AMANDANG 7 - ITHAR CHONGHAK

Isrel Mee 144,000

¹ Havi aanuwna vaarmee manrii ae ing laaruw paam arakiingna ingiir aechu kamupa. Amatah nache laaruw paam ariikiing manrii tanii khuwsii vaanlehchu embadaar tahnache siiraang ing laaruw paam chifhuw, amanche saangthing ae taklina yntanga sukcheh mahsa.

² Amana inii hangsuwh tanii reentaang vaarmee yngkheh ing iring Thangnang ahakchu chika hangkar kamu. Ama vaarmee inche laaruw paam re chifhuw amamaangcheh ruwreng ideen vaarmee manrii aechu iruur ipirpak ing a-een.

³ Amana ariir, “Embachirna apa Thangnang meenaepae ichii anghakmahri raentaang laaruw paam, chifhuw vokhehkho saangthing aekha mamaang mahra.

⁴ Amana Isrel siti ae sungkhur vakhae tanii ahakchu amasing 144,000 (laak yngkheh lising somanrii ariimanrii) chaknae taka ariirchu kasiipa.”

⁵ Amachuve Juda sungkhur tanii lising suum ariinii, Ruben jaat tanii lising suum ariinii, Gad sungkhur tanii lising suum ariinii,

⁶ Asher sungkhur tanii lising suum ariinii, Naptali sungkhur tanii lising suum ariinii, Manaseh sungkhur tanii lising suum ariinii,

⁷ Simion sungkhur tanii lising suum ariinii, Levi sungkhur tanii lising suum ariinii, Isakar sungkhur tanii lising suum ariinii,

⁸ Zebulun sungkhur tanii lising suum ariinii, Josep sungkhur tanii lising suum ariinii, Benjamin sungkhur tanii lising suum ariinii ae ipae.

Mee Inempak

⁹ Enla, havi aanuwna apaam siirtanii, jaati siirtanii, chong yntinmah siisii tanii mee inempak aenche ivaarjaeh peen ing ynthong aeka engkik nache inubur bah chiaeka iruwngpham ongnii re Jaoti maanache ingiir ae.

¹⁰ Amanache enuw ing iruur ipirpak ing uung aeka, “Iruwngpham ongniina ong apa Thangnang re Jaoti inche yngkarsahpa enchii.”

¹¹ Iruwngpham ongniichu vaarmee vakhae ing, upa vakhae ing, vokhehkho iring laetha manrii thoh aenche vaangkuwr ing ngiirsae. Amana iruwngpham ongnii tingche vakhup aeka Thangnang chu rumsa aeka enriir,

¹² “Amen! ympah, alaar isa, ising, ympahfhuw, ynjasuwh, ruwreng, vokhehkho aachehchu ichen naemah ing Thangnang ningna omchu ynsuwhrasiing! Amen!”

¹³ Upa ae kaarna yngkheh inche kaningna ynsii, “Peen ivaarjaeh ing ynthong ae i achuw aepae vokhehkho utanii ithengpae?”

¹⁴ Aningna basang ingka kariir, “Oja, amanghuwchu nangvachii.” Amana kaning nache ynriirpeeh chuve, “Enuw vakhae i laaruw paam chiphana ijachaam akhaangvasah taniipae, enpeendiir chaap Jaoti sii inche ivaarjaeh ing enrusuk vasah chupae.

¹⁵ Amatah nache Thangnang iruwngpham ongniina ong aeka siim jaen naeru ing rumniieen nache rukuum atupae. Iruwngpham ongniina ong inche enuwchu ajaar inche badaarpeeh vaatae.

¹⁶ Enuwchu utaraenkho venchaam chiilaar phamahnii ae, inii ynsa ingkho deengmahnii ae,

¹⁷ yngkhaena ynchii imbe iruwngpham ongnii kuurna ong Jaoti inche cheer vaatae, amana iringnii chiitaang ifhuwr tingche ruwvaatae vokhehkho Thangnang ing emik rachii yntachu nuwrpeeh vaatae.”