EPHESIA 1 - ITHAR CHONGHAK

¹ Thangnang ing amandenna Jesu Khrista chongthang ivi Pol ki ing, Ephisia na ong ynthiing mee ae ningna vokhehkho Jesu Khrista ningna thachafhuw om neningnache,

² inuw Apa Thangnang re Aafhuw Jesu Khrista tanii tungsiih re idaechu om ynsuwhrasiing.

Khrista ningna Laethacher Bor

³ Thangnang vokhehkho inuw Aafhuw Jesu Khrista ampachu inuw ing manpahsa taruw! Akhaechuve Khrista ajaarna ama ing thangbaen vakhae tanii laethacher bor inche inuwchu bor ympeehpa.

⁴ Thangnang ing laaruw paam aseemmah rirae, ama ing Khrista ajaarna inuw ing ynthiing vokhehkho miraar omahdeh ing amee eensuwhnii inche eeteer vasahva.

⁵ Thangnang ing inuw vakhaechu Jesu Khrista jaarna asiti ynsuwhnii khaenache amanreep vasahva. Havi ama apennii vokhehkho amanden chuva.

⁶ Inuw ing angakpah Thangnang atungsiih khaena vokhehkho asapa jaarna ngareh kikthuur ympeeh khaenache manpahsa taruw.

⁷ Khrista ing inuwchu isii tanii ikarpeehnii khaena aringkum ympidehsa, amanche atii inuw yntaklina isii icherchu akuhpa. Havi Thangnang atungsiih savang ajaarna chemba.

⁸ Ama ing ynning nache ivaeh omahdeh ing aangkhenglaang ising iveer vokhehkho amanghuwchu, ataksah ing amanden apennii inuwzii ing ithuwhpak ing amandenchu ynning nache amanthangpa,

⁹ amana chembe Thangnang ing puhvachii aphachu ahenpha raenche, Khrista jaarna thangbaen vokhehkho laaruw paamna om chaap yngkhehpang ing omnaka,

¹⁰ Thangnang ing ajesir inuwzii ing apha ichiinache thangbaen vokhehkho laaruw paamna om ynseem peehchaap yngkhehpang ing omnaka Khrista inche arusae ynsuwhnii khaenava.

¹¹ Thangnang ing asir vokhehkho amanreep inuwzii ing aangkhenglaang hemanchichirka amanche abasenlimna amanden vasah inuwzii ing inuw vakhaechu Khrista ajaarnache amee ynsuwhnii khaena yngateerpa,

¹² amana chembe Khrista ningna amaensana ningmanden ymmangom inuw ing Thangnang alaar isachu ympahnii khaenava.

¹³ Nenuwkho ichum chongjeer nensiithoh Thangnang mee ynsuwh sachuw, isa chong inche manlaenpeeh neningna ajereenpa, amanche Khrista ningna nenthachapa; amakhaena Thangnang ing ynthiing laetha ajaarna nentaklina chongreep ahakchu anampa.

¹⁴ Laetha ingkho ymbarung amangamsa amachuve Thangnang ing amee ae ningna chongreep atuchu phavataruw. Thangnang alaar isachu inuw manpahsa taruw.

Pol ing Athamsah

¹⁵ Chukhaenache nenuw ing Aafhuw Jesu ningna nenthacha vokhehkho Thangnang amee vakhaechu nening nemansiih kasiitahna,

¹⁶ nengkhaena Thangnang ympahchu manchenmah ing. Kathamsahrae nenuw vakhaechu kaansiisahnahchuw,

¹⁷ amathoh ynruw ing Jesu Khrista chu neningna yndang-naka nemanghuwnii ing Aafhuw Jesu Khrista ampa Thangnang alaar isa inche ising iveernii laetha ipisana,

¹⁸ nenbarungriir mik veersana nenuw-chu yngkhaena yngeenva ichii chukho manghuw tanuwka ynthiing mee ae khaena iphafhuw ompak rotharohnii lerchiichu nenphanii khaena,

¹⁹ vokhehkho atucheh aricheh inuwzii ing athacha ae ningna uurnii isamah ing inempak ipir ruwreng omna ichii chukho nemanghuwnii ing,

²⁰ ama ruwreng inche Khrista chu ithii tanii manringka thangbaen paam nache Thangnang tachangna mangongka,

²¹ lipah aapuh ruwreng amanche aacheh vakhae taklina vokhehkho laaruw paamna ataraennii amanche hungvi vachiina,

²² ruming chaap aderna mangomchirka,

²³ ama asha aruwrthiing aongnii aafhuwchu abasuwpa.