1 PITAR 4 - ITHAR CHONGHAK

Ringkum Ynteh

¹ Khrista ing hakchaangna ijachaam akhaang vakhaka, nenuwkho amathoh aanghak ing nenbarungriirchu ama ing amanden thoh aanghakjaeh ing manpirruw; akhaechuve hakchaangna ijachaam akhaang vasah mee inche isiichu abathen chehnah.

² Atii basen naka nenringkumchu laaruw mee ing amanden nache ringru ing, Thangnang ing amanden nache iringnii khaena chenva.

³ Akhaechuve ichuwhmah nong, hakchaang ing aadik, juw ynruw, ichuwhmahna inungae, juw in yntaarnii, vokhehkho umlae ruthaksii irum, hava vakhae i reentaang mee aeng entu enrina nenuw ing isivasahna nentukha atii manchenruw ynsuwhsa.

⁴ Havana nong vakhaene nenuw ing enuwthoh ynruw ing ichuwhmah nongnache ynvae ynreen vakhae nenbathen tahnache, enuw ing ruwriimnii ing manden aeka ithipak ing chongnae.

⁵ Changvakonchu iring ae vokhehkho ithii aechu vajeer tunii khaena thoraang atu Aafhuw ningnache entaksah ing akhaechu pisavaatae.

⁶ Chukhaena chenva ithii aechu laaruw mee hakchaang inuwzii ing vajeer yntu vakhangnare, laetha nache enuwkho Thangnang iring vaang iringnii khaena ening nakho isa chongchu yntongva.

⁷ Aangkhenglaang chiimchirvachii apha ynneengsa, chukhaenache nenuw nenbarungriir suwrnuwna vokhehkho ithamnii khaena ynriimruw.

⁸ Aangkhenglaangna athurfhuwseh chuve nenuw yngkheh yngkheh ningsiih omnii khaenache barungriir manruwhruw, akhaechuve ningsiih inche isii aajaehchu abaruw chehsa.

⁹ Yngkheh yngkheh ynriirsah omru ing mee vakhaechu bariimsahnii turuw.

¹⁰ Mee yngkheh khehna isa rukuumtu yngkhheh ynsuwhnii inche asiksik Thangnang kikthuurchu, Thangnang tanii isaseh kikthuur apha khaena reentaang areh ae saknii khaenache nongtunii vachiiva.

¹¹ Achuw yngkheh mee ing chongnave, Thangnang chong vaang jeerrasiing; achuw yngkheh mee ing nongchu tunave, Thangnang ing apeeh ruwreng thoh ynruw ing turasiing; ama inche aangkhengna Thangnang chu Jesu Khrista ajaarna ympahnii khaenava. Aafhuw ningnache ichen naemah alaar isa vokhehkho ruwreng omna. Amen.

Khrista khaena Ijachaam Ikhaang

¹² Kaningsiih kaarang ae, nenuwchu chaang ennii khaena nentaklina ijachaampak itheng nakhe, laanglam ruwriimniipak neningna isuwh varam tanuwna ngikmahruw.

¹³ Changvakonchu Khrista alaar isachu aandanglaenche athiseh ing nungaepak inche nenrotha rohnii khaenache, Khrista ijachaamchu sarup phahaknii khaena nenrotha manrohruw.

¹⁴ Nenuwchu Khrista khaena ningjak ipiae nave bor nenphava; akhaechuve alaar isa laetha vokhehkho Thangnang laetha inche nentaklina ongva.

¹⁵ Changvakonchu nenuw achuw ingkho miktheh, lamruw, isamah atu, changmahka reentaang tanii mee chongriirna ynvae thaangthaang mee ynsuwhka ijachaam akhaang vaangkhe tamahruw.

¹⁶ Changvakonchu achuw yngkheh inche Khristen yngkheh ynsuwh ing ijachaamchu khaangnave aning manjakmah rasiing, changvakonchu ama khaenache ama ing Thangnang manpah rasii.

¹⁷ Thangnang eengkuw sungnache vajeer tunii aphachu ynneengsa, amachu ynning nache maensa ing basen nave, Thangnang isa chong amanjiimah ae ningnache achiimniichu ynchii ynsuwhvaate?

¹⁸ Akhaechuve “Ichum ynthiing aechu iruwpak ing karpeeh ae nave; Thangnang yndenmah ae vokhehkho isii icher mee aechu ynchii ynsuwh vaatae?”

¹⁹ Chukhaenache Thangnang ing amandenna ijachaam akhaang ae inche ichum tuae sana vokhehkho enlaethachu thachafhuw Aaseem Aafhuw ningnache mansir ae rasii.