GALATIA 1 - ITHAR CHONGHAK

¹ Mee ae tanii vokhehkho mee ae ajaar tanii mahdehva, changvakonchu Jesu Khrista re atakchu ithii tanii amanring Apa Thangnang tungsiihna chongthang ivi Pol ki ing,

² vokhehkho havane ong ae kauw kanae aangkheng ing Galatia ruwrthiing neningna salaam kenjepeehsahnahchuw:

³ Apa Thangnang vokhehkho Jesu Khrista tanii tungsiih re idaechu neningna om ynsuwhrasiing.

⁴ Apa Thangnang ing amanden inuwzii ing laaruw paam apha ichamah tanii inuwchu ikarpeehnii khaena Jesu ataksahrap ing isii icher inuw yngkhaenache ympidehsa;

⁵ Apa Thangnang ningnache ichen naemah alaar isachu om ynsuwhrasiing. Amen.

Isa Chong Yngkheh vatah

⁶ Khrista tungsiih ing yngeen vasah nenuw ing, reentaang isa chong tingche nengaangheer tahnache ki inempak ngikning.

⁷ Atatak chuve reentaang isa chong omah, changva-konchu mee topoh ae ing nenuwchu imanja aeka vokhehkho isa chongchu manraarnii khaena entuvatah.

⁸ Chu-khaenache neningna isa chong kentong vasah taklinakhe, reentaang isa chong yngkheh nening nache kenuwrap ingkho changmahka thangbaen tanii vaarmee ing tongnave, ama siraap pharasiing.

⁹ Kenuw ing mamaenna kenriir vasah vaangkhe, ataraenkho athar kariirnareeh, achuw yngkheh ing nengaraang vasah taklina reentaang isa chong tongnave, ama siraap pharasiing.

¹⁰ Ataraene mee ing aru changmahka Thangnang ing aruchu kajongva? Changmahka meengae chiiniichu kajongva? Ki ing meengae chiinii ing katu vanave, Khrista meenae yngkheh ynsuwhmahva kachiiva.

Pol ing Chongthang Hungansuwh

¹¹ Kauw kanae ae, ki ing neningna kamanthangsahnah, amachuve ki ing katong isa chong havi laaruw mee ae tanii mahva.

¹² Akhaechuve laaruw mee ningtanii iraangmahdeh ing vokhehkho achuw yngkheh ingkho imanchuwmah, changvakonchu Jesu Khrista ing kaningna ymmandangpeeh ajaarnava.

¹³ Ajaenche Jehudi ae ing ening inuwzii ing ki isi ingchu nenuw ing nensiipa, amachuve Thangnang ruwrthiing ae taklina uurnii isamah ing kamanja ae vokhehkho amaangnii katu.

¹⁴ Ki ing kafhuw kapa ae purah nache kabarungriir manruwhdeh ingka, kalipah mee ae kaarna Jehudi aeng ening nache isi maensa yngkheh-ping.

¹⁵ Changvakonchu Thangnang ningchuwhna kanuw ven ruwpum tanii kajungom mahrirae eeteerka vokheh-kho anong tunii khaena a-eenka,

¹⁶ reentaang mee ae ningna Jesu Khrista thaminchu itongnii khaena kaning nache asapa chu amandangpa. Ki ing achuw mee yngkheh ningnakho chong yntahpeehnii khaena simah ing,

¹⁷ changmahka Jerusalem na ong kamana chongthang ivi vasah ae ningtingkho simah ing; changvakon-chu Arabia ting si ingka athar hunganrireeh ingka Damaskas ting huungsing.

¹⁸ Amana kumthum aanuwna Jerusalem ting Pitar yntuwhnii khaena vasi ingka amathoh inii nisuum arii runga onghak ung.

¹⁹ Amana Khrista anaepa Jems mahna-ka reentaang chongthang achuw tikho mumah ing.

²⁰ Ki ing neningna kavebaziih vakhae havi ichumva, Thangnang maekungna mee ynchae mee mah-ping.

²¹ Aanuwnache Sairia re Sisilia paam tingche sising.

²² Amana Khrista enthacha Jehudi ruwrthiing aenche kichu imanghuwmah ae.

²³ Changvakonchu isi vasahna inuwchu ymmanja mee ingkhe, amamaang vasah thachachu atarae atakrap ing atongreehna ichii chupang ensiisah ae;

²⁴ amana enuw ing kakhaena Thangnang chu emanpahsah.