EPHESIA 2 - ITHAR CHONGHAK

Thangnang tanii Iringnii Ringkum

¹ Isivasahna nenuw chongriir ynjiimah vokhehkho isiicher inche laethana ithii vasah vachuw.

² laaruw paam mee aeng ensinii minvaen aafhuw ruwreng ing, chongriir ynjiimah sitiae ningnache ataraensiim nong atu vaange nenuw isichuw.

³ Inuw vakhae ikho hak-chaang vokhehkho barungriir ing aadik nache nong tumuka ajaenche ipaarmuw, vokhehkho reentaang mee aeng ipaar ae thohche aanghak ing Thangnang barung siknii siti ynsuwh vasah vamuw.

⁴ Changvakonchu Thangnang in-chembe, ningsiihna savangak vakhaka, Aafhuw inche inuwchu athiseh ing aning ymmansiihpa.

⁵ Chukhaenache isii icher ing ynthik raenche, inuwchu Khrista thohche atungsiih ajaar inche ymmanringpa.

⁶ Khrista aningsiih ichen naemah lerchiichu hungvivachii suwnthar suwnthar nache amandangnii khaena,

⁷ Thangnang ing Khrista thohche imanring hakka, thangbaen aphamsiirna inuwchu Jesu thohche ymmangong hakpa.

⁸ Akhaechuve nenthacha ajaar inche atungsiih ing yngkarva; havi nenuw nening tanii mahva, Thangnang kikthuur chuva;

⁹ chukhaenache achuw ingkho yndingniimah rasii, nongtu ing mahva.

¹⁰ Thangnang ing amaensana asir vasah isa nongtu nache isinii khaenache, Jesu ningna ynseem vasah Khrista kikseemchu vachuw.

Khrista ningna Yngkhehpangnii

¹¹ Nenuw yndenruw, ajaenche hakchaangna reentaang mee ynsuwh chuwka, kik ing ynseem vinchiip mee ita aeka enriir, changvakonchu vinchiipmah nenuw chuve

¹² changlaenche nenuw Khrista tanii asikchuw. Isrel lipah sitiae tanii asikvachuw vokhehkho chongngiir inuwzii ing mee lipah siti ynsuwh chuwka ningmanden omah vokhehkho laaruw paamna Thangnang ynvaemah mee ynsuwhchuw.

¹³ Changvakonchu atiive Jesu Khrista ningna yndah ing ajae ongchuw nenuwchu Khrista sii inche ymmaneengpa.

¹⁴ Aafhuw chuve inuw vakhae idae phanii chuva, asae ynniimeh isuwhchu yngkhehpang basuwka arik chim-bangna laedenpeenchu abakhiipa.

¹⁵ Thangnang inche hakchaang taklina asae ynniimeh isuwhchu ithar mee yngkhehpang ing manguurnii khaena aajeehniichu khros na thehka idae lamchu aseempa.

¹⁶ Khrista ing khros na ithii inche ynniimehchu yngkhehpangnii khaena aajeehniichu amamaangpa; amanche khros ajaar inche yngkhehpang basuwka laaruw mee vakhaechu Thangnang ting ahenbaripa.

¹⁷ Chutahnache Khrista ing juwngka yndah ing ong neningna chenkho, ynneengna ong neningna chenkho, idae isa chongchu amanthangpa.

¹⁸ Havi Khrista ajaar nache Jehudi vokhehkho reentaang mee ae, inuw vakhae inche laetha yngkhehpang ing apa ningnache ihuungchu ynchehva.

¹⁹ Chukhaenache nenuw reentaang mee ae, marpah mee vokhehkho, lamkhii mee ymsuwhmah sachuw, atii chembe nenuw ynthiing aethoh Thangnang eengkuwchu ynsuwh sachuw.

²⁰ Jesu Khrista inche athur-fhuwrungchu ynsuwhka, nenuw inche chongthang ae vokhehkho jaephar ae eenphambur taklinache ingiirchu ynsuwhsachuw.

²¹ Aafhuw inche eenphamburchu manchumhakka vokhehkho Thangnang ynthiing een aansuwhnii khaenache amangiirpa.

²² Aafhuw ningnache nenuw chukho laetha ajaarna Thangnang ongnii ynsuwhnii khaena ynseemhakpa.