2 PITAR 3 - ITHAR CHONGHAK

Khrista Jungtheng vachii khaena Chongreep

¹ Kaningsiih ae, hava inge atii ki ing neningna avomaniinii kabaziih chongthenva. Hava aaniimehne ki ing nenuwchu manthangniichuw ingka ynthiing nenbarungriirchu kathohsahva;

² ynthiing jaephar aeng ajae enjeervasah chong khare nenchongthang ae jaarna eekarpeeh Aafhuw chonghak amakha nenuw ing nengaansiinii khaenava.

³ Havi amaensana manghuwruw amachuve, achiniipha inii nache ymmaniisah aengkhe entaksahrap ing engadik inuwchu jiiae naka, ymmaniisah aethoh ynruw ing theng ae naka tavaatae,

⁴ “Aafhuw ing jungtheng vakata taka chongreep atuchu ukhova chang? Afhuw apuw aeng enthik raennii inii tha peehchae ynseem vasah aangkheng ynlaaprudeh ing omjaehtah kachang.”

⁵ Havi ajae basenka Thangnang chonghak ajaarna thangbaen re laaruw ynseemchu havana mee aenge emanghuwbroh ing runungka tamahsae.

⁶ Laaruw i chii tanii ing hungomka vokhehkho chii ajaarnache omba, amanche chii riimka baruw laaruw paam amamaangchu chii yngenva.

⁷ Changvakonchu thangbaen vakhae vokhehkho ataraennii laaruw paam om i Thangnang chongsae khajaeh ingkhe mi ing bathunii khaena asiihjaehva, enuw i vajeer iniichu aphamahri raentaang vokhehkho Thangnang yndenmah ae amamaangnii khaenache aseehjaehpa.

⁸ Chukhaenache kaningsiih ae, hava chong i nenuw bahirmahruw, akhaechuve Aafhuw ningna inii nikheh i kum lising yngkheh thoh aanghakva, vokhehkho kum lising yngkheh i inii nikheh pangthoh aanghakva.

⁹ Aafhuw i achongreep tapna ta aeka mee topoh aeng emanden vaangkhe, Aafhuw chuve achongreep nache itapmahva nengkhaena iseeh ing yngkhaangpeeh vatah; Aafhuw ama ing achuwkho maangnaka tamahdeh, changvakonchu mee aangkheng barungriir ihuungchu aadikva.

¹⁰ Changvakonchu Aafhuw aanii chuve lamruw vaangkhe ynghuw ynghamah ing thengvaata; ama inii nache minvaen ing ahuwruwsa ipirpak ing baring naka maangvaata, amanache amen iruwpak peehchae vakhaechu mi ynsa inche deeng naka chuwmchir vaata, changlaenche laaruw paam vokhehkho asungna om nongtu chaap mi ing bathuchir vaata.

¹¹ Peeh aangkhenglaang jinge ichii ing chuwmchir vachii khaenache, Thangnang aanii thengvachii aphachu hahnuwna vokhehkho barungriir iruwh ing idiknuwna, nenuw ynthiing ing paarruw. Thangnang yndenchu mahnaka nenuw ynchii mee ynsuwhva nenchiiva!

¹² Ama inii nache minvaenchu mi ing kaangnaka chuwmvaata, vokhehkho amen iruwpak peeh vakhae mi ynsa ing kaangnaka chuwmdeh vaata.

¹³ Changvakonchu Aafhuw achongreep inuwzii ing ichum ing ipaar, ithar thangbaen vokhehkho itharpeh laaruw paam amachu ynghahjaehva.

¹⁴ Kaningsiih ae, havi khaene nenuw ing nenghahjaeh vakhaka, Aafhuw mik enna ynthiing ing vokhehkho isamahna thang isimah ing amanche Thangnang thohche idae ing ipaarniichu turuw.

¹⁵ Vokhehkho Aafhuw ing manlahka yngkhaangpeehchu manlaenpeeh phanii khaenava ichii ing riruw. Inuw vakhae ing ning ymmansiih Pol ingkho, ataklina ajepeeh losing inuwzii ing neningna abaziih khajaeh vatah. Ama athiimziih aangkhenglaang nakho hava chong khaene ama ing ynjeerpeeh khajaeh vatah.

¹⁶ Ama sungne chong topoh chuve ynghuwnii ruwpakna; amachu ihaesingmah aeng vokhehkho barungriirna ingiirmah aeng reentaang thiimziih ynthiing chukho henbreh avebreh ae vaangkhe, entaksahrap imaangnii ipha ing henbreh avebrehnah ae.

¹⁷ Chukhaenache kaningsiih ae, hava chong khaene maensa ing manghuw nuwna, ichamah ae emiraar ing ivakuwm ae naka nencheepnii nakhe isamahting athar ibuwkho arusa tanuwna nentiihniimah ing ynriimruw.

¹⁸ Tungsiih vokhehkho inuw Aafhuw kho eekarpeeh Aafhuw kho ynsuwh Jesu Khrista ynghuwtah nache hungruungruw. Aafhuw ningnache alaar isachu ataraenkho ichen naemah ipha ingkho omjaehchu ynsuwhrasiing. Amen.