AMANDANG 8 - ITHAR CHONGHAK

Avosariinii Ahak

¹ Jaoti inche avosariinii ahakchu abaranglae thangbaen nache apha chimbang vakhae daerengsa.

² Aanuwnache vaarmee sarii aeng Thangnang maana ingiir aechu kamu amana tumpeeh sariichu eningnache apeehpae.

³ Amana reentaang vaarmee yngkheh ing barim ningsiihnii ynthunii sana kam yngkhehchu chika thiimkung nache ngiirsa. Aningna-che iruwngpham ongnii maana om thiimkung ting ynthiing aeng enthamchu ipirniiseh khaenache aningna richii barim isachu ajepeehpa.

⁴ Thangnang maana ingiir vaarmee kiktanii richii barim isa mikhuwhchu ynthiing ae ing enthamsah thohche hungsuwhsa.

⁵ Amana vaarmee inche sana kamchu thiimkung tanii mi ing mansipka laaruw paam ting ajerenpa; amana khuw ynrii ruwsa iruur, tenlungpa chem ynleh vokhehkho linglaang itheng suwhsa.

Tumpeeh

⁶ Amana vaarmee sarii aenche tumpeeh sarii itumnii khaena ynthongsae.

⁷ Ahaarpa vaarmee inche atumpeehchu atumpa, amana sii ynvae iriir re michu jungbukka laaruw paam ynthummeh nache yngkhehchu kaangsa, saangthing chaap ynthum nache yngkhehchu kaangsa, vokhehkho fhuwr chaap kaangchirsa.

⁸ Avomaniinii vaarmee inche atumpeehchu atumpa, amana mi ichuwh ing iruungpak bung yngkhehchu chifhuw ting ajedeengpa.

⁹ Amana chifhuw ynthummehchu yngkheh chuve sii auurpa. Chifhuw sungna ynthin iring laetha aechu ynthum sungna yngkheh ithii ae, amana ruwkuwng ynthum sungna yngkhehchu ikii.

¹⁰ Avomanthumnii vaarmee inche atumpeehchu atumpa. Amana ipirpak ing aenjor aesii yngkheh thangbaen tanii jungbukka iva re chiitaang ynthummeh nache yngkheh taklina buksa.

¹¹ Ama aesii aruming chuve ikha va. Chii chaapchu ynthum sungna yngkheh chuve khaksa, ama ikha chii ain mee aechu inempak ithii ae.

¹² Avomanriinii vaarmee inche atumpeehchu atumpa. Amana inii, tha, amanche aesii aechu maangsae. Amatah nache ynthum sungna yngkheh inche aencheh mahsa. Siimna inii ing ynthum sungna yngkheh inche basak mahsa, vokhehkho jaen nache aesii aere thachu ynthum sungna yngkheh inche rengmahsa.

¹³ Amana kahengen tahnache mamuw vaati yngkheh ing thangbaen rikna ynjaapka ipirpak senruwr ing ariir, “Ijaniisapa, ijaniisapa, laaruw paamna ipaar mee ae khaena ijaniisapa, akhaechuve reentaang vaarmee ynthum ae tanii tumpeeh abaring raenche ynchii tasa vaatae!”