EPHESIA 5 - ITHAR CHONGHAK

Irengna Ipaar

¹ Nenuw chuve Thangnang siti vachuw khaka, ama vaang nengomnii ing itupeehruw.

² Khrista ing aning imansiihka vokhehkho ataksahchu inuw yngkhaenache ning-siihnii barim ipifhuw ing ynsuwhka vokhehkho ympideh vaang, nenuw ningsiih nache siruw.

³ Changvakonchu nengkaarna ynthiing mee ae khaena matik ichavaang, naamak itu, ynthiingmah, ikaam, hava vakhae i nengkaarna aruming rapkho ipar omahrasii,

⁴ changpang mahka yntirsuwhpak nong, ipang chong, isamah ermanteeh, hava vakhae i itumah ing sakna, havi changdenna Thangnang chu manpahruw.

⁵ Havi nenuw ing nemanghuwsa amachuve, naamak itu, ynthiingmah nongtu changmahka ikaam (ichii chuve lae ruthaksii aning) mee achuwti ingkho Khrista re Thangnang lipah nache aphafhuw sup om omahnii.

⁶ Achuwti ingkho nenuwchu yntangamah chongla ing imanchaemah rasii; akhaechuve ama inche akhae ynsuwhka chongriir ynjiimah sitiae taklina Thangnang barungsii thengna.

⁷ Chukhaenache enuw ae thoh nenuw savuwchu phahak mahruw;

⁸ Ajaen chembe nenuw ynthimna ongvachuw, atiive nenuw Aafhuw ningnache ireng meechu sachuw. Chutahnache ireng mee vaang ringruw,

⁹ isapak, yndentahna ipir amanche ichum hava vakhae i ireng inche ahenreen aanlava.

¹⁰ Aafhuw apennii nongchu ynchiiva ichiichu tamnuwna siruw.

¹¹ Amanche aanla omah ynthim nong thohkhe yntanga tuhakmahruw, ama changdenna nemiraarchu ireng tingche henbasuwruw.

¹² Akhaechuve ynruwh ing entu enri nongchu iriir ening ynjakna.

¹³ Changvakonchu ahe-mandang aangkhengchu ireng inche ahemandangva, amanche ahemandang nong vakhaechu ireng chuva.

¹⁴ Ama khaenache jinge ariirsa, “Ijaar nang ynterla; vokhehkho ithii tanii hangiirla, amanche Khrista ing nataklina aen vaata.”

¹⁵ Chukhaenache nenuw ynsaangkhe iringpung tanuwna ynriimruw. Ynchiitanga ynghuwmah mee ae vaang ringmahruw changvakonchu ising mee ae vaang taruw.

¹⁶ Apha mamaangmahruw, apha sakmah.

¹⁷ Chukhaenache nenuw pangmahruw, Thangnang ing amandenchu ynchiiva ichii manghuwruw.

¹⁸ Juw baruw mahruw, amane yngkuh ynnahnii omna; ama changdenna ynthiing laetha ing sipruw.

¹⁹ Nenuw yngkheh yngkheh ympahnii la ing, ynthiing la ing vokhehkho iseeng la inche ichong peehruw; nenbarungriir iruwh ing ympahnii la re ynthiing la ing Aafhuw ningtingche hemanpahruw.

²⁰ Aafhuw Jesu Khrista ruming nache aangkhenglaang khaena apa Thangnang ningtingche apha om bakhaena hemanpahruw.

Eengkuw Sungna Ipaarnii

²¹ Khrista chu ijanuwna nenuw yngkheh ing yngkheh derna ongruw.

²² Rumee ae, Thangnang derna isi-vaang, nenfhuwsar ae dernache siruw.

²³ Khrista ingkho ruwrthiing taklina arusae ynsuwh vaange, fhuwsar ingkho rumee taklinache arusaeva; vokhehkho ahakchaang inche ruwrthiing ikarpeehchu ynsuwhsa.

²⁴ Chukhaenache ruwrthiing ing Khrista derna omvaange, rumee chaap aengkho nong aangkhengna enfhuwsar derna ongva chiipae.

²⁵ Fhuwsar ae, Khrista ingkho ruwr-thiingchu aning mansiihka aringkum apeeh vaange, nenuw vakhae ingkho nenrumee aechu nening mansiihva nenchiiva.

²⁶ Khrista ing atu havi aruwrthiingchu achongsae inche, chii inche chaam naka amanthiing aanuwnache Thangnang ningting apeehnii khaenache,

²⁷ isapak ing, iseeng vokhehkho ibuwrmahdeh ing, buw areenmahdeh changmahka imaang omahdeh ing ruwrthiingchu ataksahrap ing ipeehnii khaenava.

²⁸ Fhuwsar chaap aengkho enghak-chaang sahchu ening emansiih vaang, enrumee ae chukho ening mansiihva chiipae. Arumee aning amansiih mee chuve ataksah aning amansiih sahva.

²⁹ Achuw ingkho ahakchaangchu batirmah, ama chang-denna ahakchaangchu iruwpak ing ajuhsahnah; amavaange Khrista ingkho aruwrthiingchu rukuum atupeehnah.

³⁰ Chukhaenache inuw vakhae i Khrista hakchaang thoh yngkheh vamuw.

³¹ Ynziih ing ariir chuve, “Havi khaene pasar inche ampa re amnuw bathen naka, arumee thohche yngkhehpang ing omvaatae, amanche ynniimehchu yngkhehpang ing hungomvaatae.”

³² Havi ithuwhpak tanii iruwpak chongsaeva vokhehkho havi Khrista ruwrthiing thoh ruw ingki ing ichongping.

³³ Changvakonchu neningna kariirnah, fhuwsar vakhae ing arumeechu ataksah aning amansiih vaang, aning mansiih rasii amanche rumee vakhae inchenkho afhuwsarchu ijarasiing.