw yngkheh naamak atu changmahka iphapham omchu chara vokhehna ajuwr Iso vaangkhe imaang mee omahrasii.

¹⁷ Nenuw ing nemanghuwsa amachuve aanuwna ama ing bor phaningka achiiraenche atakchu rupeeh mahsa, yngkhaena ynchii imbe ama ing richii ynta ing jongsakhang nare, barungriir huungnii apham tuwhmahsa.

¹⁸ Nenuw ing ipar aru vokhehkho mi ichuwh bung nache yndup, ynthim, khuwsuwr siiraang nache,

¹⁹ vokhehkho tumpeeh ynling re yndang chong iruur nache thengmahchuw, ama iruurchu aasii aenche vokheh chong yntanga eningna iriirniimah ing enthamsah;

²⁰ Bungchu lampa sha rap ingkho parnave rung ing deeng ae naka changmahka tharsae ing ideehva chiipae ichii chonghak amansir aechu enuw ing badaarcheh mahsae.

²¹ Ama amuchu aajaehmeh ichiisuwhva taka Mosi ing ariir, “Ki inempak ynchik ingka ynchiimsah ing.”

²² Changvakonchu nenuw chuve Zaion bung vokhehkho iring Thangnang khuwruung, thangbaen jerusalem, iteennii isamah vaarmee ae ruwr tingche,

²³ mee aangkheng aangkongnii vokhehkho thangbaenna ruming ynchar vasah amaensa ruwrthiing nache, mee vakhae vajeer aatu Thangnang, mapung apha ynthiing mee ae laetha tingche,

²⁴ ithar chongiirna eenuwmpeeh Jesu ningna vokhehkho Abel chungna isaseh ing ichong ynthik sii nache nenuw ihuungvachuw.

²⁵ Aafhuw ichongchu nenuw ing irumah nentuniimah ing ynriimruw. Laaruw paamna ichong Aafhuw atakchu enuw ing enrumah tahna ynjuwhsah phamah ae nave, thangbaen tanii ichong Aafhuw ningtanii eengheer tahna aajaehmeh athi ing ynjuwhchehmah vaanchiiva,

²⁶ Aafhuw aaruur ing laaruw paam aanuhpa, changvakonchu atiive chongreep tuka ariirnah, “Athar vokhehkho laaruw paam pangchu manuh mahning, thangbaen chukho manuhva kata.”

²⁷ Athar vokheh atarae havi amandangsa amachuve ynseem peeh vakhae ynnuh vaata vokhehkho peenvaata, amana chembe ynnuh chehmah peehchu omjaeh vaata.

²⁸ Chukhaenache ynnuh chehmah iruwngpaam ympha khaena inuw ing tungsiih deen manuwka ynjasuwh ing vokhehkho ichiisah thohche ynrupeehnii ing Thangnang chu rukuum tusataruw.

²⁹ Thangnang chuve amanchuwm dehcheh miva.