AMANDANG 16 - ITHAR CHONGHAK

Thangnang Barungsii Kamfhuw

¹ Rumniieen tanii ipirpak iruur yngkheh inche vaarmee sarii ae ningnache havi ariir kasiipa, “Sinuwna Thangnang barungsii kamfhuw sarii amakha laaruw paamna jungriibehruw.”

² Ahaarpa vaarmee inche sika akamfhuwchu laaruw paam nache ajungriipa; vokhehkho saklaang buw-tinnii om amanche amasakchu arum mee ae taklina yntirsuwh vokhehkho isamah ipaenchu ymphuwngsa.

³ Avomaniinii vaarmee inche akamfhuwchu chifhuw nache ariipa, amanche amachu ithii ae sii vaangche tasa, vokhehkho chifhuwna om iring laetha chaap aechu thiksae.

⁴ Avomanthumnii vaarmee inche akamfhuwchu iva aangkhengna vokhehkho chiitaang ifhuwr chaapna ariitahnache sii auurpa.

⁵ Amanche chii vakhae vaarmee inche havi ariir ki ing kasiipa, “O ataraennii vokhehkho isi vasahna ynthiing Aafhuw navajeer vakhae chaap ichum chirva!

⁶ Akhaechuve mee aenche ynthiing aere jaephar aechu sii emanfhuwrpa, amatah nache siichu infhuw inche napeehpae. Havi enuw ing iphapham isuwh rarapva!”

⁷ Aanuwnache thiimkung tanii iruur ki ing kasiipa, “Aacheh Aafhuw Thangnang! Navajeer vakhae i ichumva vokhehkho ynthiing chirva!”

⁸ Avomanriinii vaarmee inche akamfhuwchu inii taklinache ariipa, amanche inii ynsa inche mee ae taklina adeengchu arupa.

⁹ Amatah nache mee aechu ichiisuwhpak ing ynsa inche kaangsae, vokhehkho riirae mangkhiing taklina ruwreng adeen Thangnang arumingchu siraap piaeka, vokhehkho embarungriir huungmah aeka manpah mahsae.

¹⁰ Avorunganii vaarmee inche akamfhuwchu saklaang aongnii nache ariipa, amatah nache aaruwng paamchu amanthimpohpa; amanche enuw abuw ina aenche embari engiihpa

¹¹ vokhehkho enuw ing abuw ina ae khaena thangbaen Thangnang chu siraap empipa, amanche isamah enongtanii embarungriir huungmahsae.

¹² Avakruknii vaarmee inche akamfhuwchu iruungpak Iupharetis iva nache ariipa, amanche iniisuwhtah tanii itheng iruwng ae khaena lam ipeehnii khaenache chiichu amangkangpa.

¹³ Aanuwnache ynthiingmah laetha ynthummeh uchoh vaang ichii kamupa. Enuw ae i ruurfhuw baetanii, tangkhonglae baetanii vokhehkho ichummah jaephar ae baetanii vakhae ihungsuwhpae.

¹⁴ Enuw ae i laetho aatu umlae laetha aepae. Enuw ynthum laetha ae inge Aacheh Thangnang iruungpak aanii thachu laar tuknii khaenache, laaruw paam iruwng vakhae ningting siaeka amangkongpae.

¹⁵ “Enruw, ki lamruw ae vaangkhe thengva kata! Achuw yngkheh ing hangsuw naka vokhehkho asae ing mee ae kaarna ningjakchu aphaniimah ing apeen asing meechu bor aphava.”

¹⁶ Laetha aenche Hebreeu chongna Armageddon ichii apham nache iruwng vakhaechu ipurpak ing ahenruwpae.

¹⁷ Avosariinii vaarmee inche siiraang tingche akamfhuwchu ariipa, amanche rumniieen sungna iruwngpham ongnii tanii ipirpak iruur yngkheh inche ariir, Havinge chichaksa!

¹⁸ Amana tenlungpa ynleh vokhehkho khuw ynrii huwruwsapohsa, amanche mee ing laaruw paamna apaallae isuwhmah rideh ipirpak linglaang thengsa; havi aangkhenglaangna make ithipak linglaang chusa!

¹⁹ Amatah nache iruungpak khuwruungchu arii ynthummeh ing yngkhaesa, amanche paam aangkhenglaang khuwruung chaapchu maangchirsa. chutahnache iruungpak Bebilon chu Thangnang barungsii adongniideh inche juw innii kamchu ipinii khaena Aafhuw ing aansiipa.

²⁰ Amana chiirikpaam ymmumahsa amanche bung vakhaechu omahchirsa;

²¹ kilo songa vak irik ipirpak iriir, minvaen tanii mee ae taklinache jungbuksa, amanche mee ae ing riirae mangkhiing suwhnii iriir ibuw khaenache Thangnang taklina ithipak ing chongsae; akhaechuve ipirpak riirae mangkhiing tahna chemva.