2 PITAR 2 - ITHAR CHONGHAK

Ynraar ing Aanchuw mee ae

¹ Ichummah jaephar aenche mee kaarna hungsuwhsae, havi vaange nengkaarna ynraar ing aanchuw mee ae hunganphuwng vaatae. Enuw ing mee maangnii vachii ichummah thamin henreen vaatae, amanche akarpeeh ae Aafhuw chu rumah ae naka manghuw mangharu ing entaksah maangnii vachii henreensa vaatae.

² Vokhehkho ichuwh thaemah enlamchu mee aanem inche jiinaka, enuw ing entu enri inche ichum lam taklina mee ae ing ithipak ing chongvaatae.

³ Enuw engkaraam inche ynraar chong inche ijuwrfhuw peehvaang nenuw isichinnii vaatae; ichiichuve ajae enuwchu imaangnii ting ababuw meekha katarmah vokhehkho jaarmah.

⁴ Akhaechuve vaarmee ae ing isii enrangtahna Thangnang ing enuwchu karpeehmah aeka vajeernii khaena asiih aechu longkong ynthim khurting siiae nave,

⁵ vokhehkho baruw laaruw paamchu karpeehru ing, Aafhuw ing Thangnang emanghuwmah aeng laaruw paamna empaarlae chii iruungpak ing amanriim raenche, ichum chong ariir Noah chu reentaang mee sarii thoh ynruw ing siihjaeh nave;

⁶ changpang mahka Sodom vokhehkho Gomora khuwruung ynniimehchu rungvuwh auur ing mamaang naka manraar nave, vokhehkho Thangnang emanghuwmah ae taklina hungsuwhvachii aman-dangniichu enuw ynsuwhpae nave;

⁷ vokhehkho ichamah entu enri ing inempak amanja ae ichum ynthiing Lot chu karpeeh nave,

⁸ (amachuve ichum ynthiing mee inche engkaarna ipaar emu, ensiirae, anasiir ichum ynthiing alaethachu chongriir ynjiimah nong inche ajeehnii ae),

⁹ amatah nache Aafhuw inche ijachaam aajaeh ing amansin ae Thangnang ynden aechu ikarpeehnii amanghuwpa vokhehkho ichamah aechu vajeer aanii khaenache ynsaangkhe ijachaam phanii nache siiva kachiipae ichiichu amanghuwpa,

¹⁰ athurfhuwseh ing ensa ing aadik inuw ajiiae vokhehkho Thangnang ruwreng arathiih ae khaenache ynsuwhsa. Hava ynraar ing aanchuw mee ae inge thona isa ing vokhekho ynding ing enlaar isa om ae taklinache ithipak ing ichong chiimahsae.

¹¹ Vokhehkho vaarmee aerap ingkho entu enrichehnii ruwreng ipir deen ae khangnare, Aafhuw maanache entaklina ithipak ing chongmah ae.

¹² Changvakonchu hangchii mee ae inge, mee suwrnii, amamaangnii khaena abasenraennii ing sha ae vaang jungom vasah envakhar omah hungsi vasi ae vaang emanghuwmah khaenache, vokhehkho ithipak ing ichong ae khaenache enuw sha ae vaang maangvaatae.

¹³ Jinge ichii ing ichum ynthiingmah entu aphor inche ynraaarchu emphanah ae; siimna kaethok aeka ike aechu nungaenii kuurvava ichii ing ariae inche nenuw thoh nensahpoh nenginpoh raenche emare om ing kaethoknae; enuw ae i ibuwr ikah vokhehkho ymmak meepae.

¹⁴ Enuw ae i emik barengna rupanuw taklina ichuwhmah ing sipna, amanche emik bareng inche isii arangchu chenmah, enuw ing abarungriir ingiirmah mee aechu abatheemnah ae; enuw i embarungriir ikaamniichu om vasahva. Chukhaenache enuw ichuve isamah siraap apha siti chupae.

¹⁵ Enuw ing ichum lamchu bathen aeka, Bior sapa Balaam alamchu jiiaeka aasiirting sisae; Balaam ing ynraar nong atu menchu enuw ingkho engadikpa,

¹⁶ changvakonchu ama ing atusah arisah isii khaenache ynrakuh aphapa; Achong isuwhmah sha Lola ing mee iruur ing hangchongka jaephar ynveeh nongchu akhaampa.

¹⁷ Enuw ae i chii ikang chiirum vokhehkho sii ivaraang ing araenchak ruwrduhpae; engkhaenache ymthimna ymthimdehchu asiihpa.

¹⁸ Ikanii omahvachii ynding ing chong aeka, enuw ing ichummahna ipaar mee ae tanii ihungpaarpeh aechu, hakchaang ing aadik peeh inche abatheemnah ae.

¹⁹ Enuw ing mee aechu ruwkuwrjoh phanii khaena chongreep tupeeh aeka, entak chuve maangvachii suwhchu ynsuwhsae; akhaechuve achuw yngkhehchu achehcheh ama mee inche achiirkhi abasuwnah.

²⁰ Amachuve enuw ing eekarpeeh Aafhuw Khrista chu emanghuw ajaarna laaruw paamna isamah chaap nongtanii iring empha aanuwting, isamah nongnache athar vokheh tiih ae nave, engkhaena akuurchiimnii matachu amaensa nakha ithi ing sakmahnii.

²¹ Yngkhaena ynchii imbe ichum lamchu enuw ing manghuw aeka, eningna ympivasah ynthiing chonghak tanii yngheer aekha ithi ing enuw ing emanghuwmah rideh inche engkhaena sakseh vachiiva.

²² Ichum chongthram ing ajeerchu eningna hungsuwhsa amachuve, “Uti ing asoh vasah vokheh vaanrireehka avasahnah,” amanche “Ynchaampeh vasah voh ing athar vokheh inuungting vaanbuwr reehna.”