AMANDANG 21 - ITHAR CHONGHAK

Ithar Thangbaen re Ithar Laaruw paam

¹ Aanuwnache ithar thangbaen re ithar laaruw paam kamupa; amana ahaarpa thangbaen re ahaarpa laaruw paamchu omahsa, amanche chi-fhuw chukho athar vokheh omahsa.

² Amana ithar khuwruung, ithar Jerusalem, afhuwsar khaena ynthong-peh rakhii niivachii sanuw inche thoraang tuka thangbaen tanii ijungchumchu ki ing kamupa.

³ Amana iruwngpham ongnii tanii iruur ipirpak yngkheh ing havi ariir kasiipa, “Enla, Thangnang ongnii eenchu mee aethoh ynruwhakna, Aafhuw ama inche enuw thohche onghak vaata, amanche enuw ing Aafhuw mee ynsuwh vaatae, vokhehkho Aafhuw Thangnang atakrap enuw thohche ynruwhakjaeh naka empa Thangnang chu ynsuwh vaata.

⁴ Ama ing emik richii yntachu nuwrpeeh vaatae. Amanache ithii omahnii, ijachaam, ichap ichuw changmahka athar ina omahnii, akhaechuve baruw vakhae chaap omahchirsa.”

⁵ Amana iruwngpham ongniina ong yngkheh inche ariir, “Enla, peeh aangkheng kamanthar chirpa.” Ama ingkho kaningna ariir, “Havi baziihra, akhaechuve havana chongsae vakhae i ichumva vokhehhko thachafhuw remva.”

⁶ Amana kaningna ariir, “Atii kipchirsa! Ki i Alpha vokhehkho Omega chuping, aren vokhehkho adongnii chuping. Achii iraar ningna-che iringnii chiitaang chiichu amen ichah ing pivakata.

⁷ Achehcheh mee inche havana lerchii i phasa vaata, amanche ki ing akhaena Thangnang vakata vokhehkho kasiti vaata.

⁸ Changvakonchu ynchik mee ae, thacha omah ae, ithuw vasah ae, miktheh ae, lamchat isamah, disuur ae, ruthaksii arum ae, amanche mare omchaap ae engkhaena chembe ichen naemah ing ichuwhjaeh mi sungting vokhehkho ynsajaeh, avomaniinii ithii tingche bukvaatae.”

Ithar Jerusalem

⁹ Aanuwnache adongniideh riirae mangkhiing ing isip kamfhuw achi vaarmee sarii tanii yngkheh ing chong ibuwhka ariir, “Huungla, rakhii niivachii Jaoti rumee ki ing mansii kachii.”

¹⁰ Amana vaarmee inche laetha jaarna iruungpak bung tingche ynruwpa, amana Thangnang ningtanii ynthiing khuwruung Jerusalem thangbaen tanii ijungchum kaningna ymmansii inche

¹¹ Thangnang alaar isa ing atufhuwchah ing ataklinache aenka, amen iruwpak rung ynthiingkiir ing yndang vaangche tasa.

¹² Amanache iruungpak yngkaang bang suwngkung suum ariinii omsa, vokhehkho suwngkung siirnache vaarmee suum ariinii om amanche Isrel siti sungkhur ruming suum ariinii kho ataklinache ynziih sapsa;

¹³ Iniisuwhtah tingche suwngkung asae ynthum om, Ikang tingche suwngkung asae ynthum, Irip tingche suwngkung asae ynthum om, amana Taetah ting chenkho suwngkung asae ynthum om.

¹⁴ Amana khuwruung bangchu abur suum ariinii omsa, amanche ataklinache Jaoti chongthang ae suum ariinii rumingchu ynthaangsiir ing ynthasiirsa.

¹⁵ Amana kaningna ichong inche khuwruung suwngkung chaap vokhehkho abang chaapchu amantinii sana thor achipa.

¹⁶ Khuwruungchu arakiing manrii isuwh ing om, amachu aphuw adung ynchimchak inche omsa, amana vaarmee inche khuwruungchu athor inche amantipa; amachu aphuw adung vokhehkho yngkaang aangkheng ynchim chakchak ing lising yngkheh charunga chakva.

¹⁷ Amana vaarmee inchenkho ama ing asichinnii laaruw mee khaap ing somanrii arii manrii kiubits (amachuve 216 isuw ing yngkaangva) amantipa.

¹⁸ Abangchu ynthiingkiir ing yndang inche ynseemka amanche khuwruung inche ynthiingkiir vaartha vaang ichii iseengjaeh sana ing ynseemka omsa.

¹⁹ Khuwruung abang abur vakhaechu amen iruwpak rung reentaang aajaeh inche isapak ing ynseemsa; amaensa nache jaspar, avomanii re amanthumnii nache Saphir, amanriinii nache Emerot,

²⁰ arunganii nache oniks, avakruknii nache karnelien, asariinii nache krusolit, airiihnii nache berir, aikuwnii nache topaaj, asuumnii nache kristopharas, asuum arii yngkheh nache jasin, asuum ariinii nache amethis, hava vakhae rung inge yngiirsa.

²¹ Amanche suwngkung suum ariinii chaap nache amen iruwpak rung suumariinii omsae, asuwngkung siirchu amen iruwpak ing ynseemsa, amanche khuwruung lamchu vaartha vaang ichii iseeng sana inche ynseemsa.

²² Amana khuwruung nache rumnii-een om mumahsing, akhaechuve rumniieenchu Aacheh Aafhuw Thangnang re Jaoti ynsuwhsae.

²³ Khuwruung nache inii tha ing aenvachii ikanii omahsa. Yngkhaena ynchii imbe Thangnang alaar isa inche rengka amanche jaemichu Jaoti ynsuwhsa.

²⁴ Amana laaruw paam mee vakhae inche ireng nache hunsi vasi tuvaatae; vokhehkho iruwng chaap aenche enlerchii alaar isachu henreen vaatae,

²⁵ amanche suwngkung chaapchu anasiirna ynrang naka omvaata amanche jaen ivi ichii amanache omahdehnii;

²⁶ jaati mee vakhae ing enruwreng isa ivaar vokhehkho ynjasuwhpak henreen vaatae.

²⁷ Changvakonchu asung tingche ynthiingmah amanche yntirsuwh ningjaknii nong atuae achuw yngkheh changmahka mare ing ichong ae varuwhcheh mahnii ae, changvakonchu iringnii thiimbuwrna aruming ynziih vakhae ae inche khuwruung nache hungruwh vaatae.