AMANDANG 6 - ITHAR CHONGHAK

Ahak Aamong

¹ Jaoti inche ahak sarii kaarna yngkheh abarangchu kamupa amanche iring laetha manriimeh aeng khuw ynrii iruur vaang huungla enchiichu kasii.

² Amana paamkhuw kathiirtah nache sakuur ivaar yngkheh kamu. Ataklina ong mee yngkheh inche thar rupher chika vokhehhkho phurchii khumka laar chehnii khaena ituk isi.

³ Amana avomaniinii ahakchu abaranglae avomaniinii iring laetha ing huung achiichu kasii.

⁴ Changlaenche reentaang isen sakuur yngkhehchu hungsuwh kamu. Ataklina ongchu laaruw paamna laar ajenbasuwnii amanche mee aeng yngkheh re yngkheh engaanthehnii ruwrengchu aningna apeehpa. Ama khaena iruungpak laarchem yngkhehchu apeehreehpa.

⁵ Avomanthumnii ahakchu abaranglae avomanthumnii iring laetha ing huung achiichu kasiipa. Enruw, amana yndup sakuur yngkheh taklina ong inche akikna meil uurnii achi kamu.

⁶ Iring laetha manrii enruvae nache senruwr pingeng ichii ing ariir kasii. “Nikheh ruthamen gehu topoh, amana nikheh ruthamen khaena chimuw bajaang vaata. Changvakonchu richii barim khare vomrip chiikha mamaang mahra.”

⁷ Amana Jaoti inche avomanriinii ahakchu abarangpa; vokhehkho avomanriinii iring laetha inche huung achii senruwrchu kasii.

⁸ Amana idaangsip sakuur yngkheh kamu. Ama sakuur aveongnii arumingchu ithiiva amanche kuurdong aeng aanuw enghenjii; Eningnache laaruw paam mee aechu chem thar ing, venchaam ing, ina ing vokhehkho saklaang aenche enthehnii khaena ruwrengchu apeehpae.

⁹ Amana avorunganii ahakchu abaranglae Thangnang chongsae ijeerna vokhehkho asaarkhii ipeehna entheh laetha aechu thiimkung derna kamu ae.

¹⁰ Enuw inche senruwr ipirpak ing enriir, “Aacheh Aafhuw! Ynthiing vokhehkho Ichum! Kenuwchu yntheh ae laaruw mee taklina vajeer tuvanachii aasen ivaehva?”

¹¹ Enuwchu peen ivaar pika topoh ihah phehruw achiipa. Laaruw paamna iring engarang aechu ichiirdeh ing entheh suwmahri raentang ihahruw taka abasang ae.

¹² Avakruknii ahakchu abaranglae linglaang thengka inii ynthim vokhehkho tha ing sii vaang isenjor kamu.

¹³ Khuwsii vaanlehka apaam aapum aanuh raenche thachang aanla iminmah ibuw vaangkhe, minvaen aesii aechu laruwna jungbuksae.

¹⁴ Minvaenchu ynjuwr thiimbuwr vaangkhe ynjuwrka yngkhum pangsa amana bung re chiirikpaam aenche ama ama apham tingche ympeensae.

¹⁵ Laaruw paam iruwng ae, aruming isi mee ae, laarchang aaruung ae, savang ae, ruwreng ipir ae vokhehkho mee aangkheng amanche suwh ae, ruwkuwrjoh mee ae, bung tingche taen aeka rungkuw nache ynthuursae.

¹⁶ Enuw ing bung chaapna vokhehkho rungkuw chaapna, “keningting jungbuk nuwna iruwngpham ongniina ong re Jaoti barungsii mik bareng tanii ithuursaruw enchii!

¹⁷ Changchii iruungpak barungsii inii nache achuw ing diinaka ngiircheh vaate?”