2 TIMOTHI 3 - ITHAR CHONGHAK

Achinii Inii

¹ Achinii aphachu ahungvi raenche ithipak apha thengvaata ichii manghuwra.

² Amachuve mee vakhae jinge hungtavaata, ataksahpang aning ynsiihsah, seer aadikpak, abarungriirna ynding, iruungchichuh, ithipak ing ichong mee ae, ampa amnuw chong areeh, mee ing atupeeh amanghuwmah, ynthiingmah,

³ ningsiih ataklina omah, yntuwhak arumah, mee iriirsah ipir, ichummah mee, ichiisuwhjaeh ing om, isachu abatir,

⁴ mee rensajaeh kata achii, ynriimmah, ataksah khaena iruungchichuh, Thangnang aning amansiih ithideh ing ahakchaang nungaeniipang aadik,

⁵ Thangnang yndenvaang taangnacha tuka, aruwrengchu aadikmah changchii mee ae tanii nang yngheerla.

⁶ Enuw hangchii mee aeng ynruwh ing eensung eensung ting ruwh aeka, isii peehrik areen rupanuw ihuung iva barungriir ing aruw ae;

⁷ ichumchu manchuw aekhang manuwre amanghuwchehmah ae, ipang rupanuw ae chupang asuwr mee omnae.

⁸ Jaanes re Jaambres ing Mosi enrumah raennii vaang, havana mee ae ingkho ichumchu rumahsae; enuw ae i thacha arumah imaang vasah meepae.

⁹ Chukhaenache enuw utaraenkho hungruungcheh mahnii ae, akhaechuve enuw ing emanden engkharchu tomsa, hava mee ynniimeh ae ningna isuwh vaange mee vakhae taklina chenkho yndang vaata.

Akuurchiimnii Iriirpeeh Chongsae

¹⁰ Chukhaenache nang chuve ki ing kamanchuwchii nakhe, katu kari, kamanden, kathacha, apha iseeh ing kakhaangcheh, kaningsiih, kareepnii nache,

¹¹ kanangnii vokhehkho ijachaam kakhaangchu nasiipa; amachuve Entiok na, Ikonia na, Rusta na, kataklina isuwh chaap kakhaangchu nang ing namanghuwsa; amanche hava vakhae tanii i Aafhuw inche yngkarsahpa.

¹² Jesu Khrista ningna Thangnang ynden mee ynsuwh ningka achii amanden mee vakhae chuve ijachaamchu khaangvachiiva.

¹³ Changvakonchu ichamah mee ae vokhehkho aningae om mee ae inche manchae ae naka athisehseh ichamahchu hungom sehseh vaata.

¹⁴ Chukhaenache nang ing natam namanghuw nakhe thacha icheep ing ynlaaprudeh ing ongjaehra; nang ing achuw ae ningna natamva,

¹⁵ vokhehkho nanaepanglae basenka ynthiing ichumchu namanghuwva ichii nataksah ing namanghuwsa; Jesu Khrista ithacha ajaar ing ichum ynthiing inge iringnii lamtingche ynruwchehsa.

¹⁶ Ynthiing thiimziih chong vakhae Thangnang ihuwh taniiva amanche Thangnang nong atu mee vakhae khaena areersuwh ing machang aansuwhnii ing,

¹⁷ mee manchuwnii khaena, ynchahnii khaena, manchumnii khaena, amanche ichum ynthiing ing inringnii khaena inempak ikaniiva.