AMANDANG 4 - ITHAR CHONGHAK

Thangbaenna Irumsah

¹ Havi aanuwna paamkhuw kathiir-tahnache thangbaen eenkhaar ynrang kamupa. Changlaen siimche kichu yngeen tumpeeh iruur yngkheh kasii, “Hanganseenra! Havi aanuwna suwhrem vachii yngkheh mansii kachii.”

² Changlaen siimche laetha ing ynruwpa. Amanache thangbaen iruwngpaam nache mee yngkheh heongsa.

³ Amachu isapak ing ynreen amanche iruwngpham ongniichu tungnusapa ing aruwkuwr.

⁴ Amana iruwngpham ongniichu, iruwngpham ongnii somnii ariimanrii ing aahir. Ama iruwngpham ae nache upa yngkhehter ing ivaarjaeh ing ynthong aeka sana phurchiichu engkhum.

⁵ Ariktanii iruwngpham ongniichu tenlungpa ruwsa vokhehkho mi vaang inempak ireng, amanche iruwngpham maensok nache Thangnang laetha sarii, mi asae sarii ichuwh.

⁶ Iruwngpham ongnii maensokchu chifhuw ynreen vaang, rudaechii ynthiingkiir vaang ichii ing om. Iruwngpham arakiing manriina iring laetha manriimeh ae ing emaensok re entuknung nache mik inempak ipaar ing ruwkuwrka ingiir ae.

⁷ Iring laetha ahaarpachu nongsha pingeng ichii, avomaniiniichu siirchar pingeng ichii, avomanthumnii amaechu mee pingeng taka amanche avomanriinii inche ynjaap mamuw pingeng ichii.

⁸ Amana iring laetha manrii aechu embatha isuwm vokhehkho entakchu emik sung taang om ipaar aenche siim jaen naeruung hava la i entu: “Ynthiingpak, ynthiingpak, ynthiingpak, ajaenkho, ataraenkho amanche hungvivachii nakho, aacheh Aafhuw Thangnang va.”

⁹ Iring laetha manrii aenche iruwng-pham ongnii nache ong ynjasuwhpak vokhehkho alaar isa ichen naemah ing ipaarchu la tuaeka emanpah.

¹⁰ Upa somnii ariimanrii aenche iruwngpham ongnii taklina ong amaensok nache vakhup aeka arum ae vokhehkho emphurchiichu iruwngpham ongnii maanache vesii aeka jinge ichii ing la ing emanpahsah ae,

¹¹ “Kengaafhuw vokhehkho Thangnang! Laaruw paamna om vakhae i nang ing naseemva, namanden inche ynseempeeh tahnachii ympahfhuw rarap nachii.”